Dağlıq Qarabağ bölgəsinin azərbaycanlı icmasının fəaliyyətində yeni mərhələ başlayır

Dağlıq Qarabağ bölgəsinin azərbaycanlı icmasının qurultayı təşkilatın növbəti mərhələ üçün fəaliyyət istiqamətlərini, konkret vəzifələrini müəyyənləşdirdi. İcmanın həmtəsisçiləri, fəalları 1992-ci ildən indiyə qədər görülmüş işlərə nəzər salaraq ötən müddət ərzindəki fəaliyyətlərinin o qədər də səmərəli olmadığını qeyd etdilər. Bildirildi ki, təşkilat dünyanın ayrı-ayrı ölkələrində məskunlaşmış soydaşlarımız, diaspor təşkilatlarımız ilə əlaqələri genişləndirməli, Azərbaycan həqiqətlərinin beynəlxalq miqyasda daha geniş yayılmasına nail olmalıdır. Dağlıq Qarabağ bölgəsinin azərbaycanlı icmasının həmtəsisçisi, Milli Məclisin deputatı Elman Məmmədov qəzetimizin əməkdaşı ilə söhbətində icmanın indiyə qədər gördüyü işlərə, növbəti mərhələdə qarşıda duran vəzifələrə toxundu:

- Səmimi etiraf edirəm - icmanın bugünəqədərki fəaliyyəti qanedici deyil. Azərbaycanın üz-üzə qaldığı gərgin vəziyyəti, icmanın torpaqlarının işğal altında olmasını nəzərə alsaq, icmanın indiyə qədər gördüyü işləri ürəkaçan hesab etmək olmaz. Bu çatışmazlıqların isə bir sıra obyektiv səbəbləri var. Təşkilatın fəaliyyət göstərmək üçün nəinki qərargahı, heç adicə iş otağı da yoxdur. Belə bir təşkilatın normal fəaliyyət göstərməsi üçün ilk növbədə güclü təminat, müasir texnologiya tələb olunur. Biz yerimizi tədricən gənc kadrlara verməliyik. Dünyanın idarə edilməsində yaxından iştirak imkanlarına, qabiliyyətinə malik soydaşlarımızı icmaya cəlb etməliyik. Çünki onlar müasir dövrlə, proseslərin gedişi ilə ayaqlaşa bilirlər. Dağlıq Qarabağ bölgəsinin azərbaycanlı icmasının səmərəli fəaliyyət göstərməsi üçün zəruri olan şərtlər bunlardır. Qurultaydan sonra, növbəti mərhələdə qarşımızda olduqca ciddi vəzifələr durur. Ötən müddət ərzindəki fəaliyyətimizə ciddi nəzər salıb nöqsanlarımızı xatırlamalıyıq ki, gələcəkdə həmin səhvləri təkrarlamayaq.

- Qurultaydan sonra icmanın fəaliyyətində hansı yeniliklər gözlənilir?

- Yeni tərkibdə fəaliyyətə başlayacaq Dağlıq Qarabağ bölgəsinin azərbaycanlı icması növbəti mərhələdə qarşısına böyük vəzifələr qoyub və konkret işlər müəyyənləşdirib. Azərbaycan həqiqətlərinin dünyaya çatdırılması, ayrı-ayrı ölkələrdə Dağlıq Qarabağdan olan soydaşlarımızın mütəşəkkil təşkilatlanması, təbliğat tədbirlərinin, beynəlxalq konfransların təşkil edilməsi üçün bir sıra işlər görüləcək. Dünyanın siyasi səhnəsində güclü mövqeyə malik nüfuzlu dövlətlər və beynəlxalq təşkilatlarla əlaqələrin genilşlənməsində icmanın üzvü olan tanınmış ictimai-siyasi xadimlərin imkanlarından yetərincə istifadə ediləcək. Tam əminliklə deyirəm - icma yüksək səviyyədə təşkilatlanıb və növbəti mərhələdə səmərəli fəaliyyət göstərəcək. Təşkilat bütün soydaşlarımızın əlaqələrinin genişləndirilməsinə öz töhfəsini verəcəkdir. Çalışacağıq ki, icmanın işində ciddi dönüş yaradaq.

Dünyanın müxtəlif bölgələrində etnik qarşıdurmalar, münaqişə ocaqları mövcuddur. Biz onların nizamlama təcrübəsindən də qaynaqlanmalıyıq. Beynəlxalq təşkilatların nəbzini tutmalı, nüfuzlu qurumlarla əlaqələri daha da genişləndirməliyik. Eyni zamanda müasir tələblər səviyyəsində fəaliyyət göstərməyə müvəffəq olmalıyıq. Lazım gəldikdə sözümüzü güc vasitəsilə, adi vaxtlarda isə diplomatiya ilə deməli, mövcud reallıqla hesablaşmalıyıq. Dağlıq Qarabağ bölgəsinin azərbaycanlı icmasının növbəti qurultayının cəbhə xəttində, ərazisinin böyük hissəsi işğal edilmiş rayonlardan birində keçirilməsi məsələsi gündəmə gələcək.

Dağlıq Qarabağ bölgəsinin azərbaycanlı icmasının bütün üzvləri yurd həsrəti, ata-baba ocaqlarına qayıtmaq arzusu ilə yaşayırlar. İcmanın üzvləri ermənilərlə birgə yaşamaqdan heç vaxt imtina etməyiblər. Bu, indi də belədir. Erməni icması da bu reallığı dərk etməlidir.

Düşünürəm ki, növbəti mərhələdə Dağlıq Qarabağ bölgəsinin azərbaycanlı icmasının beynəlxalq birliklər, dünya ölkələri tərəfindən rəsmən tanınmasına nail olacağıq. İcma münaqişənin həlli yolunda bu gün aparılan siyasətin, yürüdülən ümummilli hərəkatın mühüm mərhələsində öz rolunu oynayacaq. Zənnimcə, beynəlxalq ictimaiyyət icmanın üzvləri ilə danışıqlar aparmağa hazırdır. Son günlər baş verən proseslər belə deməyə əsas verir. Dünya dövlətləri parlamentlərinin Dağlıq Qarabağ münaqişəsi nəticəsində Azərbaycanın üzləşdiyi problemlərini tədqiq etməsi, qaçqınların, məcburi köçkünlərin doğma yurd-yuvalarına qayıtmalarını dəstəkləməsi belə deməyə əsas verir.

Anar Rasimoğlu

Azərbaycan.-2009.-7 iyun.-S.3.