Dövlətçilikdə uğurlu siyasi varislik ənənəsi

Tarix sübut edir ki, zamanın nəbzini tutmağı, hadisələrə real qiymət verməyi, siyasi potensialını düzgün dəyərləndirməyi bacaran liderlər cəmiyyətdəki prosesləri məharətlə istiqamətləndirməyə nail olur, təmsil etdikləri xalqları zamanın ən güclü fırtınalarından, çətin sınaqlarından üzüağ çıxarır, milli xilaskara çevrilirlər. Müdrik və təcrübəli dövlət xadimləri ən ekstremal şəraitlərdə belə, mürəkkəb vəziyyətdən az itki ilə çıxış imkanına malik olmaqla optimal qərarlar qəbul edir, həyatını riskə atmaqdan belə çəkinmir. Bu nöqteyi-nəzərdən ulu öndər Heydər Əliyev də 40 illik siyasi fəaliyyəti dövründə üzləşdiyi bütün çətinlikləri, maneələri, problemləri, hətta uğursuzluqları mətinliklə dəf edən, məğlubiyyət sözünü yaxına buraxmayan, inamlı qərarları ilə milyonlarla insanın taleyində müstəsna rol oynayan millət fədaisi, sərkərdə və lider kimi xatırlanır.

Ümummilli lider şərəfli ömür yolu ilə xalqın çağdaş tarixinin fəxrlə anılan parlaq səhifələrini yazmışdır. Heydər Əliyevin tarixi xidmətləri, xilaskarlıq, quruculuq missiyası, həyata keçirdiyi siyasi, sosial-iqtisadi, mədəni və humanitar islahatlar haqqında indiyədək qələmə alınmış çoxcildli əsərlər, kitab və monoqrafiyalar, sanballı elmi məqalələr bu mənada həm də Azərbaycanın son 40 illik tarixinə elmi-politoloji baxışdır. Lakin bu da bir reallıqdır ki, tarixin axarını dəyişən böyük dühaların bəşəri ideya və prinsipləri, milli idarəçilik ənənələri, çoxqatlı siyasi gedişləri, adətən, zaman və məkanın fövqündə olur. Bu mənada, Heydər Əliyev tarixi epoxasını sözün qüdrəti ilə canlandırmaq, ulu öndərin milli maraq və mənafelərə söykənən genişmiqyaslı fəaliyyəti ilə bağlı dolğun təsəvvür formalaşdırmaq, şəxsiyyətinin miqyasını tam əhatə etmək çətindir.

Bu gün Heydər Əliyev dühası həyatının mənasını xalqa və dövlətə təmənnasız xidmətdə görən, həmin müqəddəs amal uğrunda ən çətin maneələrə, problemlərə mərdliklə sinə gərən millət atası kimi hər bir azərbaycanlının qəlbində yaşayır və dərin rəğbətlə yad edilir. Ulu öndərin əbədiyyətə qovuşmasından ötən zaman kəsiyi bizə bu fövqəlşəxsiyyətin çağdaş Azərbaycan və dünya tarixindəki yerini, rolunu daha dərindən başa düşmək, onun həyata keçirdiyi siyasətin mahiyyətini dərindən dərk etmək, qiymətləndirmək imkanı vermişdir.

Ümummilli lider Heydər Əliyevin hələ sağlığında əfsanəvi və xarizmatik şəxsiyyətə çevrilməsində onun millətinin mənafeyi naminə həyatını hər cür riskə atması, sözünü məqamında deməyi bacarması, milli ideallar uğrunda mübarizədə yüksək qətiyyət və prinsipiallıq göstərməsi kimi xarakterik xüsusiyyətləri mühüm rol oynamışdır. Məhz bu bütöv və prinsipial xarakteri sayəsində ulu öndər harada olursa-olsun, hadisələrin fövqünə qalxaraq idarəçilik qabiliyyətini reallaşdıra bilmiş, lider imicini qorumuşdur. Xalqa layiqli rəhbərlik missiyası onun xarakterindən, dünyagörüşündən, yaradıcılıq enerjisindən, qurub-yaratmaq həvəsindən mayalanmışdır.

