İyunun 12-də Azərbaycan
Respublikasının Prezidenti yanında Dövlət İdarəçilik
Akademiyasında Azərbaycan Respublikası Dağlıq
Qarabağ bölgəsi Azərbaycanlı icması İctimai
Birliyinin qurultayında seçilmiş idarə heyətinin
iclası keçirilmişdir.
İdarə heyətinin
sədri icmanın rəhbəri Bayram Səfərov qurultayın
ictimaiyyət arasında geniş əks-səda
doğurduğunu vurğulamış, iclasın gündəliyi
barədə məlumat vermişdir.
İdarə heyətinin
üzvləri arasında vəzifə bölgüsü
aparılmış, onların daxil olduğu Elm, təhsil və
mədəniyyət, İcmadaxili məsələlər, Beynəlxalq
əlaqələr, İnformasiya və ictimaiyyətlə əlaqələr,
Hüquqi təminat və insan hüquqları bölmələrinin
fəaliyyət istiqamətləri müəyyənləşdirilmiş,
əlaqələndirmə şurasının strukturu təsdiq
edilmişdir.
Bakı Slavyan
Universitetinin rektoru, AMEA-nın müxbir üzvü Kamal
Abdulla, AMEA-nın akademik-katibi Vaqif Fərzəliyev, akademik Cəlal
Allahverdiyev, Bakı Musiqi Akademiyasının rektoru Fərhad Bədəlbəyli,
Milli Məclisin deputatları Elman Məmmədov, Havva Məmmədova
və başqaları çıxış etmiş, idarə
heyətinin fəaliyyəti barədə rəy və təkliflərini
bildirmişlər.
İclasda Azərbaycan
Respublikası Prezidenti Administrasiyasının rəhbəri
akademik Ramiz Mehdiyev çıxış etmişdir.
Qurultayı Ermənistan-Azərbaycan,
Dağlıq Qarabağ münaqişəsinin həlli prosesində
atılan vacib addım adlandıran Ramiz Mehdiyev demişdir ki,
icmanın yenidən formalaşması böyük əhəmiyyət
kəsb edir. İcmanın qurultayında görkəmli, təkcə
Qarabağda yox, həm də bütün Azərbaycanda
yaxşı tanınan, sayılan nüfuzlu şəxslər
iştirak edirdilər. Bu şəxslərin qüvvəsindən,
sözünün sanbalından səmərəli istifadə
olunmalıdır. İdarə heyəti iki istiqamətdə fəaliyyət
göstərməlidir: həm ölkə daxilində iş
aparmalı, həm də beynəlxalq qurumlarla, onların
nümayəndələri ilə əlaqələri genişləndirməlidir.
Akademik R.Mehdiyev
vurğulamışdır ki, icmanın fəaliyyəti
canlandırılmalı, Qarabağ əhalisi arasında maarifləndirmə
işlərinin səviyyəsi yüksəldilməlidir. Əlbəttə,
bu sahədə icmanın saytı, mətbu orqanı xüsusi
rol oynayacaq, onların vasitəsilə Azərbaycanın
mövqeyi dünyaya çatdırılacaqdır. Tərtib
olunmuş tədbirlər planı dönmədən həyata
keçirilməlidir. Dağlıq Qarabağın azərbaycanlı
icmasının fəaliyyəti məqsədyönlü
xarakter almalıdır.
R.Mehdiyev beynəlxalq
görüşlərin vacibliyini diqqətə
çatdırmış, ermənilərin Azərbaycan, azərbaycanlılar
barədə yaratdıqları təsəvvürü bu
görüşlərin köməyi ilə
dağıtmağı tövsiyə etmişdir.
Prezident
Administrasiyasının rəhbəri əmin olduğunu
bildirmişdir ki, idarə heyəti qarşıya qoyulmuş vəzifələri
uğurla yerinə yetirəcəkdir.
Azərbaycan
Respublikası Prezidenti Administrasiyasının Regional idarəetmə
və yerli özünüidarəetmə orqanları ilə
iş şöbəsinin müdiri Zeynal Nağdəliyev,
Xarici əlaqələr şöbəsinin müdiri Novruz Məmmədov
çıxış edərək idarə heyətinin fəaliyyətinin
səmərəsinı artırmaq barədə tövsiyələrini
vermişlər.
Məlumat verilmişdir
ki, Azərbaycan Respublikası Dağlıq Qarabağ bölgəsinin
Azərbaycanlı icması İctimai Birliyi üçün
inzibati bina ayrılmışdır.
AzərTAc
Azərbaycan.- 2009.- 13 iyun.- S. 2.