Müsəlman Şərqi Azərbaycanın uğurları ilə fəxr edir

Azərbaycan dünya birliyinə uğurla inteqrasiya edən dövlətlərdəndir. Respublikamız milli irsini qoruyan, iqtisadiyyatını, elm və mədəniyyətini sürətlə inkişaf etdirən dünyəvi bir dövlət kimi beynəlxalq nüfuzunu gücləndirməkdədir. Məhz buna görə də dünya kütləvi informasiya vasitələrində artıq Azərbaycana xüsusi yer ayrılır, nailiyyətlərimiz diqqətlə izlənilir, araşdırılır və təbliğ edilir.

İordaniya jurnalisti Sudah Mərvan ərəb mətbuatında ölkəmizlə bağlı ərəb və rus dillərində mütəmadi çıxış edən yazarlardandır. Aşağıda dərc etdiyimiz yazını isə redaksiyamıza müəllif özü göndərib.

Hörmətli redaksiya!

Uzun müddətdir ki, İordaniya mətbuatında çalışıram. Biz Şərqdən doğan günəşin şəfəqləri altında sizin ölkənin uğurlarını aydın görür və bərq vuran qələbələrinizə qəlbən sevinirik. Mənim Azərbaycanla və azərbaycanlılarla tanışlığımın 30 illik tarixçəsi var. 1979-cu ildə rus dilini öyrənmək üçün SSRİ-yə gəlmişdim və Lomonosov adına Moskva Dövlət Universitetinin yataqxanasında qalırdım. Yaşadığımız bina qoşa lövbər salan gəmilərə bənzəyirdi və o zamankı sovet memarlığının ən gözəl nümunələrindən biri sayılırdı. Burada bir neçə minə yaxın tələbə və aspirant yaşayırdı. Onların arasında azərbaycanlılar da var idi. Bəziləri ilə tanış olmuşduq, salamlaşırdıq, yoldaşlıq edirdik. Bir dəfə İman adlı azərbaycanlı dostumla gəzintiyə çıxmışdıq. Zaqorski şosesində benzindoldurma stansiyalarından birinə od düşdüyünü gördük. Torpağın altındakı benzin çənlərinin bir anda partlayıb göyə sovrulmaq təhlükəsi var idi. Hamı hadisə yerindən qaçırdı və azəri dostum da qaçdı, amma hamının yüyürdüyü istiqamətə yox, odun-alovun içinə cumdu. Mən də bir an belə düşünmədən onun arxasınca atıldım. Biz təxminən bir saata qədər yanğını söndürməyə çalışdıq, stansiyada qalan bir neçə nəfərlə partlayışın qarşısını almaq üçün əlimizdən gələni etdik. Ölüm ayağımızın altındakı benzin çənlərində ləngər vururdu. Həyəcanlı anlar yaşadıq. Sonra əlavə kömək gəldi. Yanğının qarşısı çətinliklə alındı. Dostum isə mənə sadə bir söz dedi: "Gərək kimisə xilas etməyə tələsəndə öz ölümünü unudasan, bu haqda düşünməyəsən".

Mən onda İordaniya mətbuatında böyük maraqlı bir yazı ilə çıxış etmişdim. Bu hadisədən 30 il keçsə də azərbaycanlı dostumu unutmuram. Həm də bütün azərbaycanlıların belə mərd və fədakar olmasına inanıram.

Elə o vaxtdan bəri həm dostumla məktublaşır, həm də ki, Azərbaycan haqqında əksər xəbərləri izləyirəm. Sizin ölkə haqqında əməkdaşlıq etdiyim qəzetlərin əksəriyyətində müntəzəm çıxış etmişəm.

Keçmiş ittifaq dağıldıqdan sonra hadisələrin hansı məcraya yönələcəyini, respublikaların hansı istiqamətdə inkişaf edəcəyini demək çətin idi. Postsovet məkanındakı dövlətlərin bir çoxu ciddi iqtisadi çətinliklərlə üzləşir, böyük problemlərin həllində aciz qalırdılar. Lakin dünya şöhrətli bir insanın, dahi şəxsiyyət Heydər Əliyevin hakimiyyətə təkrar qayıdışından sonra ölkənizdə vəziyyət büsbütün dəyişdi, iqtisadiyyat dirçəldi, insanların həyatında dönüş yarandı, Azərbaycan addım-addım xaosdan stabilliyə, müharibədən sülhə yaxınlaşdı, dağılan postsovet dövlətləri sırasından ayrılaraq iqtisadi islahatların yoluna uğurlu qədəm qoydu, beynəlxalq aləmdə nüfuzunu gücləndirdi.