Heydər Əliyev fenomeninin böyüklüyü həm də ümummilli liderin daim xalq qarşısında yüksək mənəvi və siyasi məsuliyyət hissi daşıması, ictimai inamı doğrultmaq üçün böyük səylə, əzmlə, vicdanla çalışması olmuşdur. Siyasətə ideyaların realizə vasitəsi kimi yanaşan ulu öndər bütün məsələlərdə daim ümumxalq mənafeyindən çıxış etmiş, hakimiyyətdə olduğu hər iki mərhələdə eyni əzmlə, həvəslə çalışmış, qarşıya qoyduğu hədəflərə yetişmək naminə bütün gücünü səfərbər etmişdir. Məhz bu keyfiyyətləri sayəsində Heydər Əliyev heç zaman kiçik qrupun, toplumun lideri olmamış, bütöv bir millətə, xalqa rəhbərlik etmək haqqını təmin etmişdir. Şəxsiyyət və lider kimi miqyasının böyüklüyü ona hələ sağlığında ümummilli liderlik zirvəsini fəth etmək imkanı vermişdir.

Siyasət insanları inandırmaq, müəyyən məqsədlər naminə səfərbər etmək vasitəsidir. Şəxsiyyətcə bütöv, milli və mütərəqqi olmayan liderlərin cəmiyyətin konsolidasiyası prosesinə nüfuz və təsir imkanlarından danışmaq da mümkün deyildir. Siyasi liderin etimad qazanmaq üçün seçdiyi vasitə nə qədər dürüst və saf olarsa, xalqın həmin şəxsiyyətə inamı bir o qədər güclü olar. Bəşər tarixinə möhürünü vurmuş fenomenal liderlər ilk növbədə toplum üçün cəlbedici və real görünən mütərəqqi ideyalarla öz cəmiyyətlərinin həmrəylik və bütövlüyünə, mənəvi birliyinə nail ola bilmişlər. Milli irs və düşüncə sistemindən qaynaqlanan bu ideyalar dərin məzmun yükü ilə cəmiyyətin təkamül prosesində, tərəqqisində və monolitliyində aparıcı amilə çevrilməkdən savayı, həm də tarixi şəxsiyyətlərə xalqı öz ətrafında birləşdirmək, milli ideallar ətrafında səfərbər etmək imkanı vermişdir.

Ulu öndər Heydər Əliyevin 1993-cü ilin iyununda xalqın təkidli tələbi və istəyi ilə hakimiyyətə qayıdışından sonra Azərbaycanda əldə edilmiş milli birlik respublikamızın ən qiymətli mənəvi-ideoloji sərvətlərindən biridir. Xalqın təhtəlşüurunda bütöv və milli şəxsiyyət kimi təcəssüm olunan Heydər Əliyev dühasının tarixi sınaq anında üzərinə düşən missiyanın öhdəsindən uğurla gəlməsi, sözün həqiqi mənasında, Milli Qurtuluşa nail olması da onun xalqla mənəvi birliyinin nəticəsi sayılmalıdır. Dövlətçiliyin taleyi baxımından ən ağrılı və çətin günlərdə xalq öz gələcəyini məhz inandığı, müdrikliyinə, idarəçilik səriştəsinə, siyasi fəhminə qəlbən güvəndiyi liderə - Heydər Əliyevə etibar etmiş, üzləşdiyi fəlakətdən onun rəhbərliyi altında xilas olacağına böyük ümid bəsləmişdir. Ulu öndər malik olduğu yüksək dövlətçilik və idarəçilik səriştəsi ilə çiyinlərini son dərəcə ağır bir yükün altına vermiş, məsuliyyətdən çəkinməmiş, əsl liderlərə xas bir şəkildə dövlətinin üzləşdiyi faciələrə biganə qalmamışdır.

Ümummilli lider Heydər Əliyev xalqın tələbi və istəyi, ozamankı AXC-Müsavat hakimiyyətinin acizanə xahişi ilə 1993-cü il iyunun 9-da Bakıya qayıtmağa razılıq verəndə respublikada silahlı vətəndaş qarşıdurması zəminində cərəyan edən proseslərin nə ilə nəticələnəcəyi çoxlarına bəlli deyildi. Tamamilə iflic vəziyyətinə düşən, kiçik silahlı qruplaşmaya belə müqavimət qabiliyyətini itirən, xalqın dəstəyindən məhrum olan, mövcudluğu formal mahiyyət kəsb edən bir hakimiyyətin sükanı arxasına keçmək, yaranmış acınacaqlı vəziyyətin aradan qaldırılması istiqamətində addımlar atmaq son dərəcə çətin, hətta mümkünsüz görünürdü. Buna baxmayaraq, hakimiyyətə qayıdan ulu öndər özünün müdrik və uzaqgörən addımları, birləşdiricilik, ən müxtəlif maraqları bir nöqtəyə gətirmək bacarığı sayəsində hakimiyyət böhranını aradan qaldırmış, qanunsuz silahlı qüvvələri zərərsizləşdirmiş, xaos və anarxiya mühitinin, özbaşınalığın aradan qaldırılması, ictimai-siyasi sabitliyin, qanunçuluğun təmini istiqamətində prinsipial addımlar atmışdır. Heydər Əliyevin qısa müddətdə vətəndaş sülhü və həmrəyliyinə, milli barışa nail olması, paralel olaraq respublikada tənəzzül prosesini dayandıraraq iqtisadi dirçəliş yönümündə praktik addımlar atması da məhz xalqın öz rəhbərinə olan dəstəyindən irəli gəlmişdir. Heydər Əliyev hakimiyyətinə - iqtidarda olan Yeni Azərbaycan Partiyasına sonsuz ictimai inam və etimad qarşılığında dövlətçiliyə diş qıcamış bir çox daxili və xarici qüvvələr məkrli niyyətlərindən əl çəkməyə məcbur olmuşlar.

