Respublika Hərbi
Prokurorluğunun mətbuat xidmətindən bildirmişlər
ki, qurumun idarə və şöbələrində, ərazi
hərbi prokurorluqlarında 2009-cu ilin birinci yarımilində
Azərbaycan Respublikasının hərbi prokurorluq orqanları
tərəfindən cinayətkarlığa qarşı
mübarizə, qanunçuluq və hüquq qaydasının
möhkəmləndirilməsi, insan və vətəndaş
hüquq və azadlıqlarının qorunması sahəsində
görülmüş işlərin vəziyyəti,
qarşıda duran vəzifələrin müzakirəsinə
həsr olunmuş əməliyyat müşavirələri
keçirilmişdir.
Azərbaycan
Respublikası Baş prokurorunun müavini - Azərbaycan
Respublikasının hərbi prokuroru, ədliyyə
general-leytenatı Xanlar Vəliyevin rəhbərliyi ilə
respublika Hərbi Prokrorluğunun idarə və şöbə
rəislərinin, tabe ərazi hərbi prokurorluqları
kollektivlərinin iştirakı ilə keçirilmiş əməliyyat
müşavirələrində 2009-cu ilin ötən
dövrü ərzində qanunçuluğun daha da möhkəmləndirilməsi,
dövlətçiliyimizin maraqlarının, insan hüquq və
azadlıqlarının müdafiəsi, cinayətkarlığa
qarşı mübarizə işinin real vəziyyəti,
mövcud nöqsanların, çatışmazlıqların
yaranma səbəbləri hərtərəfli, pirinsipial təhlil
edilmiş, "Prokurorluq haqqında" qanunda nəzərdə
tutulmuş fəaliyyət istiqamətləri üzrə, ilk
növbədə, istintaq, təhqiqat, dövlət
ittihamının müdafiəsi, vətəndaşların
müraciətlərinə baxılması işinin səmərəliliyinin
artırılması, tabe struktur qurumların fəaliyyəti
üzərində respublika Hərbi Prokurorluğunun nəzarətinin
daha da gücləndirilməsi, hərbi prokurorluq
orqanlarında xidməti, icra və hərbi intizamının
daha da möhkəmləndirilməsi üçün konkret tədbirlər
müəyyənləşdirilmişdir.
Əməliyyat
müşavirələrində, ilk növbədə,
xalqımızın ümummilli lideri Heydər Əliyev
strateji inkişaf konsepsiyasının
reallaşdırılması istiqamətində Azərbaycan
Respublikasının Prezdenti İlham Əliyevin rəhbərliyi
altında həyata keçirilən məqsədyönlü
və uğurlu tədbirlər nəticəsində 2009-cu ilin
ötən dövrü ərzində müstəqil
inkişafının yeni yüksəliş mərhələsini
yaşayan Azərbaycan Respublikasının sosial-iqtisadi
inkişafını daha da sürətləndirən, sivil və
hüquqi dövlətimizin qüdrətini daha da artıran,
xalqımızın həyat səviyyəsini əhəmiyyətli
dərəcədə yüksəldən uğurlu nəticələr
əldə etdiyi diqqətə
çatdırılmışdır.
Cari ilin iyul
ayının 24-də Azərbaycan Respublikasının Hərbi
Prokurorluğunda hərbi prokurorluğun rəhbər heyətinin
və ərazi hərbi prokurorlarının iştirakı ilə
keçirilmiş kollegiya iclasında ərazi hərbi
prokurorluqlarında keçirilən əməliyyat
müşavirələrinin nəticələri hərtərəfli
müzakirə olunmuş, tabe prokurorluqların əməkdaşları
tərəfindən qaldırılan və işin səmərəliliyinə
mənfi təsir göstərən problemlərin aradan
qaldırılması, işin səmərəliliyinin
artırılması baxımından həlli vacib məsələlərin
tənzimlənməsi istiqamətində qarşıda duran
konkret vəzifələr müəyyənləşdirilmiş,
respublika Hərbi Prokurorluğunun əlaqədar struktur
qurumlarına konkret göstərişlər verilmişdir.
