ABŞ Senatında Nabukko layihəsi ilə bağlı dinləmələr keçirilib

Xarici kütləvi informasiya vasitələrinin yaydığı məlumata görə, toplantını giriş sözü ilə senator Riçard Luqar açıb. Onun fikrincə, Türkiyədə imzalanan hökumətlərarası saziş bütün dünyaya siqnal oldu ki, layihəyə cəlb olunan ölkələr qazla manipulyasiya edərək nüfuz qazanan qüvvələrin planları ilə barışmayacaqlar.

Senator Nabukkoda uğur qazanmaq üçün Azərbaycan, Türkiyə, Gürcüstan, Avropa Birliyi və ABŞ-ın ciddi çalışdığını deyib. O, İraqın layihəyə qoşulmasının böyük imkanlar yaradacağını söyləyib. İmzalanma mərasimindən sonra İraqın Baş naziri Maliko ilə görüşdüyünü xatırladan natiq rəsmi Bağdadın Nabukkoya böyük nikbinliklə baxdığını açıqlayıb.

ABŞ-ın Avropaya enerji siyasəti üzrə xüsusi elçisi Riçard Morninqstar isə bəyan edib ki, İranın nüvə proqramı ilə bağlı məsələdə tam aydınlıq yaranmadan Tehranın bu layihədə iştirakı mümkünsüzdür. O, ABŞ-a birbaşa aidiyyəti olmasa da, Nabukkonun dünyanın qaz təchizatı sistemində mühüm rol oynayacağını vurğulayıb.

Azərbaycan.- 2009.- 19 iyul.- S. 4.