İcmanın sədri,
Şuşa Rayon İcra Hakimiyyətinin
başçısı Bayram Səfərov
xatırlatmışdır ki, idarə heyətinin qurultaydan
sonra keçirilmiş iclasında üzvlər arasında vəzifə
bölgüsü aparılmış, onlara fəaliyyət sahələri
ilə bağlı təkliflər vermək
tapşırılmışdı. Artıq həmin təkliflər
əlaqələndirmə şurasında ümumiləşdirilmiş
və onların əsasında ilin sonunadək fəaliyyət
planı tərtib edilmişdir.
Əlaqələndirmə
şurasının sədri, Azərbaycan Müəllimlər
İnstitutunun beynəlxalq əlaqələr üzrə
prorektoru Mehdi Abdullayev iclas iştirakçılarını fəaliyyət
planı ilə tanış etmişdir. Plan müzakirə
olunduqdan sonra təkliflər nəzərə alınmaqla qəbul
edilmişdir.
Sənəddə idarə
heyətinin nəzdində ölkənin tanınmış
ziyalılarından ibarət məşvərətçi
qurumun yaradılması, ümumtəhsil məktəblərində
Qarabağla bağlı inşa, rəsm və musiqi müsabiqələrinin,
bilik yarışlarının, hərbi idman oyunlarının
keçirilməsi, xarici dillərdə kitablar nəşr
etdirilməsi, məqalələr yazılması, "dəyirmi
masalar" təşkil edilməsi, icma üzvlərinin sosial
problemlərinin müəyyənləşdirilməsi və həllinə
dair tədbirlər planının hazırlanıb müvafiq
dövlət qurumlarına təqdim edilməsi, xarici ölkələrin
Azərbaycanda, Azərbaycanın xarici ölkələrdə
akkreditə olunmuş səfirlikləri, Heydər Əliyev
Fondunun Rusiya nümayəndəliyi, Milli Məclisin AŞ
PA-dakı nümayəndə heyəti ilə əlaqələrin
gücləndirilməsi, erməni lobbisinin güclü
olduğu ölkələrdə fəaliyyətin
canlandırılması, BMT-nin və İslam Konfransı Təşkilatının
əlaqədar qurumları ilə əməkdaşlığın
yaradılması və s. məsələlər nəzərdə
tutulmuşdur.
İctimai birliyin
loqosunun tərtibi ilə bağlı Azərbaycan Rəssamlar
İttifaqına müraciət etmək qərara
alınmışdır.
İdarə heyətinin
üzvlərinə qurumun mətbu orqanının - jurnalın
təsis edilməsi və internet saytının
yaradılması ilə bağlı təşkilati işləri
sürətləndirmək
tapşırılmışdır.
AzərTAc
Azərbaycan.- 2009.- 28 iyul.- S. 3.