Kollegiya iclasında hərbi
prokuror Xanlar Vəliyev qeyd etmişdir ki, Azərbaycan
Respublikasının Prezidenti, Ali Baş Komandan İlham Əliyevin
rəhbərliyi ilə həyata keçirilən məqsədyönlü
işlər nəticəsində 2009-cu ildə dövlət
müstəqilliyimiz daha da möhkəmlənmiş, demokratik,
hüquqi dövlət, vətəndaş cəmiyyəti
quruculuğu prosesi yeni mərhələyə qədəm
qoymuş, ölkənin inkişaf dinamikasında ciddi keyfiyyət
dəyişiklikləri baş vermiş, respublikamızın
beynəlxalq aləmə inteqrasiya prosesi daha da sürətlənmiş,
sosial-iqtisadi inkişaf sahəsində mühüm uğurlar əldə
edilmiş, qanunun aliliyinə xidmət edən mükəmməl
konsepsiyanın həyata keçirilməsində yeni mərhələnin
əsası qoyulmuşdur.
Həyatımızın
bütün sahələrində geniş vüsət alan
demokratik islahatlar ölkənin hüquq sistemini də əhatə
etmiş, Azərbaycanın ədliyyə, məhkəmə və
prokurorluq sisteminin inkişafı, müasirləşdirilməsi,
qanunun aliliyinin, insan hüquqlarının etibarlı təminatına
xidmət edən mütərəqqi islahatlar aparılaraq Azərbaycan
qanunvericiliyinin beynəlxalq standartlara
uyğunlaşdırılması istiqamətində
mühüm tədbirlər görülmüşdür.
Qeyd edilmişdir ki,
2009-cu ilin ən mühüm hadisələrindən biri də
Azərbaycan Respublikası Konstitusiyasına əlavələr
və dəyişikliklər edilməsi ilə bağlı
martın 18-də keçirilmiş referendum olmuşdur. Bu tədbir
yeni dövrün tələbləri ilə uzlaşan bir
sıra əlavə və dəyişikliklərin edilməsi,
insan və vətəndaş hüquq və
azadlıqlarına daha etibarlı təminat mexanizmlərinin
formalaşdırılması niyyətindən irəli gəlmişdir.
Azad, ədalətli və demokratik şəraitdə keçməklə
milli iradəni ifadə edən referendum, ilk növbədə,
Azərbaycanın demokratikləşmə və vətəndaş
cəmiyyəti quruculuğu yoluna sadiqliyini nümayiş
etdirmişdir.
Ədliyyə
general-leytenantı Xanlar Vəliyev dövlət və bələdiyyə
əmlakının və vəsaitlərinin idarə
olunması sahəsində korrupsiya ilə əlaqədar
hüquqpozmalara qarşı mübarizənin gücləndirilməsi
haqqında Azərbaycan Respublikası Prezidentinin 22 iyul 2009-cu
il tarixli fərmanının icrası ilə bağlı
prokurorluq orqanları qarşısında duran vəzifələrin
əhəmiyyətini vurğulamışdır. Hərbi
prokuror bildirmişdir ki, həmin fərman prokurorluq
orqanlarına dövlət səviyyəsində göstərilən
böyük etimadın təzahürü kimi dəyərləndirilməli,
cinayətkarlığa, o cümlədən ümumbəşəri
sosial bəla olan korrupsiya cinayətlərinə qarşı
mübarizənin gücləndirilməsi sahəsində
prokurorluğun rolunun müsbət qiymətləndirilməsi
kimi qəbul edilməlidir. Son illər Ali Baş Komandan cənab
İlham Əliyevin diqqət və qayğısı nəticəsində
ordunun maddi-texniki bazası əhəmiyyətli dərəcədə
möhkəmləndirilmiş, hərbçilərin sosial vəziyyətinin
yaxşılaşdırılması istiqamətində
mühüm addımlar atılmış və ordunun
döyüş qabiliyyəti yüksəlmişdir. Natiq şəxsi
heyətdə nizam-intizamın gücləndiyini və mənfi
halların xeyli aradan qaldırıldığını konkret
faktlarla diqqətə çatdırmışdır. Son 6 il ərzində
dövlət büdcəsində hərbi xərclərin həcmi
artaraq 2,3 milyard dollara çatmış, ölkənin
müdafiə potensialı 5 dəfədən çox
artmışdır.
