Azərbaycan
Respublikasının Prezidenti İlham Əliyev Küveytin
ölkəmizdəki fövqəladə və səlahiyyətli
səfiri Fəhd Saad Səid əl-Meyi diplomatik fəaliyyətinin
başa çatması ilə əlaqədar qəbul
etmişdir.
Dövlətimizin
başçısı Azərbaycan ilə Küveyt
arasında əlaqələrin uğurla inkişaf etdiyini
bildirdi. Küveytə rəsmi səfərini ikitərəfli
münasibətlərimizin gözəl təzahürü kimi
qiymətləndirən Prezident İlham Əliyev səfər
çərçivəsində əldə edilən
razılaşmaların və müzakirə edilən məsələlərin
gələcəkdə də Azərbaycan-Küveyt münasibətlərinin
inkişafına xidmət göstərəcəyinə əminliyini
vurğuladı. Dövlətimizin başçısı səfirin
Azərbaycanda diplomatik fəaliyyəti müddətində
ölkələrimiz arasında ikitərəfli münasibətlərin
möhkəmlənməsi işinə öz töhfəsini
verdiyini bildirdi və gələcək fəaliyyətində
ona uğurlar arzuladı.
Səfir Fəhd Saad Səid
əl-Mey Küveyt Dövlətinin əmiri Şeyx Sabah əl-Əhməd
əl-Cabir əs-Sabahın salamlarını dövlətimizin
başçısına çatdırdı. O, ölkəmizdəki
diplomatik fəaliyyəti müddətində səfirliyə
yaradılan şəraitə görə Azərbaycan Hökumətinə
və şəxsən Prezident İlham Əliyevə minnətdarlığını
bildirdi. Fəhd Saad Səid əl-Mey Azərbaycanda
üçillik fəaliyyəti dövründə sabitlik və
əmin-amanlığın yüksək səviyyədə təmin
edildiyinin şahidi olduğunu vurğulayaraq, ölkəmizdəki
missiyasından məmnunluğunu bildirdi.
Dövlətimizin
başçısı Küveyt əmiri şeyx Sabah əl-Əhməd
əl-Cabir əs-Sabahın salamlarına görə minnətdarlığını
bildirdi, onun da salamlarını Küveyt Dövlətinin
başçısına çatdırmağı xahiş
etdi.
AzərTAc
Azərbaycan.- 2009.- 31 iyul.- S. 1.