Azərbaycanda Qətər Mədəniyyəti günləri keçirilir

Dünəndən Azərbaycanda Qətər Dövlətinin Mədəniyyət günləri keçirilir. Qətərin Mədəniyyət, İncəsənət və İrs Milli Şurasının baş katibi Mübarək bin Nasir əl-Xəlifənin rəhbərlik etdiyi nümayəndə heyəti Azərbaycanda müxtəlif tədbirlərə qatılacaq.

Bu gün Muzey Mərkəzində Qətər Mədəniyyəti günlərinin rəsmi açılış mərasimi keçiriləcək. Mərasimdə Qətər, onun adət-ənənələri haqqında qısametrajlı sənədli filmlərin nümayişi, təsviri sənət nümunələrindən ibarət sərginin təşkili nəzərdə tutulub. Muzeyin qarşısında ənənəvi Qətər çadırları qurulub, gəmidüzəltmə və xınaçılıq sənətlərinin nümayişi keçiriləcək, eləcə də dost ölkənin mətbəxinin ən gözəl nümunələri, xüsusi şirniyyatlar hazırlanacaq.

Mədəniyyət günlərində Qətərdən gəlmiş 60-a yaxın nümayəndə iştirak edir. Mədəniyyət günləri çərçivəsində Mirzə Fətəli Axundov adına Milli Kitabxanada Xalid Yusif əl-Dərbəşti tərəfindən Qətərdə investisiya qoyuluşu imkanları barədə mühazirə oxunacaq, R.Behbudov adına Mahnı Teatrında folklor rəqs qrupunun çıxışı olacaq. Nümayəndə heyəti eyni proqramla həm Mərdəkan qəsəbəsində, həm də Suraxanı rayonunda soydaşlarımızın qonağı olacaq.

Azərbaycanda keçirilən bu tədbirdə məqsəd hər iki ölkə arasında mədəni əlaqələrin daha da genişlənməsinə nail olmaqdır.

Azərbaycan.-2009.-9 iyun.-S.5.