Vurğulanmışdır
ki, cari ilin 6 ayında hərbi prokurorluq orqanları Silahlı
Qüvvələrdə hərbi nizamnamələrin tələblərinə
əməl edilməsi, hərbi qulluqçuların
hüquqlarının daha təminatlı müdafiəsi, hərbi
qurumlarda qanunçuluğun və hüquq qaydasının
möhkəmləndirilməsi sahəsində fəaliyyətini
daha da artırmış, ordu quruculuğuna mənfi təsir
edə biləcək bir çox cinayət hadisələrinin
üstü açılaraq təqsirli şəxslərin
cinayət məsuliyyətinə cəlb edilməsi təmin
olunmuş, digər təsirli tədbirlər də
görülmüşdür. Əvvəlki hesabat dövrü
ilə müqayisədə 2009-cu ilin birinci yarımilində
qeydə alınmış tabelik qaydası əleyhinə olan
cinayətlər, o cümlədən hərbi xidmətdən
yayınma, hərbi hissəni və ya xidmət yerini
özbaşına tərk etmə cinayətləri, fərarilik,
habelə qeyri-hərbi cinayətlərin sayı əhəmiyyətli
dərəcədə azalmışdır. Qeydə
alınmış cinayətlərin 98,6 faizi açılmışdır.
Törədilmiş bir sıra ağır və xüsusilə
ağır cinayətlərin açılması təmin
olunmuşdur.
Cinayət hadisələrinin
azalmasında hərbi prokurorluq orqanlarının Müdafiə
Nazirliyi, Dövlət Sərhəd Xidməti, Daxili Qoşunlar
və digər hərbi qurumlarla qarşılıqlı
sağlam və işgüzar əlaqələrin yaranması
və birgə müəyyənləşdirilmiş iş
planları əsasında görülmüş tədbirlərin
çox böyük əhəmiyyəti olmuşdur.
Xüsusi qeyd
edilmişdir ki, bütövlükdə respublikanın hərbi
birləşmələrində törədilmiş cinayət
hadisələri, xüsusilə hərbi xidmətdən
yayınma, o cümlədən fərarilik cinayətləri,
özünü öldürmə dərəcəsinə
çatdırma və başqa cinayətlər əhəmiyyətli
şəkildə azalsa da, qəsdən adam öldürmə
və tabeçilik münasibətləri olmayan hərbi
qulluqçular arasında qarşılıqlı münasibətlərin
nizamnamə qaydalarını pozma cinayətləri
artmışdır. Silahlı Qüvvələrdə bu
növ cinayətlərin qarşısının
alınması üçün müvafiq tədbirlər
görülür. Bu sahədə istər qanunla nəzərdə
tutulan tədbirlərin, istərsə də profilaktik məqsədlə
təbliğatın səmərəliliyi və intensivliyi artırılmalı,
müsbət nəticələr əldə olunması təmin
edilməlidir.
Xatırladılmışdır
ki, Heydər Əliyev Fondunun prezidenti, Milli Məclisin
deputatı Mehriban xanım Əliyevanın təşəbbüsü
ilə Azərbaycan Respublikası Milli Məclisinin "Novruz
bayramı münasibətilə amnistiya elan edilməsi
haqqında" 2009-cu il 17 mart tarixli qərarı respublika Hərbi
Prokurorluğu tərəfindən vaxtında həyata
keçirilmişdir.
Qeyd edilmişdir ki,
"Korrupsiyaya qarşı mübarizə haqqında"
qanunun və dövlət başçısı İlham Əliyevin
"Şəffaflığın artırılması və
korrupsiyaya qarşı mübarizə üzrə Milli
Strategiyanın təsdiq edilməsi barədə" 2007-ci il
28 iyul tarixli fərmanının həyata keçirilməsi
ilə əlaqədar hərbi prokurorluq orqanları mütəşəkkil
cinayətkarlığın ən təhlükəli təzahürlərindən
biri olan korrupsiya cinayətlərinə qarşı mübarizə
sahəsində öz fəaliyyətini daha da gücləndirmişdir.
