Dövlət Proqramının icrası bölgələrin hərtərəfli yüksəlişini təmin edib

Dünyanı bürümüş maliyyə və iqtisadi böhran, düzdür, Azərbaycana da təsir etmişdir, amma minimum dərəcədə. Baxmayaraq ki, dünya iqtisadiyyatı tənəzzülə uğrayır, birinci rübdə qeyri-neft sektorumuz, iqtisadiyyatın bu sektoru 13,7 faiz artmışdır. Yəni bu, məhz ölkədə aparılan düşünülmüş iqtisadi islahatlar nəticəsində mümkün olmuşdur. Biz enerji təhlükəsizliyimizi təmin edə bilmişik. Ərzaq təhlükəsizliyimizi təmin edə bilmişik və beləliklə, ölkənin dayanıqlı, uzunmüddətli inkişafı üçün bütün əsaslar yaradılıbdır.

Bu gün yeni sənaye sahəsinin işə düşməsi, sadəcə olaraq, bu vaxta qədər görülmüş işlərin nəticəsində mümkün olmuşdur. Beləliklə, Azərbaycanda həm yeni istehsal sahəsi işə başlayır, yeni iş yerləri açılır, yüzlərlə, minlərlə iş yerləri açılacaqdır, həm də regionların, xüsusilə qərb regionunun inkişafı üçün gözəl imkanlar yaradılacaqdır.

İlham ƏLİYEV

Ulu öndər Heydər Əliyevin müəyyən etdiyi yolla inamla irəliləyən ölkəmizin ildən-ilə inkişafı, qüdrətli və dünya birliyində öz yeri olan dövlətə çevrilməsi artıq beynəlxalq ictimaiyyət tərəfindən də təsdiq olunur. Uğurla icra olunan dövlət proqramlarının nəticəsidir ki, bu gün Azərbaycanın dörd bir yerində iqtisadiyyatın bir vaxtlar hətta əlçatmaz görünən tərəfləri sürətlə inkişaf edir, dünya standartlarına uyğun müasir infrastruktur formalaşır. Bütün bunlar sistemli şəkildə paralellik təşkil edərək vətəndaşların sosial rifahının yüksəlməsinə əhəmiyyətli dərəcədə təsir göstərir. Sosial-iqtisadi dirçəliş dövrü keçirən Azərbaycan həm də sürətlə dünya iqtisadiyyatına uğurla inteqrasiya olunur.

2003-cü ildə cənab İlham Əliyevin xalqın etimadını qazanaraq ölkə Prezidenti seçildikdən sonra qarşıya qoyduğu məqsədlərdən biri ölkədə aparılan islahatlar nəticəsində Azərbaycan iqtisadiyyatında qazanılan uğurları daha da artırmaq, o cümlədən regionların inkişafına nail olmaq, bütün regionları sosial-iqtisadi baxımdan yüksək səviyyədə inkişaf etdirmək və bu sahədəki problemləri yoluna qoymaq, eləcə də əhalinin güzəranını yaxşılaşdırmaq idi. Çünki iqtisadiyyatın regional baxımdan inkişafının zəifliyi sosial-iqtisadi, demoqrafik və ekoloji vəziyyətə mənfi təsir göstərir, əhalinin iş dalınca ölkə paytaxtına axınını sürətləndirirdi. Bunun qarşısını almaq üçün isə regionlarda mövcud potensialdan istifadənin səmərəsini artırmaq, yeni iş yerlərinin açılmasını, sənayenin ayrı-ayrı sahələrinin, aqrar sektorun inkişafını, kənd təsərrüfatı məhsullarının emalının genişləndirilməsini təmin etmək və digər tədbirləri həyata keçirtmək lazım idi. Bu məqsədlə dövlət başçısı "Azərbaycan Respublikası regionlarının sosial-iqtisadi inkişafı Dövlət Proqramını (2004-2008-ci illər)" təsdiq etdi.

Regionların sosial-iqtisadi inkişafına dair birinci Dövlət Proqramının uğurlu icrası ölkəmizin sosial-iqtisadi inkişafında yeni mərhələnin başlanğıcını qoyaraq, bölgələrin tarazlı inkişafını dövlət siyasətinin prioritet istiqamətlərindən biri səviyyəsinə qaldırdı. Zamanın nəbzini düzgun tutmaqla, mövcud iqtisadi potensialdan və resurslardan səmərəli istifadə etməklə ölkə iqtisadiyyatınn keyfiyyətcə yeni mərhələyə qədəm qoymasına nail olan Prezident İlham Əliyev bununla həm də ulu öndər Heydər Əliyevin ideyalarını, arzularını reallaşdırdı.