Siyasi liderin gücü və qüdrəti onun elan etdiyi məqsəd və vəzifələrin, ideoloji prinsiplərin cəlbediciliyi ilə deyil, ilk növbədə, qarşıya qoyduğu vəzifələri real həyatda tətbiq imkanları ilə ölçülür. Ulu öndər Heydər Əliyev də təcrübəli dövlət xadimi və hakimiyyət ustası olaraq Azərbaycan xalqının milli mentaliteti və dünyagörüşü ilə uzlaşan, reallığa adekvat olan milli inkişaf strategiyası seçmiş, iqtisadi modernləşməyə və siyasi liberallaşmaya xidmət edən çoxşaxəli islahatlar həyata keçirmişdir.

Azərbaycan xalqının demokratik, hüquqi dövlətdə yaşamaq idealının real və dayanıqlı əsaslar üzərində gerçəkləşərək əbədiləşməsi məhz ümummilli lider Heydər Əliyevin adı ilə bağlıdır. Ulu öndərin idarəçiliyinin ikinci mərhələsində də qanunçuluğa, hüquq qaydalarına, ədalətə bağlı olması onun zəngin mənəviyyatından, demokratizmindən irəli gəlmişdir. Heydər Əliyevin müəllifliyi ilə hazırlanmış və 1995-ci ilin 12 noyabrında ümumxalq səsverməsi yolu ilə qəbul edilmiş ilk milli Konstitusiya Azərbaycanın unitar, demokratik və dünyəvi dövlət imicini təsbit etmiş, vətəndaş cəmiyyətinə, insan hüquq və azadlıqlarının prioritetliyinə əsaslanan islahatların əsasına çevrilmişdir. Məhz bu mərhələdən hüquq-mühafizə, məhkəmə sistemində mütərəqqi islahatların həyata keçirilməsinə başlanmış, qanunvericiliyin Avropa standartlarına uyğunlaşdırılması istiqamətində ardıcıl tədbirlər həyata keçirilmişdir. Respublikada əfvetmə institutunun bərpası, ölüm hökmü üzərində moratoriumun qoyulması, 1998-ci ildə bu hökmün birdəfəlik ləğv olunması, İnsan hüquqları üzrə Müvəkkil İnstitutunun (Ombudsman) yaradılması, hüquq-mühafizə orqanlarında dövrün tələblərinə cavab verən mütərəqqi islahatların aparılması - bütün bunlar məhz Heydər Əliyevin qətiyyətli addımları sayəsində gerçəkliyə çevrilmişdir. Eyni zamanda, Heydər Əliyev respublikamızın Avratlantik məkana sürətli inteqrasiyasına çalışmış, bu məqsədlə müxtəlif demokratik institutlarla, o cümlədən ATƏT, Avropa Şurası, Avropa Birliyi və s. təşkilatlarla əməkdaşlıq əlaqələri qurulmuşdur.

Hər bir siyasi liderin dövlətçilik məharəti onun ictimai inkişafın mövcud mərhələlərinə uyğun olaraq öz ardıcıllarının idarəçilikdə iştirakı formalarını müəyyənləşdirmək bacarığında müəyyən olunur. Güclü müstəqil dövlət yaradan Heydər Əliyevin Azərbaycan xalqı qarşısındakı ən mühüm xidməti də məhz bundan ibarətdir ki, ümummilli lider müəllifi olduğu ənənələrin davamlılığını təmin etmiş, dərin zəkası hesabına ölkəmizin gələcək uğurlarına təminat yaratmışdır.

