AzərTAc Azərbaycan həqiqətlərinin dünyaya yayılmasında mühüm rol oynayır

"Şərq-Qərb" nəşriyyatında "Qloballaşan dünyada informasiya hamı üçün" kitabı çapdan çıxmışdır. Azərbaycan, ingilis və rus dillərində çap olunmuş yeni nəşrdə 2008-ci il sentyabrın 1-dən 4-dək Bakıda keçirilmiş Asiya və Sakit okean Ölkələri Xəbər Agentlikləri Təşkilatı (OANA) İcraiyyə Komitəsinin 30-cu iclasının materialları, tədbir iştirakçılarının Azərbaycan Prezidenti İlham Əliyev tərəfindən qəbul olunmasına dair reportaj, ayrı-ayrı agentliklərin rəhbərlərinin səfər təəssüratları əksini tapmışdır.

Kitabın ön sözündə deyilir ki, bu iclasın AzərTAc-ın təklifi ilə Bakıda keçirilməsi beynəlxalq aləmə hərtərəfli inteqrasiya yolu seçmiş Azərbaycan Respublikasının ictimai həyatında mühüm hadisələrdən biri olmuşdur. Çünki ilk dəfə idi ki, 21 ölkənin milli informasiya agentliklərinin rəhbərləri və yüksək vəzifəli təmsilçiləri, o cümlədən OANA-nın hazırkı prezidenti, İndoneziyanın Antara agentliyinin baş icraçı direktoru Əhməd Muxlis Yusuf Azərbaycanın paytaxtına gəlmişdi. Eyni zamanda, Avropa Xəbər Agentlikləri Alyansının (EANA) prezidenti, Avstriyanın APA agentliyinin baş icraçı direktoru Volfqanq Vislozil, Bolqarıstanın BTA agentliyinin baş direktoru, Fransanın Frans-Press agentliyinin departament rəhbəri, habelə İordaniyanın PETRA agentliyinin nümayəndəsi Bakıda olmuşlar.

Azərbaycan həqiqətlərini dünyada geniş yaymağı fəaliyyətinin əsas istiqaməti kimi müəyyənləşdirən AzərTAc beynəlxalq əlaqələrinin genişləndirilməsinə xüsusi əhəmiyyət verir.

Azərbaycan Prezidenti İlham Əliyevin iclas iştirakçılarına ünvanladığı məktubda belə mötəbər tədbirin Bakıda təşkilinin əhəmiyyəti yüksək qiymətləndirilmişdir.

Kitabın növbəti səhifələrində tədbir iştirakçılarının Azərbaycan Prezidenti İlham Əliyev tərəfindən yüksək səviyyədə qəbul olunması, bu görüş zamanı informasiyanın müasir dövrdə rolu, dünya informasiya məkanında baş verən proseslər, insanlara dəqiq, düzgün, obyektiv informasiyanın çatdırılması üçün agentliklərin fəaliyyətinin düzgün qurulmasının istiqamətləri, ölkəmiz haqqında doğru, hər bir riyakarlıqdan uzaq məlumatların yayılması barədə aparılan fikir mübadiləsi, dövlətimizin başçısı tərəfindən verilən tövsiyələr öz əksini tapmışdır.

OANA İcraiyyə Komitəsinin Bakıda keçirilən iclasına həsr olunmuş məqalədə isə ölkəmizin baş informasiya agentliyinin beynəlxalq informasiya məkanında mövqeyini möhkəmləndirməsi, həm ayrı-ayrı dövlətlərin informasiya agentlikləri, həm də beynəlxalq informasiya təşkilatları ilə qarşılıqlı faydaya əsaslanan əməkdaşlıq münasibətlərinin qurulması istiqamətində son illər atılan addımlar barədə geniş məlumat verilir.

