İyulun 27-də Azərbaycan
Prezidenti İlham Əliyev Bakıda aparılan abadlıq işləri
və yeni yolların tikintisi ilə tanış olmuşdur.
Prezident İlham Əliyev
əvvəlcə paytaxtın "Azneft" meydanından Bilgəh
qəsəbəsinə qədər olan yolun kənarlarında
aparılan abadlıq-quruculuq işləri ilə tanış
oldu.
Bakı şəhərinin
əsas magistrallarından biri olan Heydər Əliyev prospektində
aparılan yenidənqurma işləri, ilk növbədə,
bu yolda avtomobillərin rahat və sürətli hərəkətinə
imkan yaratmış, tıxacları aradan qaldırmış,
piyadaların təhlükəsizliyini təmin etmişdir.
Dövlətimizin
başçısının tapşırığına əsasən,
burada görülən genişmiqyaslı işlər ən
müasir standartlara cavab verir. Prospekt boyunca yerləşən
binaların fasadı zövqlə yenidən qurulur və bu
iş davam etdirilir. Yol boyu müasir işıqlandırma
sisteminin quraşdırılması, yaşıllıq sahələrinin
yaradılması da bu qəbildəndir.
Prezident İlham Əliyevin
"Azərbaycan Respublikası regionlarının sosial-iqtisadi
inkişafı ilə əlaqədar yerli əhəmiyyətli
avtomobil yollarının tikintisi və təmiri ilə
bağlı əlavə tədbirlər haqqında" 2005-ci
il 26 noyabr tarixli, həmçinin "Bakı şəhərində
nəqliyyat sisteminin təkmilləşdirilməsi üzrə
2006-2007-ci illər üçün Tədbirlər
Planı"nın təsdiq edilməsi haqqında"
2006-cı il 1 fevral tarixli sərəncamları, "Azərbaycan
Respublikasının avtomobil yolları şəbəkəsinin
yeniləşdirilməsinə və inkişafına dair
(2006-2015-ci illər) Dövlət Proqramı" bu sahədə
əsaslı islahatların aparılmasına geniş imkanlar
yaratmışdır.
Heydər Əliyev
prospektinin digər hissələrində də yenidənqurma
işləri davam edir. Hava limanı istiqamətində yolun
sağ və sol tərəflərində aparılan
abadlıq işləri diqqəti çəkir. "Bakı
şəhərinin qəsəbələrinin sosial-iqtisadi
inkişafının sürətləndirilməsinə dair Tədbirlər
Proqramı" isə bu sahədə daha genişmiqyaslı tədbirlərin
reallaşdırılmasına təkan vermişdir.
Prospekt boyu milli və
müasir memarlıq üslubunda inşa olunan tikililər
ornamentlərlə bəzədilmişdir. Bu tikililər, ilk
növbədə, yola xüsusi yaraşıq verməklə həm
də ölkəmizə gələn qonaqlarda xoş təəssürat
yaradır. Bütün bunlar bir daha təsdiqləyir ki,
paytaxtın yol-nəqliyyat kompleksinin yenidən qurulması Azərbaycan
Prezidentinin tapşırıqlarına müvafiq olaraq yeni mərhələyə
qədəm qoymuşdur.
Dövlətimizin
başçısı Sabunçu dairəsindən Bilgəh
qəsəbəsinə qədər çəkilən yeni
yolda aparılan tikinti işlərinin gedişi ilə də
maraqlandı. Bildirildi ki, bu yol hər iki istiqamətdə
dörd zolaqdan ibarətdir. Sabunçu dairəsindən Heydər
Əliyev adına beynəlxalq hava limanına gedən yol
artıq istifadədədir. Uzunluğu 6 kilometr 850 metr olacaq Mərdəkan
dairəsi-Heydər Əliyev adına beynəlxalq hava
limanı yolunda isə tikinti işləri davam edir. Bundan sonra
Mərdəkan-Bilgəh yolunun tikintisinə
başlanacaqdır. Heydər Əliyev adına beynəlxalq
hava limanı-Bilgəh yolunun üzərində üç yol
ötürücüsü, dörd piyada keçidi inşa
ediləcəkdir. Mərdəkan dairəsindən Zuğulbaya
gedən yolun uzunluğu 7 kilometr 650 metr, Zuğulba-Bilgəh
yolunun uzunluğu isə 4 kilometr 250 metr olacaqdır.
Prezident İlham Əliyevə
Bakıxanov qəsəbəsi, Zabrat, Buzovna, Mərdəkan və
Qala istiqamətində elektrik qatarlarının yollarında
aparılacaq yenidənqurma işləri haqqında da məlumat
verildi.
Bildirildi ki, yaxın gələcəkdə
bu dəmir yolu xəttinin sökülməsi, onun yerində
yeni magistral yolun çəkilməsi
planlaşdırılır. Bu da paytaxtın kənd və qəsəbələrinə
gediş-gəlişi asanlaşdıracaqdır. Bu yolda
iritutumlu avtobuslardan istifadə olunacaqdır.
Dövlətimizin
başçısı işlərin vaxtında və yüksək
keyfiyyətlə görülməsi ilə bağlı
tapşırıqlarını verdi.
AzərTAc
Azərbaycan.- 2009.- 28 iyul.- S. 1.