Müharibə şəraitində yaşayan bir dövlətin belə sürətlə iqtisadi islahatları həyata keçirməsi, xarici siyasətdəki davamlı qələbələri şəksiz ki, Heydər Əliyev kimi dahi liderin siyasi istedanının bəhrəsi idi. Axı 80-ci illərdə biz hələ Moskvada oxuyarkən onun digər Siyasi Büro üzvlərindən necə fərqləndiyini yaxşı bilirdik və onun Moskvada Brejnev komandasında ən güclü şəxsiyyət olduğunu bütün dünya etiraf edirdi.

Onun Azərbaycana qayıdışı tək Azərbaycan xalqının yox, bütün Şərqin qələbəsi idi. Biz sevinirik ki, ulu öndəriniz Heydər Əliyev irsinin, siyasi fəaliyyətinin layiqli davamçısı kimi Azərbaycan Respublikasının Prezidenti İlham Əliyev də ölkənizi bölgənin liderinə çevirdi.

Azərbaycanla İordaniya xalqları arasında doğmalıqlar mövcuddur: biz eyni dinin, eyni kökdən gələn milli adət və ənənələrin daşıyıcısı kimi bir-birimizə digərlərindən daha yaxınıq.

Təhsilimi başa vurub İordaniyaya qayıtdıqdan sonra dəfələrlə Moskvaya gəlmişəm və dövrü mətbuatı izləyəndə Azərbaycanın bütün respublikalardan fərqli inkişafının şahidi olmuşam. İndi bir çox nüfuzlu beynalxalq təşkilat və qurumların hesabatlarında ölkənizin lider elan olunmasına, Azərbaycanın dünya mədəniyyətinə və iqtisadiyyatına uğurlu inteqrasiyasına biz, Şərq mətbuatının təmsilçiləri kimi qürur hissi ilə yanaşırıq.

Mən beynəlxalq hadisələri mütəmadi izləyən qələm sahibi kimi deyə bilərəm ki, sizin ölkənin perspektivləri göründüyündən daha böyükdür. Bu perspektivlərin təməlini İlham Əliyevin uğurlu, stabil və praqmatik xarici siyasəti təşkil edir. Mən Azərbaycan haqqında İordaniya mətbuatında müntəzəm yazıram və sizin İordaniyadakı səfirliyin bir çox tədbirlərində iştirak edirəm. Elə bu yaxınlarda Azərbaycanın İordaniyadakı səfirliyində Heydər Əliyevin doğum gününə həsr olunmuş tədbirdə iştirak etdik, bizim paytaxtda ümummilli liderin adını daşıyan küçədə yenə də sərv ağacları əkilir. Heydər Əliyevin adının Əmməni şəhərinin ən yaraşıqlı küçələrindən birinə verilməsi, bizim bütün Şərqin liderinə və Azərbaycan xalqına olan ehtiramımızdan irəli gəlir.

Qafqazda ən sülhsevər dövlət Azərbaycandır, ən praqmatik və balanslaşdırılmış siyasəti yeridən də sizsiniz. Eyni zamanda çətin atəşkəs şəraitində yaşamağınıza baxmayaraq bölgədə sülhün inkişafı üçün bütün vacib addımları atır, beynəlxalq hüquq normaları çərçivəsində hərəkət edirsiniz. Azərbaycanın nailiyyətlərini öz uğurlarımız sayır və eyni zamanda olkələrimiz arasında mədəni, iqtisadi əlaqələrin getdikcə güclənməsinə sevinirik. Azərbaycan Respublikasının Prezidenti cənab İlham Əliyevlə İordaniya Haşimiyyə Krallığının Kralı əlahəzrət İkinci Abdullanı qırılmaz dostluq əlaqələri bağlayır. Bu əlaqələr xalqlarımızın da qarşılıqlı inkişafı və əməkdaşlığına təkan verir.

Hörmətlə,

Sudah Mərvan,

İordaniya, "Ər-Rəy" qəzetinin

beynəlxalq şərhçisi

Azərbaycan.-2009.-9 iyun.-S.5.