Ulu öndərin hələ 2003-cü ilin prezident seçkiləri ərəfəsində "Mən ona özüm qədər inanıram" deməklə layiqli davamçısı kimi cəmiyyətə təqdim etdiyi cənab İlham Əliyevin respublikaya rəhbərliyi dövründə əldə olunmuş böyük nailiyyətlər Azərbaycan xalqının seçimində qətiyyən yanılmadığını tam təsdiqləyir. Bu gün respublikamız və onun istiqlaliyyəti üçün ən mühüm təminat faktoru odur ki, ümummilli lider Heydər Əliyevin bərqərar etdiyi güclü dövlətçilik xəttini uğurla davam etdirən yeni lider var. Dövlət başçısı böyük öndərdən təhvil aldığı ölkəni onun ideallarına sadiq qalaraq inkişaf etdirmək əzmindədir.

Cənab İlham Əliyevin 2008-ci ilin 15 oktyabr seçkilərində xalqın böyük rəğbət və etimadını qazanaraq ikinci müddətə Azərbaycan Respublikasının Prezidenti seçilməsi ilk növbədə onun cəmiyyətdə yüksək idarəçilik keyfiyyətlərinə malik lider kimi qəbul olunduğunu nümayiş etdirir. Seçicilərin 88,73 faizinin səsini toplayaraq qalib gəlməsi cənab İlham Əliyevin xalqın inandığı, etibar etdiyi lider olduğunu bir daha təsdiqlədi. Seçkilərdə iştirak edən digər namizədlərin isə heç biri 3 faizlik baryeri aşa bilmədi. Fərq böyük olduğundan qələbəni də böyük adlandırmaq olar. Amma bu, gözlənilməz deyildi - xalq öz səsini tanıdığına, sevdiyinə və inandığına verdi!

Prezident seçkiləri bir qayda olaraq konkret zaman intervalında həyata keçirilən siyasətin ictimai rəy tərəfindən adekvat dəyərləndirilməsi prosesi kimi xarakterizə edilir. Seçkilər ərəfəsində hakimiyyət xalqın və dövlətin mənafeyi naminə həyata keçirdiyi kompleks tədbirlər barədə hesabat verərək seçicilərin səsini qazanmağa çalışır. Bu mənada, cənab İlham Əliyevin son seçkilərdəki möhtəşəm zəfəri ilk növbədə ötən beş ildə ölkənin keçdiyi inkişaf yoluna verilən obyektiv ictimai qiymətdir. Dövlət başçısı bu müddətdə konseptual əsasları ümummilli lider Heydər Əliyev tərəfindən müəyyənləşdirilmiş islahatları uğurla davam etdirmiş və yeni çalarlarla zənginləşdirmişdir. "Əsl siyasət konkret, real iş görməkdən ibarətdir" - deyən dövlət başçısının ötən 5 ildə qəbul etdiyi fundamental qərarlar, imzaladığı sərəncamlar onun daim xalqın mənafeyindən çıxış etdiyini, habelə verdiyi vədlərin sırf əməli fəaliyyətə, praqmatizmə söykəndiyini, gerçəkliyə adekvat olduğunu göstərmişdir.

Azərbaycan Prezidenti İlham Əliyev zaman baxımından o qədər də böyük olmayan müddətdə cəmiyyətin bütün gözləntilərini gerçəkləşdirməyə çalışmaqla hər bir vətəndaşın marağına cavab verən, cəmiyyət həyatının müxtəlif sahələrində uğurlu nəticələrə yol açan çevik, qətiyyətli və düzgün qərarlar qəbul etmişdir. Cənab İlham Əliyevin həyata keçirdiyi məqsədyönlü siyasət nəticəsində son illər əldə etdiyimiz uğurlar da məhz bu amilə əsaslanır. Siyasi illüziyalardan, populizmdən uzaq olması, problemlərə rasional mövqedən və real situasiyadan yanaşması, praqmatizmi və yüksək idarəçilik keyfiyyətləri cənab İlham Əliyevin yetkin və peşəkar siyasətçi portretini formalaşdırır. Bütün bu keyfiyyətləri dövlət başçısının malik olduğu yüksək qətiyyət, intellekt, enerji, işgüzarlıq, novatorluq və birləşdiricilik məziyyətləri tamamlayır.

