Azərbaycan ilə Avropa İttifaqı arasında ikitərəfli məsələlər müzakirə olunmuşdur

İyulun 20-də Azərbaycanın xarici işlər naziri Elmar Məmmədyarov İsveç Krallığının xarici işlər naziri Karl Bildtin başçılıq etdiyi Avropa İttifaqı "Üçlüyü"nün (Troyka) nümayəndə heyəti ilə görüşmüşdür.

Ölkəmizə səfərindən məmnunluğunu bildirən qonaq Avropa İttifaqı (Aİ) ilə Azərbaycan arasında əlaqələrin dinamik inkişaf etdiyini və bunun müxtəlif sahələrdə öz əksini tapdığını demişdir. K.Bildt Aİ-nin regionda sabitliyin bərqərar olunmasında maraqlı olduğunu və Ermənistan-Azərbaycan, Dağlıq Qarabağ münaqişəsinin həllinə dair ATƏT-in Minsk qrupu çərçivəsində aparılan danışıqlar prosesini dəstəklədiyini vurğulamışdır.

E.Məmmədyarov Avropa Qonşuluq Siyasətinin ardınca Şərq tərəfdaşlığı proqramını Azərbaycan ilə Aİ arasında münasibətlərdə yeni mərhələ kimi qiymətləndirmiş, bu layihə vasitəsilə əlaqələrin daha da intensivləşəcəyinə və daha praktik nəticələrin əldə ediləcəyinə ümidvar olduğunu demişdir.

Nazir Ermənistan-Azərbaycan, Dağlıq Qarabağ münaqişəsinin həlli ilə bağlı aparılan danışıqlar prosesi və problemin həlli məsələsində ölkəmizin mövqeyi barədə ətraflı məlumat vermişdir.

Görüşdə Xəzər dənizi bölgəsindən enerjidaşıyıcılarının Avropaya nəqli, azad ticarət rejiminin tətbiqi, Dünya Ticarət Təşkilatına Azərbaycanın qəbul edilməsinə Aİ tərəfindən dəstək, viza rejiminin sadələşdirilməsi, təhsil, demokratik islahatlar və digər qarşılıqlı maraq doğuran məsələlər müzakirə olunmuşdur.

* * *

Görüşdən sonra keçirilmiş birgə mətbuat konfransında müzakirə olunan məsələlər haqqında məlumat verilmişdir.

Nazir E.Məmmədyarov bildirmişdir ki, görüşdə, əsasən, Şərq tərəfdaşlığı proqramı çərçivəsində əməkdaşlıq və Ermənistan-Azərbaycan, Dağlıq Qarabağ münaqişəsinin həlli ilə bağlı məsələlər müzakirə edilmişdir.

Bundan əlavə, Azərbaycan ilə Aİ arasında siyasi dialoq, iqtisadi inkişaf, enerji təhlükəsizliyi, demokratiya və insan hüquqları sahələrində əməkdaşlığa dair fikir mübadiləsi olmuşdur.

Karl isə demişdir ki, Aİ "Üçlüyü"nün Azərbaycana səfərinin əsas məqsədi ikitərəfli əməkdaşlığa dair müzakirələr aparmaqdır. O vurğulamışdır ki, görüşdə Azərbaycan ilə Aİ arasında azad ticarət məsələləri də diqqət mərkəzində olmuşdur. Çünki burada azad ticarətlə bağlı sazişlər üçün yeni imkanlar yaranmışdır.

AzərTAc

Azərbaycan.- 2009.- 21 iyul.- S. 2.