Əli Həsənov: "Biz beynəlxalq təşkilatların rəylərini nəzərə alırıq, amma öz yolumuzla gedirik"

"Azərbaycan cəmiyyətinə söz və mətbuat azadlığı lazımdır. Bu, Azərbaycan dövlətinin seçdiyi yolun mahiyyətini təşkil edir. Biz beynəlxalq təşkilatların rəylərini nəzərə alırıq, amma öz yolumuzla gedirik".

Bu sözləri Azərbaycan Prezidenti Administrasiyasının ictimai-siyasi məsələlər şöbəsinin müdiri Əli Həsənov bəzi beynəlxalq qurumların nümayəndələrinin Azərbaycanda mətbuat azadlığına qarşı təzyiqlərin olması ilə bağlı iddialarını şərh edərkən demişdir. Əli Həsənovun sözlərinə görə, Azərbaycan üzv olduğu beynəlxalq təşkilatların tövsiyələrini həmişə nəzərə alır.

Lakin təəssüflər olsun ki, bu qurumların yanaşmasında subyektiv mülahizələr əsasında çıxarılmış rəylər üstünlük təşkil edir. Onların istifadə etdikləri qiymətləndirmənin metodologiyası bizdə şübhəli assosiasiya yaradır. Belə rəylərin obyektiv olmadığını qarşı tərəfin diqqətinə çatdırsaq da, bu tipli rəylərin səslənməsi davam edir. Bütün bunlar isə Azərbaycanı təsir altında saxlamaq məqsədi daşıyır.

AzərTAc

Azərbaycan.- 2009.- 21 iyul.- S. 3.