Laçın Rayon İcra Hakimiyyətində cari ilin altı ayının yekunları müzakirə edilmişdir

Ağcabədi rayonundakı Taxtakörpü ərazisində yerləşən Laçın Rayon İcra Hakimiyyətində Prezident İlham Əliyevin sədrliyi ilə Nazirlər Kabinetinin 2009-cu ilin birinci yarısının sosial-iqtisadi yekunlarına həsr olunmuş iclasında dövlətimizin başçısının nitqindən irəli gələn vəzifələrə həsr olunmuş yığıncaq keçirilmişdir.

Rayon icra hakimiyyətinin başçısı Ramiz Cəbrayılov hesabat məruzəsində bildirmişdir ki, ötən dövr ərzində Taxtakörpü qəsəbəsində tikinti-abadlıq tədbirləri davam etdirilmiş, laçınlı məcburi köçkünlərin həyat şəraitinin yaxşılaşdırılması istiqamətində xeyli iş görülmüşdür. Qəsəbədəki Heydər Əliyev parkı genişləndirilmiş, əlavə olaraq 3 minədək ağac və kollar əkilmişdir. Dövlət Sosial Müdafiə Fondunun rayon şöbəsi, əhalinin sosial müdafiəsi və məşğulluq mərkəzləri üçün inzibati binaların tikintisi davam etdirilmişdir.

Sahibkarlığın inkişafı üçün yaradılmış şəraitin nəticəsi olaraq Taxtakörpü qəsəbəsində qənnadı, çörəkbişirmə, dülgər sexləri, ticarət və iaşə müəssisələri üçün binaların tikintisi davam etdirilir.

Hesabat dövründə Taxtakörpüdə və respublikanın digər ərazilərində məskunlaşmış laçınlı məcburi köçkünlərin elektrik enerjisi ilə bağlı problemlərinin həlli məqsədilə 3 ədəd transformator quraşdırılmış, 6 kilometr uzunluğunda elektrik xətti yenisi ilə əvəz edilmiş, 26 ədəd müxtəlif gücə malik transformator, 19 kilometr elektrik hava xəttində əsaslı və cari təmir işləri aparılmış, 28 dayaq yenisi ilə əvəz olunmuşdur.

Taxtakörpü ərazisində əhalinin içməli su təminatını yaxşılaşdırmaq məqsədilə 650 metr su xətlərində təmir işləri aparılmış, daxili su xəttinin 460 metri yenisi ilə əvəz olunmuşdur.

Məruzədə bildirilmişdir ki, 2008-ci ildə 2009-cu ilin məhsulu üçün 3026 hektar sahədə payızlıq əkin aparılmış, 9532,6 ton məhsul əldə olunmuşdur. Bu, ötən ilin müvafiq dövrünə nisbətən 405 ton çoxdur.

Məruzə ətrafında çıxış edənlər cari ilin ilk yarısında görülmüş işlərdən və qarşıda duran vəzifələrdən danışmışlar.

AzərTAc

Azərbaycan.- 2009.- 30 iyul.- S. 3.