Aqrar sahədə dövlət lizinq şirkətlərinin maddi-texniki
bazasının möhkəmləndirilməsinə
əlavə dəstək verilməsi barədə
Azərbaycan Respublikası Prezidentinin
Sərəncamı
Son illər əhalinin ərzaq
təhlükəsizliyinin təmin edilməsi məqsədilə
kənd təsərrüfatı məhsulları
istehsalının yüksəldilməsi, məhsul
istehsalçılarının maddi marağının
artırılması və bütövlükdə aqrar-sənaye
kompleksinin inkişaf etdirilməsi istiqamətində geniş və
məqsədyönlü tədbirlər həyata
keçirilmiş, kənd təsərrüfatında məhsul
istehsalının dinamik inkişafının təmin edilməsi
üçün əsaslı zəmin
yaradılmışdır.
2008-ci ildə dövlətin
maddi dəstəyi ilə "Aqrolizinq" Açıq Səhmdar
Cəmiyyətinin yerli qurumlarının maddi-texniki
bazasının möhkəmləndirilməsi
üçün bir sıra tədbirlər həyata
keçirilmiş və Cəmiyyətin sərəncamında
olan kənd təsərrüfatı texnikasının,
texnoloji avadanlıqların və mineral gübrələrin
saxlanılması şəraitinin
yaxşılaşdırılması üçün Şəki
və Sabirabad rayonlarında regional logistik bazaları
tikilmiş, 7 rayonda isə aqroservis filiallarında təmir-tikinti
və yenidənqurma işləri aparılmışdır.
Dövlət vəsaiti
hesabına güzəştli şərtlərlə kənd təsərrüfatı
məhsulları istehsalçılarına verilməsi
üçün alınan gübrələrin, kənd təsərrüfatı
texnikasının və avadanlığın kənd təsərrüfatı
məhsullarının istehsalçıları tərəfindən
səmərəli istifadə edilməsinin
asanlaşdırılması və istismara yararlı vəziyyətdə
saxlanılmasını təmin etmək məqsədi ilə
qərara alıram:
1. "Aqrolizinq"
Açıq Səhmdar Cəmiyyətinin aqroservis
filiallarının ölkəmizin regionlarında tikintisinin
davam etdirilməsi məqsədi ilə 2009-cu il dövlət
büdcəsində nəzərdə tutulmuş Azərbaycan
Respublikası Prezidentinin Ehtiyat Fondundan Cəmiyyətin nizamnamə
kapitalının artırılması üçün 5
(beş) milyon manat vəsait ayrılsın.
2. "Naxçıvan
Aqrolizinq" Açıq Səhmdar Cəmiyyətinin sərəncamında
olan gübrələrin və kənd təsərrüfatı
texnikasının saxlanılması üçün xüsusi
anbarların tikilməsi məqsədi ilə 2009-cu il dövlət
büdcəsində nəzərdə tutulmuş Azərbaycan
Respublikası Prezidentinin Ehtiyat Fondundan Naxçıvan Muxtar
Respublikasının Nazirlər Kabinetinə 2 (iki) milyon manat vəsait
ayrılsın.
3. Azərbaycan
Respublikasının Maliyyə Nazirliyi bu sərəncamın
birinci və ikinci bəndlərində nəzərdə
tutulmuş vəsaitin maliyyələşdirilməsini müəyyən
olunmuş qaydada təmin etsin.
4. Bu sərəncamı
və digər normativ hüquqi aktları nəzərə
alaraq Azərbaycan Respublikasının Əmlak Məsələləri
Dövlət Komitəsi və Azərbaycan
Respublikasının Vergilər Nazirliyi bir ay müddətində
"Aqrolizinq" Açıq Səhmdar Cəmiyyətinin nizamnamə
kapitalının artırılması ilə bağlı Cəmiyyətin
nizamnaməsində müvafiq dəyişikliyin edilməsi və
həmin dəyişikliyin qeydiyyata alınması
üçün öz səlahiyyətləri daxilində zəruri
tədbirləri həyata keçirsinlər.
5. Azərbaycan
Respublikasının Nazirlər Kabineti bu sərəncamdan irəli
gələn digər məsələləri həll etsin.
İlham ƏLİYEV,
Azərbaycan Respublikasının Prezidenti
Bakı şəhəri, 21 iyul 2009-cu il
Azərbaycan.- 2009.- 22 iyul.- S. 1.