Mövcud siyasi kursun ictimaiyyət tərəfindən birmənalı dəstəklənməsini təmin edən ən başlıca amil məhz son beş ildə müstəqil Azərbaycanın əldə etdiyi inanılmaz sosial-iqtisadi nailiyyətlərdir. Ötən müddətdə ölkənin davamlı və sabit inkişafı baxımından vacib amil olan ictimai-siyasi sabitlik qorunub saxlanılmış, respublikamız iqtisadi inkişaf tempinə görə dünyanın lider dövlətləri sırasına yüksəlmiş, sosial problemlərin aradan qaldırılması istiqamətində ardıcıl addımlar atılmış, Azərbaycan Avropa geosiyasi arealında həyata keçirilən qlobal layihələrin təminatçısına çevrilmişdir. Bu gün ikinci elə bir dövlət tapmaq çətindir ki, son 5 ildə ümumi daxili məhsulun artım tempinə görə dünyada lider mövqeyini qoruyub saxlasın, qısa müddətdə büdcənin vəsaitlərini 10 dəfədən çox artıra bilsin.

İdarəetmə sisteminə novator düşüncə tərzi, dinamizm, müasirlik çalarları gətirən dövlət başçısı hər yeni il üçün hökumətin həyata keçirməli olduğu tədbirlərin əhatə dairəsini və vaxtını dəqiq müəyyənləşdirməklə onların icra prosesini şəxsi nəzarətdə saxlamış, habelə ölkənin strateji resurslarını milli inkişafa təkan verən qlobal layihələrin reallaşdırılması yönündə səfərbər etmişdir. Bu nöqteyi-nəzərdən son beş ildə regional inkişaf və qeyri-neft sektorunun inkişafı naminə həyata keçirilmiş tədbirləri xüsusi vurğulamaq olar. Bölgələrin tarazlı və davamlı inkişafının təmin olunması, yeni iş yerlərinin açılması, infrastrukturun yeniləşdirilməsi, mövcud problemlərin aradan qaldırılması məqsədilə imzaladığı dövlət proqramlarının, fərman və sərəncamların icrası vəziyyəti ilə yerindəcə tanış olmaq, sıravi vətəndaşlarla birbaşa ünsiyyət quraraq mövcud çətinliklər barədə informasiyaları ilkin mənbədən almaq üçün vaxtaşırı Azərbaycanın müxtəlif rayonlarına təşkil edilən səfərlər də cənab İlham Əliyevin prezidentlik fəaliyyətinin əsas istiqamətlərindən biri kimi diqqəti çəkir. Vətəndaşlarla birbaşa təmaslara üstünlük verən, özünəməxsus təmkin və sadəliklə onların problemlərini dinləyən və həlli üçün qəti tapşırıqlar verən dövlət başçısının bu addımları ictimaiyyət tərəfindən yüksək qiymətləndirilmiş, xalqın öz Prezidentinə olan inamını, etimadını daha da artırmışdır. 2003-2008-ci illərdə Azərbaycanın demək olar ki, bütün rayonlarına səfərlər edən, eləcə də Bakıətrafı kənd və qəsəbələrdə olan cənab İlham Əliyev insan amilinə necə yüksək dəyər verdiyini, bütün fəaliyyətində vətəndaşların maraq və mənafeyini, firavanlığını uca tutduğunu əməli olaraq təsdiqləmişdir.

Nazirlər Kabinetinin 2008-ci ilin sosial-iqtisadi yekunlarına həsr olunmuş iclası hökumətin qarşıya qoyduğu strateji hədəflərə doğru inamla irəlilədiyini bir daha təsdiqləməklə yanaşı, Azərbaycan iqtisadiyyatının bütün sahələrdə dinamik inkişaf etdiyini göstərir. İclasda inkişafın real təcəssümü kimi səslənən bir sıra statistik rəqəmlər respublikanın hərtərəfli inkişaf yolunda olduğunu nümayiş etdirir. 2008-ci ildə respublikada ümumi daxili məhsul istehsalı 10,8 faiz təşkil etmiş, ölkənin strateji valyuta ehtiyatları 18 milyard manata yüksəlmiş, ÜDM-in adambaşına düşən həcmi ötən illə müqayisədə 36,2 faiz artaraq 4440 manata, orta aylıq əməkhaqqı 268 manata çatmış, orta aylıq pensiya 100 manat civarında olmuşdur. Müqayisə üçün bildirək ki, 2003-cü ildə adambaşına düşən ÜDM cəmi 880, orta aylıq pensiya isə 17 dollar təşkil edirdi. Azərbaycanın dövlət büdcəsi 2003-cü ildə 1 milyard 200 milyon manat təşkil edirdisə, hazırda bu rəqəm 15 milyard manatdır. İnkişaf göstəriciləri quru statistik rəqəmlər olmayıb hər bir vətəndaşın sosial rifah halında, gündəlik həyat tərzində, yaşayışında həllini tapır. Azərbaycanın uğurlu tərəqqisini, paytaxtla yanaşı, bölgələrin də sürətlə inkişaf etdiyini, işsizlik, yoxsulluq kimi problemlərin aradan qalxdığını görən, böyük tikinti və quruculuq, abadlıq işlərini razılıqla qarşılayan ölkə vətəndaşları mövcud siyasi kursu birmənalı dəstəkləyir, onun davamlı olmasını istəyirlər.

