Amerika Azərbaycanlıları
Şəbəkəsi (U.S.Azeris Network-USAN) Dağlıq
Qarabağ problemi ilə bağlı ABŞ Prezidenti Barak
Obamaya məktub ünvanlamışdır.
Məqsəd
ABŞ-dakı ultra millətçi və radikal erməni
qüvvələrinin Ermənistan-Azərbaycan, Dağlıq
Qarabağ münaqişəsinin nizamlanması prosesində
aparılan danışıqlara dair spekulyasiyalarına son
qoymaqdır.
Məktubda
"Böyük səkkiz" liderlərinin son
görüşündə Barak Obamanın Rusiya və Fransa
prezidentləri ilə birgə verdiyi bəyanat, azərbaycanlı
və türkiyəli həmkarları ilə Dağlıq
Qarabağ münaqişəsi barədə telefon
danışığı, 2010-cu il büdcəsində xarici
yardım paketinin ədalətli təşkili yüksək
qiymətləndirilir. Həmçinin Birləşmiş
Ştatların Prezidentindən, vitse-prezident Cozef Bayden və
dövlət katibi Hillari Klintondan xahiş olunur ki, Azərbaycana
səfər edərək Dağlıq Qarabağ
münaqişəsinin yaratdığı faciəvi
reallıqlarla yerindəcə tanış olsunlar.
Məktubda deyilir:
"Bizim əsas arzumuz Azərbaycan torpaqlarının ərazi
bütövlüyü prinsipləri əsasında sülh
yolu ilə azad olunmasıdır. ABŞ-da olan icmamızın əsas
məqsədi isə Azərbaycan-ABŞ əlaqələrinin
genişləndirilməsi üçün hökumət
nümayəndələrini və millət vəkillərini
maarifləndirməkdir. Amerika azərbaycanlıları Azərbaycan
ilə ABŞ arasında uzunmüddətli strateji tərəfdaşlıq
münasibətlərini dəstəkləyir və Birləşmiş
Ştatlarla bütün türk dünyası ölkələrinin
ikitərəfli əməkdaşlığının dərinləşməsini
arzu edir. Bu baxımdan, yalnız neqativlik, nifrət və təhqir
üzərində qurulan ultra millətçi, maksimalist erməni
qruplarının kəsilməyən şikayətləri
fonunda biz Sizə tam dəstəyimizi təklif edirik".
Xatırladaq ki, qərargahı
Los-Ancelesdə yerləşən Azərbaycan-Amerika
Şurası da Dağlıq Qarabağ münaqişəsi ilə
bağlı bəyanatla çıxış etmişdir. Buna
səbəb isə bir müddət əvvəl
ABŞ-dakı Amerika-Erməni Milli Komitəsinin sədri Kennet
Kaçikiyanın qondarma Dağlıq Qarabağ
Respublikasının münaqişənin həllinə dair
danışıqlarda iştirak etməsi zərurəti barədə
Prezident Barak Obamaya məktub ünvanlaması olmuşdur.
AzərTAc
Azərbaycan.- 2009.- 26 iyul.- S. 8.