Bu da əvvəlki illərə nisbətən cinayətkarlıqla
mübarizə sahəsində daha səmərəli nəticələrin
əldə edilməsinə, Silahlı Qüvvələrin
qüdrətini zəiflədə biləcək cinayətlərin,
o cümlədən mənimsəmə,
israfçılıq, rüşvətxorluq, vəzifədən
sui-istifadə etmə və digər cinayət hadisələrinin
vaxtında aşkar olunmasına, cinayət törətmiş
şəxslərin layiqli cəzaya məhkum edilməsinə
şərait yaratmışdır.
Diqqətə
çatdırılmışdır ki, görülmüş
müsbət işlərlə yanaşı, əməliyyat
müşavirələrində, həmçinin,
"Prokurorluq haqqında" qanunda nəzərdə
tutulmuş fəaliyyət istiqamətləri üzrə
işin səmərəliliyinə mənfi təsir göstərən
hallar da ətraflı təhlil olunmaqla, təhqiqatın təşkili
və ibtidai araşdırmaya prosessual rəhbərliyin həyata
keçirilməsində, cinayətkar hərəkətlər
nəticəsində hüquqi və fiziki şəxslərə
vurulmuş maddi ziyanın ödənilməsi, dövlət
ittihamının müdafiəsi, müraciətlərə
baxılması və vətəndaşların qəbulu ilə
əlaqədar işin təşkilində yol verilmiş
nöqsanlar və çatışmazlıqlar ciddi tənqid
olunmuş, bu kimi mənfi halların təxirə salınmadan
aradan qaldırılması üçün konkret göstərişlər
verilmişdir. Məlumat verilmişdir ki, hərbi prokurorluq
orqanları cinayətlər nəticəsində vurulmuş
maddi ziyanın 95,4 faizinin istintaq zamanı ödənməsini
təmin etmişlər. Bu, 2008-ci illə müqayisədə
37,6 faiz çoxdur. 2009-cu ilin birinci yarımilində Azərbaycan
Respublikasının hərbi prokurorluq orqanlarında vətəndaşların
969 müraciətinə baxılaraq, müsbət həllini
tapmış, 271 vətəndaş müxtəlif məsələlərlə
bağlı qəbul edilmişdir. Həmçinin hərbi
hissə və birləşmələrdə 245 nəfər qəbul
edilərək müraciətləri üzrə müvafiq qərarlar
qəbul olunmuşdur.
Xocalı,
Qaradağlı, Meşəli, Bağanis-Ayrım faciəsi,
terror, habelə əsir düşmüş şəxslərə
işgəncə verilməsi və erməni silahlı
qüvvələrinin törətdikləri digər cinayət
əməlləri Azərbaycan Respublikası CM-nin
soyqırıma görə məsuliyyəti nəzərdə
tutan 103-cü və digər maddələrinə tövsif
edilmiş, iş üzrə 282 təqsirləndirilən şəxs
barəsində axtarış elan edilmişdir. Hazırda cinayət
işi üzrə intensiv istintaq-əməliyyat tədbirləri
davam etdirilir.
Azərbaycan
Respublikası Prezidentinin 2008-ci il 27 sentyabr tarixli sərəncamı
ilə təsdiq edilmiş "Azərbaycan Respublikası
Prokurorluğunun fəaliyyətinin müasirləşdirilməsinə
dair 2009-2011-ci illər üçün Dövlət
Proqramı"nın icrası istiqamətində müvafiq
işlər görülmüşdür. Azərbaycan
Respublikası Baş prokuroru, I dərəcəli dövlət
ədliyə müşaviri Zakir Qaralovun əmri ilə
respublika Hərbi Prokurorluğunda kadrlar şöbəsi,
Ağır cinayətlərə dair işlər üzrə
istintaq idarəsinin tərkibində xüsusi istintaq
şöbəsi və maddi-texniki təminat şöbəsi
yaradılmışdır.
