Bakıda "Müasir tədris texnologiyaları" mövzusunda konfrans keçirilmişdir

İyunun 12-də "Gülüstan" sarayında ölkə Prezidenti İlham Əliyevin 2008-ci il 10 iyun tarixli Sərəncamı ilə təsdiq edilmiş "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" üzrə görülən işlərə həsr olunmuş "Müasir tədris texnologiyaları" mövzusunda konfrans keçirilmişdir.

Ayrı-ayrı dövlət qurumları, QHT-lərin, ictimaiyyət nümayəndələrinin, beynəlxalq təşkilatların təmsilçilərinin, təhsil işçilərinin iştirak etdikləri konfransda müvafiq Dövlət Proqramı çərçivəsində ötən bir il ərzində həyata keçirilmiş tədbirlər, qarşıda duran vəzifələr barədə ətraflı məlumatlar verilmiş, filmlər nümayiş etdirilmişdir.

Təhsil Nazirliyinin nəzdində yaradılmış Təhsil Sisteminin İnformasiyalaşdırılması İdarəsinin əlaqələndirdiyi müvafiq Dövlət Proqramı çərçivəsində fəaliyyətlər "Ultra", "Azedunet", "Mədəd", "Microsoft" və "İntel"in təhsil üzrə proqramlarının tərəfdaşlığı ilə həyata keçirilir.

Təhsil Nazirliyi nəzdində Təhsil sisteminin informasiyalaşdırılması idarəsinin rəisi Samir Məmmədov, "Ultra" şirkətinin direktoru Tahir Mirkişili, Azərbaycan Təhsil Şəbəkəsinin ("Azedunet" şirkəti) direktoru Səməd Abasov, "Mədəd" Humanitar İctimai Birliyinin direktoru Emil Məmmədov, "Microsoft" şirkətinin "Təhsildə əməkdaşlıq" layihəsi üzrə meneceri Emin Axundov, İntel-Ukrayna Korporativ məsələlər üzrə menecer Tatyana Nanayeva müxtəlif mövzularda təqdimatlar etmişlər.

Bildirilmişdir ki, qeyd olunan Dövlət Proqramı çərçivəsində ayrı-ayrı istiqamətlər üzrə fəaliyyətlər həyata keçirilmişdir.

Yaradılan Azərbaycan Təhsil Şəbəkəsinin əsas məqsədi ölkənin bütün təhsil ocaqlarını vahid yüksək sürətli internet şəbəkəsi çərçivəsində birləşdirməkdən ibarətdir. Layihə Rabitə və İnformasiya Texnologiyaları Nazirliyinin yardımı ilə BMT İP-nin "AzNET" layihəsinin bazasında yaradılmış və "Azedunet" təşkilatı tərəfindən həyata keçirilir.

Vahid təhsil şəbəkəsinin mövcudluğu ölkə çərçivəsində təhsil ocaqları arasında yüksək sürətli məlumat mübadiləsini təmin etməyə imkan yaradacaqdır. Eyni zamanda, təhlükəsizlik informasiya sistemlərinin fəal istifadəsi ilə təhsil ocaqları ardıcıl surətdə internetə çıxış ilə təmin olunacaqlar.

Təhsil Nazirliyi, Bakı Şəhəri üzrə Təhsil İdarəsi və paytaxtın 20 məktəbi "Elektron məktəb" layihəsi çərçivəsində fiberoptik kabel vasitəsilə Azərbaycan Təhsil Şəbəkəsinə qoşulmuşdur, bununla da yüksək sürətli internetə və Təhsil Nazirliyinin Məlumat və Resurs Mərkəzinə çıxış təmin olunacaqdır. Azərbaycan Təhsil şəbəkəsinə ölkənin 200 təhsil ocağının qoşulması prosesi artıq başa çatmışdır.

Yaradılmış Məlumat və Resurs Mərkəzi (DATA) ölkəmizin təhsil sektorunun informasiyalaşdırılmasında mühüm yer tutur.

Müasir texnologiyaların tətbiqi ilə yaradılan Məlumat və Resurs Mərkəzinin funksionallığı olduqca genişdir və ən müasir texnoloji standartlara cavab verir. Azərbaycan Təhsil Şəbəkəsində internetə "giriş və çıxış nöqtəsi" olmaqla yanaşı, mərkəz, həmçinin təhsilə aid informasiya resurslarının toplanacağı yer olacaqdır. Mərkəzdə xüsusi təhlükəsizlik qəfəsi qurulmuş, bütün avadanlıqların 24 saat fasiləsiz çalışması üçün hər cür texniki imkan yaradılmışdır.

