Azərbaycan hökumətinin təşəbbüsü ilə BMT-nin Cenevrədəki ofisində Tasim layihəsi müzakirə olunmuşdur

Xarici İşlər Nazirliyinin mətbuat xidmətindən bildirmişlər ki, Azərbaycan hökumətinin təşəbbüsü ilə BMT-nin Cenevrədəki ofisində Transmilli Avrasiya Super İnformasiya Magistralı (TASİM) layihəsinə həsr olunmuş iclas keçirilmişdir. İclasa Azərbaycan Respublikasının BMT-nin Cenevrədəki bölməsində və digər beynəlxalq təşkilatlar yanında daimi nümayəndəsi, ölkəmizin İsveçrədəki səfiri Elçin Əmirbəyov sədrlik etmişdir.

Müzakirələrdə Azərbaycanın rabitə və informasiya texnologiyaları naziri Əli Abbasov, xarici işlər nazirinin müavini Mahmud Məmmədquliyev və Beynəlxalq Telekommunikasiya Birliyinin (BTB) baş katibi Həmədun Ture iştirak etmişdilər.

Nazir Ə.Abbasov Avrasiya regionu ilə yüksək səviyyəli informasiya-kommunikasiya texnologiyaları infrastrukturuna malik Qərbi Avropa və Sakit okean hövzəsinin ölkələri arasında mövcud boşluqların aradan qaldırılmasına xidmət edəcək TASİM layihəsi barədə geniş məlumat vermişdir. Nazir təklif olunan layihənin məqsəd və vəzifələrindən də danışmış, onun Minilliyin İnkişaf Məqsədlərinin vaxtında həyata keçirilməsinə töhfə verə biləcəyini bildirmişdir.

M.Məmmədquliyev TASİM layihəsi üzrə BMT Baş Məclisinin 64-cü sessiyasında irəli sürüləcək qətnamə ilə bağlı Azərbaycan hökumətinin planları və nəzərdə tutulan sənədin məqsədi barədə məlumat vermişdir.

BTB-nin baş katibi H.Ture TASİM layihəsi ilə bağlı Azərbaycan hökumətinin təşəbbüsünü alqışlamış və vurğulamışdır ki, bu layihə vasitəsilə Avrasiyada bağlantının yaradılması səyləri təqdirəlayiqdir.

Azərbaycanın nümayəndə heyəti Cenevrəyə səfəri çərçivəsində TASİM layihəsi ilə bağlı bir neçə ikitərəfli görüşlər də keçirmiş, o cümlədən Dünya İqtisadi Forumunun Avropa və Mərkəzi Asiya regionu üzrə direktoru Stefen Kinnok ilə görüşmüşdür.

AzərTAc

Azərbaycan.- 2009.- 21 iyul.- S. 3.