Birinci Dövlət Proqramı çərçivəsində görülən işlərin təhlili göstərir ki, onun icra edildiyi 5 ilə yaxın müddətdə iqtisadiyyatın neftdən asılılığının aradan qaldırılması, qeyri-neft sektorunun inkişaf etdirilməsi və bütövlükdə regionların tarazlı inkişafının təmin olunması istiqamətində son dərəcə mühüm işlər görülüb. Prezident İlham Əliyev tərəfindən regionların sosial-iqtisadi inkişafına göstərilən bu qayğı birinci Dövlət Proqramının uğurlu icrasının həlledici amili olub, qeyri-neft sektorunun davamlı inkişafına, yeni iş yerlərinin və müəssisələrin yaradılmasına, regionlarda kommunal xidmət və sosial infrastruktur təminatının, sahibkarlıq mühitinin daha da yaxşılaşdırılmasına təkan verib. Bütün şəhər və rayonlarda yeni istehsal və xidmət sahələri açılıb. Təqdirəlayiq haldır ki, yeni istifadəyə verilən istehsal müəssisələrinin böyük qismi özəl sektorun payına düşüb. Bu, bölgələrdə sahibkarlığın inkişaf etdirilməsi məqsədilə həyata keçirilən tədbirlərin səmərəliliyindən xəbər verir.

Azərbaycanın sosial-iqtisadi inkişafını şərtləndirən əsas amillərdən biri təbii neft gəlirlərinin düzgün təyinat üzrə istifadəsidir. Məlumdur ki, dünyada neft ölkəsi olaraq tanınan dövlətlərin əksəriyyəti "qara qızıl"ın gətirdiyi üstünlüklərdən lazımınca faydalana bilməyiblər. Bəzi dövlətlərin praktikasından ölkənin taleyinin yalnız neft gəlirlərinin ümidinə buraxılmasının doğurduğu arzuolunmaz fəsadlar bəllidir. Ölkəmizdə isə iqtisadi sosial-sferada son bir neçə ildə qazanılan nailiyyətlər göstərir ki, neft gəlirlərindən istifadədə düzgün metodlar tətbiq olunur. Azərbaycan hakimiyyətinin yeritdiyi iqtisadi siyasət xəttinin kökündə iqtisadiyyatın məhz neftdən asılılığının azaldılması dayanır. Bunun əyani göstəricisi kimi isə regionların sosial-iqtisadi inkişafına dair birinci və hazırda uğurla icra edilən ikinci dövlət proqramlarının iqtisadiyyatımıza verdiyi yeni nəfəsi misal gətirmək olar. Neftdən asılı olmayan güclü iqtisadiyyatın qurulmasına doğru atılan addımları Azərbaycanın bütün rayonlarının timsalında görmək mümkündür. Elə bir rayon göstərmək mümkün deyil ki, orada son bir neçə ildə onlarla müəssisə fəaliyyətə başlamasın. Təbii ki, bu inkişafın sürətləndirilməsini təmin edən infrasturukturun - modul tipli elektrik stansiyalarının tikilməsi, hava limanlarının yenidən qurulması, avtomobil yollarının çəkilməsi, o cümlədən abadlıq-quruculuq işlərinin aparılması diqqətdən kənarda qalmır.

Ölkəmizdə uğurla həyata keçirilən regional inkişaf siyasətinin davamlılığını təmin etmək məqsədilə Prezident İlham Əliyev Regionların sosial-iqtisadi inkişafına dair ikinci Dövlət Proqramını təsdiq edib. Bu proqramda əvvəlki sənədə salınmayan bir çox məsələlər, hər bir kəndin ayrılıqda inkişafı məsələsi öz əksini tapmışdır.

Son illərdə Azərbaycanın digər bölgələri kimi, qərb zonası da sürətli inkişaf mərhələsinə qədəm qoyub. Azərbaycan Prezidenti cənab İlham Əliyevin bu yaxınlarda Gəncə şəhərinə, Göygöl, Şəmkir və Gədəbəy rayonlarına səfəri bir daha göstərdi ki, ölkəmizdə neftdən asılı olmayan güclü iqtisadiyyatın formalaşdırılması prosesi uğurla həyata keçirilməkdədir. Xatırladaq ki, Prezident İlham Əliyev indiyədək bir neçə dəfə ölkəmizin qərb rayonlarında səfərdə olub.