Bütün bunlarla yanaşı, cənab İlham Əliyevin ikinci dəfə Azərbaycan Prezidenti seçilməsinin sadə, mahiyyətcə isə əsaslı və prinsipial səbəbləri var. Məsələnin "sadəliyi" onun hamı tərəfindən və birmənalı şəkildə qəbul edilməsindədir. Nədir o?

2008-ci il seçkilərinə qatılan 6 namizəddən (habelə nəticələrin onsuz da onların xeyrinə olmayacağını dəqiq bildiklərindən seçkiyə getməkdən qorxan radikal müxalifət partiyalarının digər namizədlərindən) cənab İlham Əliyevin çox böyük üstünlükləri var. Bu üstünlüklər təkcə onun yüksək intellekti, fitri istedadı və xüsusi qabiliyyəti, beynəlxalq aləmdə nüfuzu və təcrübəsində deyil. Ən öncə cənab İlham Əliyev Heydər Əliyevin siyasi kursunun ən layiqli davamçısıdır - bu kurs Azərbaycan xalqı üçün əsas, bəlkə də hər şey deməkdir. Məhz buna görə də 2003-cü ildə ulu öndərin vəsiyyətinə sədaqət göstərərək cənab İlham Əliyevə səs verdilər. Budəfəki seçkilərdə isə Heydər Əliyev siyasi kursunu alternativsiz yol kimi qəbul edərək həmin siyasətin ən layiqli davamçısı İlham Əliyevə böyük həvəs və istəklə səs verdilər. Həm müstəqil dövlətləri, həm özlərinin normal həyatı, həm də övladlarının gələcəyi naminə!

Başqa bir vacib məqam. Namizədlər sırasında yalnız cənab İlham Əliyev özünü əməli işdə göstərən və doğruldan, sözünün sahibi olan dövlət başçısı kimi sübut etmişdir. Ötən beş ildə onun tərəfindən qırxa qədər dövlət proqramı və onlara əlavələr imzalanmışdır. Həmin proqramlar ən müxtəlif sahələri əhatə etməklə bütövlükdə ölkənin sürətli və məqsədyönlü inkişafını təmin etdi. Bu siyasəti Azərbaycan xalqı gözəl anlayır, qəbul edir və davamlı olmasını istəyir. Həm də yaxşı bilir ki, həmin siyasəti - əslində Heydər Əliyev siyasi kursunu yalnız İlham Əliyev uğurla davam etdirməyə qadirdir. Üstəlik, o, verdiyi sözə daim əməl edir, heç zaman vədinə xilaf çıxmır. Digər namizədlər isə əməli işdə yoxlanmamışdır. Adətən, insan sınadığına inanır. Bir də sevdiyinə! İlham Əliyev beşillik fəaliyyəti dövründə xalqın sonsuz məhəbbətini qazandı. Müdrik siyasəti, Heydər Əliyev ideyalarına sədaqəti, təmkin və uzaqgörənliyi, bir də xalqına qədərsiz sevgisi ilə! Təbii ki, insan bir işi ürəklə, vurğunluqla görməsə, yüksək nəticəyə çata bilməz!

Qaçqın və məcburi köçkünlər xalqımızın ən çox köməyə və qayğıya ehtiyacı olan təbəqəsidir. Çox qısa müddətdə hər şeylərini itirmiş bu insanlar çaşqın vəziyyətdə, arxasız qalmışdılar. Xalqın arzu və tələbi ilə ulu öndər Heydər Əliyevin yenidən ölkə rəhbərliyinə qayıtması ilə onların da üzünə gün doğdu. Münasib sosial obyektlərdə yerləşdirildilər, daimi yardımla təmin olundular, hüquqları inamla qorundu, statusları dəqiq müəyyənləşdirildi. Məhz ilk dəfə olaraq ümummilli lider Heydər Əliyevin imzası ilə onlara yeni, müasir tipli qəsəbələr tikilməsi məqsədilə Dövlət Neft Fondundan vəsait ayrıldı. Sonra bu iş cənab İlham Əliyev tərəfindən ardıcıllıqla davam etdirildi.

