Bakıda milli-mədəni identikliyin formalaşmasında milli elitanın rolu müzakirə olunmuşdur

Bakıda "İntellektual elita və milli-mədəni identikliyin formalaşmasında onun rolu" mövzusunda beynəlxalq simpozium keçirilmişdir.

Milli Elmlər Akademiyasının Fəlsəfə, Sosiologiya və Hüquq İnstitutunun, Avropa İnstitutunun və Rusiya Elmlər Akademiyasının Etnologiya və Antropologiya İnstitutunun, habelə "STMEQİ" Beynəlxalq Fondunun təşkil etdikləri forumda Azərbaycan, İsrail, Rusiya, ABŞ, Gürcüstan və Almaniyanın tanınmış mədəniyyət və incəsənət xadimləri, jurnalistlər, dövlət qurumlarının və ictimai təşkilatların nümayəndələri iştirak etmişlər.

Fəlsəfə, Sosiologiya və Hüquq İnstitutunun direktoru, professor İlham Məmmədzadə simpoziumu açaraq demişdir ki, elita konkret millətin özünəməxsus mədəniyyətinin qorunub saxlanılmasında böyük rol oynayır. 2009-cu il Azərbaycan elmi üçün əlamətdar olmuşdur.

Dövlət başçısı mayın 4-də "Azərbaycan Respublikasında 2009-2015-ci illərdə elmin inkişafı üzrə milli strategiya"nın və "Azərbaycan Respublikasında 2009-2015-ci illərdə elmin inkişafı üzrə milli strategiyanın həyata keçirilməsi ilə bağlı Dövlət Proqramı"nın təsdiq edilməsi haqqında sərəncamları imzalamışdır.

Mədəniyyət və turizm nazirinin müavini Sevda Məmmədəliyeva çıxışında demişdir: "Əlamətdar haldır ki, Şolom Aleyxem kimi görkəmli yazıçının yubileyi ölkəmizdə keçirilmişdir. Azərbaycanın mədəniyyət siyasəti milli özgürlüyün qorunub saxlanılmasına, milli azlıqların dəstəklənməsinə yönəlmişdir".

S.Məmmədəliyeva dövlətin mədəniyyət sahəsində siyasətinin ümummilli lider Heydər Əliyev tərəfindən müəyyən olunmuş ölkənin mədəni potensialının və irsinin qorunub saxlanılması, mədəni həyatın və innovasiyaların müxtəlifliyinin dəstəklənməsi ilə yanaşı, milli mədəniyyətin inkişafında varisliyin təmin olunması üçün ölkənin ayrı-ayrı regionlarının sakinləri və müxtəlif sosial qruplarının nümayəndələri üçün vahid mədəni məkanın, bərabər imkanların yaradılması, çoxmillətli dövlətdə mədəniyyətlərarası dialoq üçün şəraitin yaradılması və s. kimi strateji məqsədlərini vurğulamışdır. Bunların, əslində, hər birində millətin mədəni identikliyinin dəstəklənməsinin əhəmiyyəti sezilir. Azərbaycan dövləti mədəniyyətə xüsusi diqqət yetirir. Eyni zamanda, Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşmərəmlı səfiri, Milli Məclisin deputatı Mehriban Əliyevanın təşəbbüsü ilə bir sıra mühüm layihələr həyata keçirilir. Bu baxımdan onun muğamın inkişafı və təbliği sahəsində gördüyü işləri xüsusi vurğulamaq lazımdır.

Azərbaycanın həmişə öz impulslarını bütün dünyaya yayan bir ölkə olduğunu bildirən İsrail-Azərbaycan Beynəlxalq Assosiasiyasının sədri İosif Şaqal demişdir: "Mən bakılıyam. Uzun illər jurnalist işləmişəm. Azərbaycan jurnalistika məktəbinin yetirmələri Rusiya, İsrail, ABŞ, Almaniya və s. ölkələrdə aparıcı mövqe tuturlar. Onlar dövlətlərin milli-mədəni siyasətinə böyük təsir göstərir və bəzən hətta onu formalaşdırırlar. Tolerantlıq, yumor hissi, başqa mədəniyyətlərlə dialoqa girmək arzusu və buna hazır olmaq kimi xüsusiyyətlərə xas olan Azərbaycan jurnalistikasının fenomeni bundan qaynaqlanır".

Çıxışlarda bildirmişlər ki, elita millətin əsas mədəni identiklik elementlərinin populyarlaşmasında və qorunub saxlanılmasında müstəsna rol oynayır. Xüsusi vurğulanmışdır ki, Azərbaycan mədəniyyətlərarası dialoqa böyük əhəmiyyət verir, həmin dəyərlərin yayılması istiqamətində zəruri tədbirlər görür.

AzərTAc

Azərbaycan.- 2009.- 24 iyul.- S. 7.