Azərbaycanın
Baş naziri Artur Rasizadə iyulun 24-də ölkəmizdə
səfərdə olan Çexiyanın maliyyə naziri Eduard
Yanotanın başçılıq etdiyi nümayəndə heyətini
qəbul etmişdir.
Yüksək səviyyəli
qarşılıqlı səfərlərin ölkələrarası
münasibətlərə müsbət təsir göstərdiyini
vurğulayan Baş nazir Artur Rasizadə Azərbaycan ilə
Çexiya arasında siyasi, iqtisadi və mədəni sahələrdə
əlaqələrin gələcəkdə daha da inkişaf
etdirilməsinin zəruriliyini bildirmişdir. Sənaye, nəqliyyat,
humanitar sahələrdə, ümumiyyətlə,
iqtisadiyyatın müxtəlif istiqamətləri üzrə hər
iki ölkənin qarşılıqlı faydalı əməkdaşlığının
genişləndirilməsinin vacibliyini nəzərə
çatdıran Baş nazir bunun üçün hər
cür şəraitin olduğunu söyləmişdir.
Səmimi qəbula
görə Azərbaycanın Baş nazirinə təşəkkürünü
bildirən Eduard Yanota öz ölkəsinin regionda lider
dövlət olan Azərbaycanla hərtərəfli əməkdaşlığa
xüsusi maraq göstərdiyini bildirmişdir. İqtisadiyyatın
müxtəlif sahələrində, o cümlədən maliyyə
sektorunda əlaqələrin sürətli
inkişafını arzulayan qonaq demişdir ki, Bakıya ilk səfərinin
əsas məqsədi də azərbaycanlı həmkarları
ilə fikir mübadiləsi aparmaq və ölkələrimiz
arasında gələcək əməkdaşlığın
daha səmərəli təşkili üçün zəruri
hüquqi bazanın yaradılması üçün
lazımi sənədləri hazırlamaqdır.
Müvafiq hökumət
qurumları ilə apardığı danışıqlar barədə
Baş nazirə ətraflı məlumat verən Eduard Yanota hər
iki ölkənin maliyyə nazirlikləri arasında əməkdaşlıq
haqqında memorandumun imzalandığını bildirmişdir.
Görüşdə
qarşılıqlı maraq doğuran digər məsələlər
ətrafında da fikir mübadiləsi
aparılmışdır.
Azərbaycanın maliyyə
naziri Samir Şərifov qəbulda iştirak edirdi.
Azərbaycan.- 2009.- 25 iyul.- S. 5.