Nəşrdə OANA-nın prezidenti, Antara agentliyinin baş icraçı direktoru doktor Əhməd Muxlis Yusufun, EANA prezidenti, APA-nın icraçı direktoru Volfqanq Vislozilin, Azərbaycan Prezidenti Administrasiyasının Siyasi təhlil və informasiya təminatı şöbəsinin müdiri Elnur Aslanovun, İTAR-TASS-ın baş direktorunun birinci müavini Mixail Qusmanın, KYODO agentliyinin Beynəlxalq əlaqələr departamentinin icraçı direktoru Masaru Savanişinin, Anadolu agentliyi İdarə Heyətinin sədri və baş direktoru Hilmi Benginin, OANA Katibliyinin sədri - Antaranın baş direktorunun müavini Əhməd Hüseyninin, SİNXUA agentliyinin Xarici əlaqələr departamenti baş direktorunun köməkçisi Liu Yanqın, İRNA agentliyinin beynəlxalq əlaqələr üzrə direktoru Mortəza Geranqədrin, KUNA agentliyinin Beynəlxalq əlaqələr departamentinin direktoru İsam əl-Ruvayenin, YONHAP agentliyinin İnformasiya biznesi departamentinin baş direktoru Kim Çanq-Hoeinin, BERNAMA agentliyinin baş redaktoru Soo Heonqun, VNA agentliyinin Dünya xəbərləri departamentinin direktoru Nquyen Anh Tuanın, SANA agentliyinin Moskva bürosunun direktoru Fəhd Kamnakeçin, PETRA agentliyinin baş müxbiri Mövlüd Abdulla Riqaybatının, WAM agentliyinin İnformasiya texnologiyaları departamentinin müdiri Əhməd Nəcibin, "KABAR" agentliyinin direktoru Narın Ayıpın, KAZİNFORM agentliyinin prezidenti Dauren Diyarovun, MONTSAME agentliyinin baş direktoru Tuqalxuuqiyn Baasansurenin çıxışlarında informasiya agentlikləri arasında gələcək əməkdaşlığın istiqamətləri barədə rəy və təkliflər səslənmiş, tədbirin yüksək səviyyəli təşkilinə görə minnətdarlıq ifadə olunmuşdur.

Kitabda OANA İcraiyyə Komitəsinin iclası çərçivəsində təşkil olunmuş "Mədəniyyət", "Təbiət" və "İdman" nominasiyaları üzrə fotomüsabiqənin yekunları və qaliblərin mükafatlandırılması, tədbir iştirakçılarının Səngəçal terminalı və İçərişəhərlə tanışlığı, Heydər Əliyev Fondunda və Milli Azərbaycan Tarixi Muzeyində olmaları barədə məlumatlar da yer almışdır.

AzərTAc ilə Monqolustanın MONTSAME agentliyi arasında protokolun və Koreya Respublikasının YONHAP agentliyi arasında əməkdaşlıq və informasiya mübadiləsi haqqında müqavilənin imzalanması mərasimləri haqqında da məlumatların əksini tapdığı kitabda mötəbər beynəlxalq tədbirin iştirakçıları ilə AzərTAc-ın müxbirlərinin müsahibələrinə, Bakıda keçirilmiş iclasdan sonra vətənlərinə qayıdan qonaqların Azərbaycan və tədbirin təşkili haqqında fikir və rəylərinin əks olunduğu məqalələrə geniş yer verilmişdir. İstər müsahibələrdə, istərsə də məqalələrdə dünyanın müxtəlif informasiya agentliklərinin görkəmli mütəxəssisləri OANA İcraiyyə Komitəsinin 30-cu iclasının yüksək səviyyəli təşkilini, Bakıda olduqları dövrdə xalqımızın hədsiz qonaqpərvərliyinin, Azərbaycanın sürətli inkişafının şahidi olduqlarını qeyd edirlər.

Kitabda beynəlxalq forumun keçirildiyi dövrdə bu barədə dünyanın müxtəlif KİV-də verilmiş məlumatlar da əksini tapmışdır.

Çoxlu rəngli fotoşəkillərin verildiyi kitab yüksək poliqrafik keyfiyyəti və nəfis tərtibatı ilə diqqəti cəlb edir.

Azərbaycan.-2009.-10 iyun.-S.5.