Bu barədə möhtərəm İlham Əliyev özü belə deyir: "Məcburi köçkünlərin problemlərinin həlli üçün bu beş il ərzində görülən işlər göz qabağındadır. Mən məcburi köçkünlərlə çoxsaylı görüşlər zamanı onların problemlərinin həlli üçün səylərimi göstərmişəm, onlara söz vermişdim. Söz vermişdim ki, bir dənə də çadır şəhərciyi qalmayacaq və bu gün Azərbaycanda bir dənə də çadır şəhərciyi yoxdur. 2004-cü ildə qəbul edilmiş məcburi köçkünlərin yaşayış səviyyəsinin yaxşılaşdırılması və məşğulluğun artırılması Dövlət Proqramının uğurlu icrası bizim niyyətimizi, bizim siyasətimizi göstərir. 2007-ci ildə proqrama əlavələr edildi, əlavə vəsait nəzərdə tutulur. Son beş il ərzində 12 çadır şəhərciyi ləğv edilmişdir. Onların əvəzinə müasir binalar, müasir qəsəbələr salınmışdır. 36 yeni qəsəbə salınmış, onlarda 47 min nəfər məcburi köçkün məskunlaşdırılmışdır. Bu qəsəbələrdə 34 məktəb, 24 tibb məntəqəsi tikilib və insanların yaşaması üçün lazım olan digər tədbirlər görülübdür. Son beş il ərzində bu məqsədlər üçün 1 milyard dollar xərclənib, proqrama əlavələr hesabına əlavə minimum 500 milyon dollar xərclənəcəkdir. Bu vəsait də Azərbaycan Dövlət Neft Fondunun hesabına, Azərbaycan dövlətinin hesabına və yenə də deyirəm, Heydər Əliyevin neft siyasətinin hesabına yaradılır. Əgər bu olmasaydı, əgər Bakı-Tbilisi-Ceyhan neft kəməri işə düşməsəydi, Neft Fondunda pul olmazdı, heç Neft Fondu da olmazdı".

Aqressiv müxalifət partiyalarının öz namizədləri ilə budəfəki prezident seçkilərində iştirak etməmələrindən Azərbaycan xalqı və seçicisi heç nə itirmədi. Əksinə, prosesin müxtəlif mərhələlərində müəyyən müsbət məqamlar müşahidə olundu. Ən əvvəl, prezidentliyə namizədlərin irəli sürülməsi, təşviqat kampaniyası dövründə və səsvermə günündə nə icazəsiz mitinq keçirmək cəhdi oldu, nə də qanunsuz kütləvi aksiyalar yolu ilə polislə qarşıdurma yaradıldı. Təbii ki, mətbuatın bu mövzuya xüsusi və geniş yer ayırmasına, beynəlxalq qurum və təşkilatlara donoslar göndərilməsinə də ehtiyac qalmadı. Təşviqat kampaniyası da əsasən qalmaqalsız keçdi. Səsvermə günü isə prosesin sakit məcrada, sərbəst şəkildə, insanların fəallığı və ruh yüksəkliyi şəraitində təbii axarlığı ilə yadda qaldı. Səsvermə məntəqələrində "maraqlı müşahidəçilərin" süni qarşıdurma və əsəbi şərait yaratmaq, "saxta bülleten və protokol" barədə qəsdən yaradılan hay-küy, seçkidən sonra məğlubiyyətə uğrayan aqressiv müxalifət partiyalarının xaos və anarxiya doğurmaq niyyəti, vandallığı və hakimiyyəti zorla mənimsəmək cəhdi müşahidə olunmadı. Əksinə, seçkilərin ilkin nəticələri məlum olduqdan sonra Bakıda və respublikanın bir çox yerlərində çal-çağır, Yeni Azərbaycan Partiyası üzvləri ilə xalqın birgə şənliyi başladı. Musiqi səsi mahnı sədalarına, xalqın sevinci gənclərin rəqsinə qarışdı.

Sən demə, Azərbaycanda da normal - qarşıdurmasız, şər-böhtansız, çığır-bağırla beynəlxalq təşkilatları köməyə çağırmadan da seçki keçirmək olarmış! Sən demə, müxalifət partiyaları da seçkilərdə özlərini təmkinli və mədəni apara, mübarizələrini sivil qaydada təşkil edə bilərmişlər! Sən demə, məğlubiyyəti faciə kimi qarşılamağa, bundan "qəzəblənərək" iqtidara və xalqın, dövlətin mənafeyinə düşməncəsinə zərbə vurmağa çalışmağa ehtiyac yox imiş!