Mərkəzdə quraşdırılmış texnologiya videokonfranslar keçirməyə imkan verəcək, konfrans zalından Azərbaycan Təhsil Şəbəkəsinə qoşulmuş məktəblərə mühazirə və ya açıq dərslər keçirməyə şərait yaradacaqdır.

Mərkəzin serverində, həmçinin Azərbaycan məktəblərinin elektron xəritəsi də yerləşdirilmişdir. İnternet vasitəsilə ictimaiyyət üçün açıq olan bu resursdan məktəblər haqqında bütün zəruri məlumatlar əldə etmək mümkündür.

Mərkəzdə Şəbəkə İdarəetmə və Kompüter şəbəkələrinin təhlükəsizlik mərkəzləri (CERT/CSIRT) də fəaliyyət göstərir.

"Azedunet" təşkilatı tərəfindən vahid "Zəng" mərkəzi də yaradılır.

Müvafiq Dövlət Proqramı çərçivəsində təhsil portalının yaradılması üzrə işlərin birinci mərhələsi başa çatmışdır. Təhsil Portalının yaradılması üzrə işlər "Ultra" şirkəti tərəfindən aparılmışdır. Portalın hazır funksionalları Təhsil Nazirliyi tərəfindən testləşdirilmişdir. Onun funksionallarından 4 istifadəçi qrupu yararlana bilər: müəllim, şagird, tələbə və valideynlər. Hər bir istifadəçi qrupu üçün xüsusi interfeys və funksionallar nəzərdə tutulmuşdur. Təhsil portalında müxtəlif elektron tədris resursları da yerləşdiriləcəkdir.

Ölkəmizdə indiyədək 20 minə yaxın müəllim təhsildə informasiya-kommunikasiya texnologiyalarının (İKT) tətbiqi üzrə treninqlərdə iştirak etmişdir. Bu treninqlər müvafiq dövlət proqramları çərçivəsində təşkil olunmuşdur.

"Mədəd" humanitar təşkilatı tərəfindən təşkil olunmuş treninqlər dünyada qəbul olunmuş metodlar əsasında yaradılmış "Skulz Onlayn" - "Müəllimlərin peşəkarlıq səviyyəsinin təkmilləşdirilməsi" və "İntel" - "Gələcək üçün Təhsil" təlim vəsaitləri əsasında keçirilir.

Qeyd edilən Dövlət Proqramı çərçivəsində "Elektron məktəb" pilot layihəsi də həyata keçirilir. Bu layihə ölkəmizdə Milli Təhsil Modelinin formalaşdırılmasına xidmət edəcəkdir.
"Elektron məktəb" layihəsində Bakının Heydər Əliyev adına liseyi, Akademik Zərifə Əliyeva adına orta məktəb, Bakı Avropa liseyi və digər təhsil müəssisələri iştirak edir.

Konfransda Prezident Administrasiyasının humanitar siyasət məsələləri şöbəsinin müdiri Fatma Abdullazadə çıxış edərək bildirmişdir ki, 2003-cü ildə Cenevrədə keçirilən İnformasiya Cəmiyyəti üzrə Dünya sammitində Azərbaycan Prezidenti İlham Əliyevin ölkəmizdə informasiya cəmiyyətinin qurulması ilə bağlı bəyan etdiyi strategiya artıq respublikamızda reallığa çevrilir.

F.Abdullazadə müvafiq Dövlət Proqramı çərçivəsində uğurlu işlər görüldüyünü bildirmişdir.

Azərbaycanın Avropa təhsil məkanına - Bolonya prosesinə qoşulduğunu xatırladan F.Abdullazadə müvafiq təhsil müəssisələrində bu prosesin tələblərinə uyğun tədbirlərin həyata keçirilməsinin vacibliyini söyləmişdir. O, eyni zamanda təhsildə İKT-nin tətbiqi ilə bağlı mövcud problemlərə toxunmuş, qarşıda duran vəzifələri diqqətə çatdırmış, öz tövsiyələrini vermişdir.

Təhsil naziri Misir Mərdanov Prezident İlham Əliyevin təhsilin inkişafına daim böyük önəm verdiyini vurğulamışdır.

Bu gün təhsil müəssisələrində informasiya-kommunikasiya texnologiyalarına böyük maraq göstərildiyini qeyd edən nazir təhsildə İKT-nin tətbiqi ilə bağlı daha geniş tədbirlər həyata keçiriləcəyini nəzərə çarpdırmışdır.

Rabitə və informasiya texnologiyaları naziri Əli Abbasov ölkəmizdə İKT üzrə böyük nailiyyətlər qazanıldığını söyləmişdir.

AzərTAc

Azərbaycan.- 2009.- 13 iyun.- S. 2.