2004-cü ilin iyun ayında Qazax, Tovuz, Şəmkir rayonlarına və Gəncə şəhərinə, 2005-ci ilin mayında Gəncə və Goranboya, 2005-ci ilin oktyabrında Gəncə və Qazaxa, 2006-cı ilin oktyabrında Gəncə, Daşkəsən, Gədəbəy və Şəmkirə, 2007-ci ilin mayında Qazax, Tovuz və Gəncəyə, 2008-ci ilin martında Gəncə, Naftalan, Samux və Göygölə, həmin ilin sentyabrında Qazax, Ağstafa, Tovuz və Gəncəyə səfərlər edən Prezident İlham Əliyev Dövlət Proqramı çərçivəsində görülən işlərlə tanış olub, bir sıra müəssisələrin açılışında, təməlqoyma mərasimlərində iştirak edib. Dövlət başçısının hər səfəri regionun həyatında mühüm yeniliklərlə yadda qalıb, sakinlərin xatirəsində silinməz xoş izlər buraxıb. Gəncə Beynəlxalq Hava Limanının, Şəmkir-Qazax və Gəncə-Daşkəsən-Xoşbulaq avtomobil yollarının dünya standartlarına uyğun səviyyədə tamamilə yenidən qurulması Azərbaycan Prezidenti İlham Əliyevin bölgənin inkişafına göstərdiyi yüksək diqqət və qayğının nəticəsidir. Öz növbəsində, qərb bölgəsi də ümumi inkişaf strategiyasına uyğun olaraq ölkənin sosial-iqtisadi tərəqqisinə töhfələrini verməkdədir. Son illərdə Ağstafada "Saloğlu", "Karvan-el" kimi yeni müəssisələr və tikiş fabriki işə başlamışdır. Bu sırada Şəmkirdə "AtaSənaye"nin quşçuluq fabrikini, Gəncədə "Gəncə-Şərab-2" Səhmdar Cəmiyyətini, "Jardin Royal" şokolad fabrikini, bərpa edilərək yenidən istifadəyə verilən "Gəncə Sənaye Cihaz" müəssisəsini, Goranboyda lambrin, icməli su, kanalizasiya boruları və onların aksesuarlarını istehsal edən "Oplas" MMC-ni, Daşkəsən rayonunda "Daşkəsən Filizsaflaşdırma" ASC-ni, Qazaxda Bentonit emalı zavodunu, Samuxda "Az-Rus Dostluq" ASC-ni və sair müəssisələri də göstərmək olar.

Respublikanın qərb zonasında idman və səhiyyənin inkişafı da diqqət mərkəzindədir. Son bir neçə ildə Qazaxda Müalicə Diaqnostika Mərkəzi və Olimpiya İdman Kompleksi, Gəncədə Müalicə Diaqnostika Mərkəzi, üzgüçülük hovuzu, Gədəbəydə idman kompleksi, Goranboyda və Şəmkirdə stadionlar istifadəyə verilib.

Prezident İlham Əliyevin qərb zonasına son səfəri Gəncədə şəhər polis idarəsinin yeni inzibati binasının, Daxili Qoşunların "N" hərbi hissəsində zabit yataqxanasının istifadəyə verilməsi, Göygöl rayonunda mədəniyyət və istirahət parkının, mərkəzi rayon xəstəxanasının, Şəmkirdə Olimpiya İdman Kompleksinin açılışı, Şəmkir çayı üzərində inşa ediləcək dəryaçanın, Gədəbəydə Aşıq musiqi məktəbinin təməlinin qoyulması, qızıl-mis emalı zavodunun fəaliyyətə başlaması ilə əlamətdar oldu. Dövlət başçısı Gəncədə "Ramada Plaza" mehmanxanasının tikintisi, Nizami Gəncəvinin abidəsində aparılan yenidənqurma işləri ilə də tanış oldu. Bütün bunlar göstərir ki, iqtisadi-sosial tərəqqi ilə yanaşı, dövlət orqanlarında iş şəraitinin, hərbçilərin yaşayış səviyyəsinin yaxşılaşdırılması, yeni infrastruktur obyektlərinin inşası və milli-mənəvi dəyərlərimizə diqqətin artırılması ölkəmizin kompleks inkişafının tərkib hissələridir.

Əsası ümummilli lider Heydər Əliyev tərəfindən qoyulmuş inkişaf strategiyasını layiqincə davam etdirən Azərbaycan Prezidenti cənab İlham Əliyev böyük əzmkarlıqla bütün bölgələrin davamlı yüksəliş yoluna çıxmasına nail olmuşdur. Bununla yanaşı, dövlət başçısının Azərbaycanın yeni dövr üçün iqtisadi siyasət prioritetləri son 5 il yarım ərzində regionların sürətli inkişafını təmin etmişdir.

Rəşad CƏFƏRLİ

Azərbaycan.- 2009.- 13 iyun.- S. 1.