Beynəlxalq konfransda əməkdaşlığın perspektivləri müzakirə edilmişdir

İyulun 21-də Bakıda Azərbaycan və Böyük Britaniyanın işgüzar dairələrinin iştirakı ilə beynəlxalq konfrans keçirilmişdir.

Konfransda hər iki ölkənin bank və maliyyə sektorunun nümayəndələri iştirak etmişlər. Azərbaycan Beynəlxalq Bankı (ABB) idarə heyətinin sədri Cahangir Hacıyev konfransı açaraq Böyük Britaniya şirkətlərinin Azərbaycanda həyata keçirdiyi irimiqyaslı investisiya layihələrinin ölkəmizin iqtisadi həyatındakı əhəmiyyətindən danışmış, bu ölkənin bank sistemindəki təcrübənin öyrənilməsinin mühümlüyünü vurğulamışdır.

London şəhərinin meri Alderman Yan Luder bu konfransın keçirilməsinin gələcəkdə maliyyə sahəsindəki əməkdaşlığın inkişafı üçün vacibliyini söyləmişdir: "Bu konfrans nəinki bizim dünənimiz və bugünümüz, həm də gələcəyimiz haqqındadır. Görülmüş və görüləcək işlər çoxdur". O bildirmişdir ki, Azərbaycan əsasən neft-qaz ölkəsi olmasına baxmayaraq, başqa sahələr də sərmayə yatırılması baxımından çox cəlbedicidir. Hazırda Azərbaycanda 150-yə yaxın Böyük Britaniya şirkəti fəaliyyət göstərir. Enerji sektorunda Azərbaycanın xüsusi rolunu xatırladan London meri başqa sahələrdə də eyni uğurun əldə olunacağına əminliyini bildirmişdir.

Daha sonra London Fond Birjasının Rusiya və MDB ölkələri üzrə baş meneceri Con Edvards, ABB idarə heyəti sədrinin müşaviri Faiq Məmmədov, Avropa Yenidənqurma və İnkişaf Bankının nümayəndəsi Fransis Deley, ölkəmizdə fəaliyyət göstərən müəssisə və biznes qurumlarının rəhbərləri Azərbaycanın bank və maliyyə sektoruna dair təqdimatlarla çıxış etmişlər.

Konfransda Böyük Britaniyanın ölkəmizdəki səfiri Karolin Braun, İqtisadi İnkişaf və Maliyyə nazirliklərinin nümayəndələri, yerli və xarici iş adamları iştirak edirdilər.

Azərbaycan.- 2009.- 22 iyul.- S. 4.