Maltada Azərbaycanın milli bayramı münasibətilə rəsmi qəbul təşkil edilmişdir

İyunun 9-da Azərbaycanın İtaliyada, eyni zamanda Malta və San-Marinodakı səfirliyi tərəfindən 28 May - Respublika Günü ilə əlaqədar, ilk dəfə olaraq, Malta Respublikasında rəsmi qəbul təşkil edilmişdir.

Qəbulda Malta Respublikasının Prezidenti Corc Abela, nazirlər, parlament üzvləri, digər dövlət qurumlarının, biznes dairələrinin, elm mərkəzlərinin və yerli mətbuatın nümayəndələri, diplomatik korpusun təmsilçiləri iştirak etmişlər.

Mərasimi giriş sözü ilə açan Azərbaycanın Maltadakı səfiri Emil Kərimov Şərqdə ilk demokratik respublika olan Azərbaycan Xalq Cümhuriyyətinin yaranma tarixindən, mövcud olduğu qısa müddət ərzində fəaliyyətindən danışmış və ölkəmizin 71 il sonra yenidən müstəqilliyini bərpa edərək bu gün inamla və sürətlə inkişaf etdiyini qeyd etmişdir.

Səfir Azərbaycan ərazisinin 20 faizinin Ermənistan tərəfindən işğal edildiyini və 1 milyondan çox azərbaycanlının qaçqın və məcburi köçkün kimi öz torpaqlarından ayrı düşdüyünü xatırlatmış, buna baxmayaraq əsası ümummilli lider Heydər Əliyev tərəfindən qoyulmuş və Prezident İlham Əliyevin uğurla davam etdirdiyi müdrik siyasət nəticəsində ölkəmizin hazırda Cənubi Qafqazın lider dövlətinə çevrildiyini qeyd etmişdir.

Səfir E.Kərimov Azərbaycan ilə Malta arasında əlaqələrin daha da inkişaf etdirilməsi üçün böyük potensialın mövcudluğunu vurğulamış, bundan sonra da iki ölkə arasında dostluq və əməkdaşlığın dərinləşəcəyinə əmin olduğunu bildirmişdir.

Malta dövlətinin başçısı Corc Abela mərasimdə çıxış etmiş və milli bayram - Respublika Günü münasibətilə Azərbaycan xalqına və dövlətimizin başçısına ən xoş arzularını ifadə etmişdir.

Prezident Azərbaycanın ən qədim tarixə və çox zəngin mədəniyyətə malik olduğunu söyləmiş, Azərbaycanın dünya ədəbiyyatı və incəsənətinə böyük töhfələr bəxş etdiyini vurğulamışdır. Bu xüsusda o, Azərbaycan şairi və filosofu Nizami Gəncəvinin əsərlərinin dünya mədəni irsinin incilərindən olduğunu söyləmişdir.

Malta dövlətinin başçısı qeyd etmişdir ki, müxtəlif imperiyalar tərəfindən işğala məruz qalmasına baxmayaraq, Azərbaycan xalqının müstəqillik və dövlətçiliyin qorunması üçün qətiyyətinə valeh olmamaq mümkün deyildir.

Sonra Prezident ilk dəfə olaraq Maltada Azərbaycanın milli bayramı - Respublika Gününün qeyd edilməsinin ikitərəfli əlaqələrin daha da inkişaf etməsinə töhfə verəcəyinə ümid etdiyini bildirmiş və bir daha hər iki dost xalqa sülh və əmin-amanlıq arzulamışdır.

Çıxışlardan sonra Azərbaycan və Maltanın dövlət himnləri səsləndirilmişdir.

Qəbulda Azərbaycanla bağlı videofilm nümayiş etdirilmiş və səsləndirilmiş milli musiqimiz qonaqların xüsusi marağına səbəb olmuşdur.

Qonaqlara Azərbaycan mətbəxinin nümunələri və ölkəmiz haqqında kitab və suvenirlər də təqdim edilmişdir.

AzərTAc

Azərbaycan.- 2009.- 12 iyun.- S. 3.