Dövlətimizin
başçısına məlumat verildi ki, ötən əsrin
80-ci illərinin ortalarında istifadəyə verilən Fəvvarələr
meydanı uzun illər Bakının rəmzlərindən biri
olmuşdur. Lakin xeyli müddət təmir-bərpa işlərinin
görülməməsi burada yenidənqurma tədbirlərinin
başlanması zərurətini yaratmışdı. Bir
neçə ay bundan əvvəl başlanan yenidənqurma
işləri indi sürətlə davam etdirilir. Paytaxtın mərkəzindəki
bu meydanda əsaslı təmir işləri ən yüksək
səviyyədə görülür, ərazi tamamilə yenidən
qurulur.
Prezident İlham Əliyevin
Bakıda park və xiyabanların əsaslı təmiri və
yenidən qurulması ilə bağlı
tapşırıqlarına əsasən yenilənən Fəvvarələr
meydanı, ilk növbədə, paytaxt sakinlərinin istirahətinin
yüksək səviyyədə təşkilinə xidmət
edəcəkdir. Müasir tələblər səviyyəsində
qurulacaq və paytaxtın bu hissəsinin görkəminə
yaraşıq verəcək meydanda aparılan yenidənqurma
işləri zamanı orijinal görkəm saxlanılmaqla,
ümumi ansambla özəl elementlər və formalar da əlavə
ediləcək, yaşıllıq sahələrinə
xüsusi diqqət yetiriləcək, dekorativ bitkilər əkiləcək,
yeni oturacaqlar qoyulacaq, işıqlandırma sistemi
quraşdırılacaqdır.
Dövlətimizin
başçısı Fəvvarələr meydanında yenidənqurma
işlərinin yüksək səviyyədə və keyfiyyətlə
aparılmasına dair tapşırıqlarını verdi.
Prezident İlham Əliyev
daha sonra paytaxtın Nizami küçəsindəki tarixi
binalarda aparılan təmir-bərpa işlərinin gedişi
ilə də maraqlanmışdır.
Avropa və Şərq
memarlığının sintezi əsasında tikilmiş bu
nadir binalar Bakının təkrarsız görkəmə
malik müasir şəhərə çevrilməsində
mühüm rol oynamışdır. Lakin tarixi-memarlıq
abidələrinin bəzi
hallarda lazımınca
qorunmaması, onlardan bir çoxunun baxımsızlıq üzündən
yararsız hala düşməsi çoxəsrlik
memarlıq irsi ənənələrinə ciddi
xələl gətirirdi.
Prezident İlham Əliyevin "Azərbaycan
Respublikasının paytaxtı
Bakı şəhərində
tarixi-memarlıq abidələrinin bərpası
və qorunması haqqında" 2006-cı il 18 avqust tarixli
sərəncamı isə
bu sahədə əsaslı dönüş
yaratmışdır. Sərəncamla Bakı şəhərindəki
tarixi-memarlıq abidələrini milli-mədəni sərvət
kimi qoruyub saxlamaq, yetişməkdə
olan nəslin vətənpərvərlik ruhunda
tərbiyə olunmasında
onların rolunu gücləndirmək və
ölkəmizə gələn
çoxlu qonaqlar arasında lazımi səviyyədə təbliğini təmin etmək məqsədi ilə müvafiq qurumlara tapşırıqlar
verilmişdir. Hətta
paytaxtdakı tarixi-memarlıq abidələrinin
bərpası ilə bağlı Dövlət Proqramının layihəsi
də hazırlanmışdır.
Ərazi ilə
tanış olan dövlətimizin başçısına məlumat
verildi ki, paytaxtın mərkəzindəki bu qədim binalarda
aparılan təmir-bərpa işləri yüksək səviyyədə
həyata keçirilir. Binaların
orijinallığının qorunub saxlanılmasına
xüsusi diqqət yetirilir.
Dövlətimizin
başçısı gələcəkdə də tarixi abidələrin
qorunması ilə bağlı tapşırıqlarını
verdi.
AzərTAc
Azərbaycan.- 2009.- 30 iyul.- S. 1.