Hesabat dövründə
Hərbi Prokurorluğun fəaliyyət istiqamətləri
üzrə əhəmiyyət kəsb edən bir çox məsələlərlə
bağlı ümumiləşdirmələr
aparılmışdır ki, bu da mövcud problemlərin aradan
qaldırılmasına xeyli kömək etmişdir.
Hərbi
qulluqçuların hüquqi maarifləndirilməsi sahəsində
də müəyyən işlər
görülmüşdür. Hesabat dövründə
qanunvericiliyin öyrənilməsi ilə əlaqədar "Hərbi
prokurorluq orqanları ilə Silahlı Qüvvələrdə
hüquq qaydalarının, hərbi intizamın möhkəmləndirilməsi,
cinayət hadisələrinin xəbərdarlıq edilməsi və
aradan qaldırılması sahəsində" Müdafiə
Nazirliyi və respublika Hərbi Prokurorluğunun birgə tədbirlər
planına əsasən hərbi prokurorluğun əməkdaşları
müntəzəm olaraq hərbi hissələrdə olmuş,
hərbi qulluqçular qarşısında müxtəlif
mövzularda hüquqi maarifləndirmə işləri
aparmışlar.
Xidməti fəaliyyətində
fərqləndiklərinə görə 40 əməkdaş
Baş prokurorun və respublika hərbi prokurorunun əmri ilə
həvəsləndirilmişdir. Baş prokurorun əmri ilə
hərbi prokurorluğun bir işçisi prokurorluq
orqanlarından xaric edilmiş, respublika hərbi prokurorunun
müvafiq əmrləri ilə 5 işçi intizam məsuliyyətinə
cəlb olunmuşdur.
Hərbi prokurorluq əməkdaşlarının
iş şəraitinin yaxşılaşdırılması
üçün mərkəzi aparatın və ərazi hərbi
prokurorluqlarının inzibati binaları əsaslı surətdə
yenidən qurulmuşdur. Hazırda respublika Hərbi
Prokurorluğunun və Qazax Hərbi Prokurorluğunun inzibati
binalarının inşası davam etdirilir.
Məruzə ətrafında
çıxışlar olmuşdur. Kollegiyada
çıxış edən respublika hərbi prokurorunun
müavini Rasim Kazımov, Silahlı Qüvvələrin təhqiqat
orqanlarında və əsgər dustaqxanalarında
qanunların icrasına nəzarət şöbəsinin rəisi
Səfər Əhmədov, Lənkəran hərbi prokuroru
Oktay Ağayev, Qazax hərbi prokuroru Vaqif Quliyev hesabat
dövründə görülmüş işlərdən
danışmış, nöqsanların aradan
qaldırılması, qanunçuluğun möhkəmləndirilməsi,
insan hüquq və azadlıqlarının etibarlı
müdafiəsi, cinayətkarlığa qarşı səmərəli
mübarizənin təmin olunması ilə əlaqədar hərbi
prokurorluq orqanlarının qarşısında duran vəzifələrin
yerinə yetirilməsi üçün görüləcək
tədbirlər barədə ətraflı məlumat
vermişlər.
Respublika hərbi
prokuroru, ədliyyə general-leytenantı Xanlar Vəliyev
kollegiyaya yekun vuraraq əmin etmişdir ki, hərbi prokurorluq
orqanları Azərbaycan Prezidenti, Ali Baş Komandan İlham Əliyevin
prokurorluq orqanlarına göstərdiyi yüksək
qayğı və etimadı layiqincə doğrultmaq, qanunun
aliliyini, insan hüquqları və azadlıqlarının
etibarlı müdafiəsini, cinayətkarlığa
qarşı mübarizəni təmin etmək
üçün bütün zəruri tədbirləri bundan
sonra da dönmədən həyata keçirəcəklər.
AzərTAc
Azərbaycan.- 2009.- 26 iyul.- S. 8.