Bundan ötrü isə müxalifət normal müxalifət olmalı, qanunun aliliyinə və demokratik prinsiplərə hörmətlə yanaşmağı bacarmalıdır! Sivil siyasi münasibətlər sisteminin formalaşmasını dövlətin və xalqın mənafeyi tələb edir. Bu məqamda akademik Ramiz Mehdiyevin "Azərbaycan qloballaşma dövründə: inkişaf strategiyası" əsərindən bir fikri diqqətə çəkmək istəyirik: "Azərbaycan öz inkişafının elə bir mərhələsinə qədəm qoymuşdur ki, müxalifətin hakimiyyətlə qarşılıqlı münasibətləri, hakimiyyət uğrunda mübarizə yalnız sivilizasiyalı forma və üsullarla, dialoq, real şüarlar və daha cəlbedici sosial-iqtisadi proqramlar irəli sürmək yolu ilə aparıla bilər. Dəyənəklər, dəmir çubuqlar, daş-kəsək "proletariatın silahı" kimi tarixin arxivinə göndərilməlidir".

Əlbəttə, köhnə təfəkkürlü müxalifətin siyasi səhnədən silinib getməsi gözlənilən idi və çoxdan vaxtı çatmışdı. Xüsusən, 2003-cü ilin 15-16 oktyabr hadisələrindən sonra hazırkı iqtidarla zor dili ilə danışmağın, hakimiyyəti zorakılıqla ələ keçirməyin mənasızlığını və mümkünsüzlüyünü görənlər məğlubiyyətləri ilə barışaraq geri çəkilməliydilər! Üstəlik, onların real güc olmadıqlarını, xalqın dəstəyini tamamilə itirdiklərini, daha pozuculuq və qarışıqlıq törədə bilmədiklərini görən antiazərbaycançı qüvvələr də aqressiv müxalifətə daha bel bağlamayaraq onlara qrant ayırmaq, maliyyələşdirmək fikrindən vaz keçdilər. Beləliklə, pulsuz və dəstəksiz qalan, getdikcə parçalanaraq cılızlaşan ifrat radikal müxalifət bütün mümkün gələcəyini itirərək siyasi səhnəni acınacaqlı sonluqla tərk etdi.

Obyektivlik hissi və vicdanı olanlar gördüklərini səmimi etiraf etdilər. Əlbəttə, biz ideal seçki keçirildiyini söyləmək fikrində deyilik. Ümumiyyətlə, "ideal seçki" anlayışının mümkünlüyü də sual altındadır. Amma bir həqiqətdir ki, Azərbaycanda açıq, şəffaf, seçki qanunvericiliyinə uyğun səsvermə keçirildi. Bir dənə də olsun saxtakarlıq faktı aşkarlanmadı. Beynəlxalq qurum və təşkilatların əksəriyyəti bu gerçəkliyi etiraf etdilər, obyektiv rəylərini söylədilər. Qərəzlilər isə yenə də köhnə bayatılarını söylədilər. Amma heç bir konkret fakt, misal göstərmədən. Onların adını qəsdən çəkmirik. Çünki həqiqətin və xalqın iradəsinin yanında məkrlilərin mövcudluğu bilinmir. Əslində, qərəzli və mənfi rəylər obyektivlik selinin qarşısında dayana bilməyərək it-bata düşdülər.

Son prezident seçkilərinin nəticələrinə nəzərən bir daha təsdiqləndi ki, Azərbaycan cəmiyyəti Heydər Əliyevin zəngin dövlətçilik irsini ölkənin milli təhlükəsizliyinin, iqtisadi maraqlarının və siyasi sistemin sabitliyinin təmin edilməsinə yönələn mükəmməl siyasi konsepsiya kimi qəbul edir. Bu siyasəti ötən müddətdə yeni dövrün tələblərinə uyğun təkmilləşdirən dövlət başçısı İlham Əliyev əsl vətənpərvər və qurucu lider əzmi ilə xalq qarşısında verdiyi vədlərin böyük əksəriyyətini əməli işi ilə doğruldaraq hər bir vətəndaşın layiqli Prezidenti olduğunu sübuta yetirmişdir. Qarşıda isə Azərbaycanı cənab İlham Əliyevin rəhbərliyi altında çox böyük nailiyyətlər gözləyir.

Bəxtiyar Sadıqov

Azərbaycan.-2009.-9 iyun.-S.2.