Avropanın enerji təhlükəsizliyinin təminatında Azərbaycan mühüm rola malikdir

İyunun 3-də "Hyatt Regency-Naxçıvan" mehmanxanasında XVI Beynəlxalq Xəzər neft və qaz konfransı işə başlamışdır.

Konfransın ilk günü "Xəzər hövzəsinin ehtiyatları: kəşfiyyat, hasilat və investisiyalar" mövzusuna həsr olunmuşdur.

Əvvəlcə konfransa sədrlik edən İTE Group Plc-nin baş məsləhətçisi Endryu Vud və Azərbaycanın sənaye və energetika naziri Natiq Əliyev mötəbər tədbirin iştirakçılarını salamlamış, təşkilatçılar adından konfransın işinə uğurlar arzulamışlar.

Üç geniş iclasda "Enerji təhlükəsizliyi təminatında Xəzər regionunun rolu", "Xəzər regionunda kəşfiyyat və hasilat perspektivləri", "Azərbaycanın neft və qaz sektoruna investisiya qoyuluşu. Beynəlxalq əməkdaşlıq" mövzularında məruzələr dinlənilmişdir.

Bildirilmişdir ki, XVI Beynəlxalq neft-qaz sərgisi və konfransı böyük əhəmiyyətə malik hadisə və bütün dünyanın Azərbaycana artan marağının bariz nümunəsidir. Eyni zamanda, bu, Azərbaycanın mühüm neft-qaz hasilatçısı və ixracatçısına çevrilməsinin əyani sübutudur və ölkənin Avropanın enerji təhlükəsizliyinə böyük töhfə verdiyini göstərir. Artıq ənənəyə çevrilmiş sərgi-konfrans həm də neft-qaz sahəsində əməkdaşlığın gözəl nümunəsidir.

Tədbirdə çıxış edən Azərbaycanın sənaye və energetika naziri Natiq Əliyev qeyd etmişdir ki, bəzi proqnozlara görə, Xəzər regionunda 200 milyard barel həcmində neft ehtiyatı mövcuddur. Bu, Amerikanın mövcud neft ehtiyatlarına bərabərdir. Nazir bildirmişdir ki, 2015-2020-ci illərdə Azərbaycanın stabil neft hasilatı 65 milyon ton, qaz hasilatı isə 40 milyard kubmetr təşkil edəcəkdir.

Ölkədə neft-qaz sahəsinə yatırılan investisiyalardan danışan N.Əliyev diqqətə çatdırmışdır ki, Xəzərdə kəşfiyyat və hasilat işlərinə 10 il əvvəlki proqnozlara əsasən 200 milyard ABŞ dolları həcmində investisiya yatırılmalıdır. Lakin hazırkı şəraitdə investisiyaların həcmi göstərilən proqnozdan iki dəfə artıq ola bilər. Belə ki, Azəri-Çıraq-Günəşli yataqlar blokuna ilkin mərhələdə 8 milyard dollar sərmayə tələb olunduğu proqnozlaşdırıldığı halda, bu günədək həmin bloka 20 milyard dollar sərmayə yatırılmışdır.

Xəzərin enerji resurslarının nəqli ilə bağlı işlərin yüksək səviyyədə görüldüyünü diqqətə çatdıran nazir qeyd etmişdir ki, Azərbaycan tərəfi kəmərlərlə bağlı problemləri artıq həll etmişdir və ölkəmiz bütün istiqamətlərdə tranzit layihələri dəstəkləyir.

Konfransda ABŞ Prezidentinin Avrasiya enerji məsələləri üzrə xüsusi nümayəndəsi Riçard Morninqstarın, Almaniya Federal İqtisadiyyat və Texnologiyalar Nazirliyinin enerji siyasəti üzrə baş direktoru Detlef Daukun, Rusiyanın Energetika Nazirliyinin departament rəhbəri Stanislav Dorjinkeviçin, Polşanın İqtisadiyyat Nazirliyinin neft və qaz departamentinin baş eksperti Maçi Byavikin, Nobel Xeyriyyə Fondunun sədri Maykl Nobelin, Türkiyənin energetika və təbii ehtiyatlar nazirinin müavini Yusif Yazarın, ARDNŞ-in prezidenti Rövnəq Abdullayevin, "bp-Azərbaycan" şirkətinin vitse-prezidenti Qreqori Metsonun, "StatoilHydro-Azərbaycan" şirkətinin prezidenti Kristian Hauskenin, Böyük Britaniya Xarici İşlər Nazirliyinin Xəzər regionu enerjisi üzrə məsləhətçisi Anqus Millerin, KazMunayQaz şirkətinin prezidenti Kairgeldı Kabıldinin və digər ölkələrin rəsmi nümayəndələrinin, ayrı-ayrı şirkətlərin təmsilçilərinin məruzələri maraqla dinlənilmişdir.

Xalqımızın ümummilli lideri Heydər Əliyev tərəfindən işlənib hazırlanmış neft strategiyasının uğurla həyata keçirilməsi, bu görkəmli dövlət xadiminin böyük siyasi qətiyyəti və iradəsi nəticəsində Xəzərin Azərbaycan sektorunun karbohidrogen ehtiyatlarının xarici ölkələrin tanınmış şirkətləri ilə birgə istismarına dair 1994-cü ildə bağlanmış "Əsrin müqaviləsi"nin regionun iqtisadi və geosiyasi həyatında yaratdığı dəyişikliklər, siyasət dahisi Heydər Əliyevin adını daşıyan Bakı-Tbilisi-Ceyhan əsas ixrac neft boru kəmərinin işə salınmasının tarixi əhəmiyyəti barədə danışan natiqlər, gələcəkdə əməkdaşlığın daha da genişləndirilməsi barədə təkliflərini söyləmiş, fikir mübadiləsi aparmışlar.

Son illər Azərbaycanın həm də təbii qaz ixracatçısı kimi çıxış etməsi xüsusi vurğulanmış, Nabukko layihəsinin həyata keçirilməsində ölkəmizin önəmli rola malik olduğu qeyd edilmişdir.

Xüsusi vurğulanmışdır ki, artıq on altıncı dəfə keçirilən və ənənəyə çevrilmiş Bakı neft-qaz sərgi və konfransında bu il dünyanın 23 ölkəsini təmsil edən şirkətlərin 450 nümayəndəsinin iştirak etməsi bir daha sübut edir ki, Xəzər hövzəsi, onun karbohidrogen ehtiyatları bütün dünyanın diqqət mərkəzindədir.

Xarici ölkələrin və şirkətlərin təmsilçiləri Azərbaycan Prezidenti İlham Əliyevin sərginin açılış mərasimindəki nitqində səslənmiş fikirlərini yüksək qiymətləndirmiş, neft və qaz müqavilələrinin həyata keçirilməsində, neft gəlirlərindən şəffaf istifadə olunması, enerji təminatında vahid strategiyanın hazırlanması sahəsində Azərbaycanı bundan sonra da dəstəkləyəcəklərini bildirmişlər.

Konfrans iyunun 4-də işini davam etdirəcəkdir.

AzərTAc

Azərbaycan.-2009.-4 iyun.-S.4.