Prezident İlham Əliyev Nəriman Nərimanov prospektindəki parkın, Nərimanovun abidəsinin əsaslı təmir və yenidənqurmadan sonrakı vəziyyəti ilə tanış olmuşdur

Azərbaycan Respublikasının Prezidenti İlham Əliyev iyunun 3-də Bakının Nəriman Nərimanov prospektindəki parkın, Nərimanovun abidəsinin əsaslı təmir və yenidənqurmadan sonrakı vəziyyəti ilə tanış olmuşdur.

Prezident İlham Əliyevin Bakı şəhərində parkların və xiyabanların əsaslı surətdə bərpa olunması ilə bağlı tapşırıqlarına əsasən paytaxtımızda daha bir park - Nəriman Nərimanov prospektindəki park da müasir standartlara uyğun yenidən qurularaq istifadəyə verilmişdir. Baxımsızlıq üzündən tamamilə yararsız vəziyyətə düşən bu parkda əvvəllər əhalinin istirahəti üçün demək olar ki, heç bir şərait yox idi. Oturacaqlar sınıb-dağılmış, yaşıllıq zolaqları korlanmış, beton örtüyü və üzlük plitələr dağılmışdı. 1972-ci ildə salınan bu parkda o vaxtdan bəri bərpa və yenidənqurma işləri aparılmamışdı. Nəriman Nərimanovun elə həmin il ucaldılmış abidəsinin postamenti də keyfiyyətini tamamilə itirmişdi.

Dövlətimizin başçısının tapşırıqlarına əsasən 2008-ci ilin iyulunda parkın əsaslı bərpa və yenidən qurulması işlərinə başlanılmışdır. Qısa vaxt ərzində həyata keçirilən yenidənqurma və bərpa işləri nəticəsində parkın siması bütünlüklə dəyişmiş, müasir standartlara uyğun şəkildə qurulan bu istirahət guşəsi yenidən sakinlərin istifadəsinə verilmişdir.

Prezident İlham Əliyev parkın əsaslı bərpa və yenidənqurmadan sonrakı vəziyyəti ilə yaxından tanış oldu. Dövlətimizin başçısına məlumat verildi ki, bərpa və yenidənqurma işləri nəticəsində bu park ən müasir standartlara uyğunlaşdırılıb. Parkın beton örtüyü və köhnə üzlük plitələr yeniləri ilə əvəz olunub, yaşıllıq zolaqları təzədən salınıb, müasir oturacaqlar quraşdırılıb, əkilmiş ağac və gül kolları parka xüsusi yaraşıq verir.

Parkda quraşdırılmış avtomatlaşdırılmış sistem yaşıllıqların davamlı olaraq suvarılmasına xidmət edəcəkdir. Nəriman Nərimanovun abidəsinin postamentinə yeni qranit üzlük çəkilmişdir. Abidənin özü isə tam bərpa olunmuşdur. Burada parka xüsusi yaraşıq verən müasir fəvvarə inşa edilmişdir. Parkın işıqlandırma sistemi də təzələnmiş, işıq dirəkləri dəyişdirilmiş, yeni və keyfiyyətli lampalar quraşdırılmışdır. İndi bu lampalar gecələr ətrafı çıraqban edir. Parkın yaxınlığındakı binalarda da təmir və yenidənqurma işlərinin aparıldığı bildirilmişdir.

Dövlətimizin başçısı görülən işlərlə yaxından tanış olduqdan sonra parkın ətrafındakı binaların, o cümlədən yaşıllıqların hazırkı vəziyyəti ilə də maraqlandı. Prezident İlham Əliyev parkın ətrafındakı binaların və yaşıllıqların bərpası və yenidən qurulması ilə bağlı da layihə hazırlamağı tapşırdı və bununla əlaqədar müvafiq tövsiyələrini verdi.

AzərTAc

Azərbaycan.-2009.-4 iyun.-S.1.