Azərbaycan Respublikası Prezidentinin
Sərəncamı
Azərbaycan Milli Elmlər
Akademiyasının Nəsirəddin Tusi adına Şamaxı
Astrofizika Rəsədxanasının maddi-texniki
bazasının gücləndirilməsi və təmir-tikinti
işlərinin aparılması məqsədi ilə ötən
ildən etibarən tədbirlərin həyata keçirilməsinə
başlanılmışdır. Bu sahədə müəyyən
işlər görülsə də, obyektin müasir tələblər
səviyyəsində tam yenidənqurulmasının başa
çatdırılması üçün əlavə maliyyə
vəsaitinin ayrılmasına zərurət
yaranmışdır.
Şamaxı Astrofizika Rəsədxanasının
maddi-texniki bazasının gücləndirilməsi, yenidənqurma
və təmir-tikinti işlərinin davam etdirilməsi məqsədi
ilə qərara alıram:
1. Azərbaycan Milli Elmlər
Akademiyasının Nəsirəddin Tusi adına Şamaxı
Astrofizika Rəsədxanasının maddi-texniki
bazasının gücləndirilməsi, yenidənqurma və təmir-tikinti
işlərinin davam etdirilməsi üçün Azərbaycan
Respublikasının 2009-cu ilin dövlət büdcəsində
nəzərdə tutulmuş Azərbaycan Respublikası
Prezidentinin Ehtiyat Fondundan 3,0 (üç) milyon manat vəsait
ayrılsın.
2. Azərbaycan
Respublikası Maliyyə Nazirliyi bu sərəncamın birinci bəndində
göstərilən vəsaitin Azərbaycan Milli Elmlər
Akademiyasının hesabına köçürülməsini
təmin etsin.
3. Azərbaycan
Respublikası Nazirlər Kabinetinə tapşırılsın
ki, bu sərəncamdan irəli gələn məsələləri
həll etsin.
İlham ƏLİYEV,
Azərbaycan Respublikasının Prezidenti
Bakı şəhəri, 21 iyul 2009-cu il
Azərbaycan.- 2009.- 24 iyul.- S.2.