Azərbaycan ilə ABŞ arasında əməkdaşlıq
yüksələn xətlə inkişaf edir
Xarici İşlər
Nazirliyinin mətbuat xidmətindən bildirmişlər ki,
iyunun 11-də nazir Elmar Məmmədyarov ABŞ dövlət
katibinin Avropa məsələləri üzrə köməkçisi
Filip Qordon ilə görüşmüşdür.
Azərbaycana ilk dəfə
gəldiyini deyən F.Qordon ölkələrimiz arasında
mövcud əlaqələrin səviyyəsindən məmnunluğunu
ifadə etmiş və əməkdaşlığın
müxtəlif sahələrdə inkişafı
üçün böyük potensial olduğunu
bildirmişdir.
F.Qordon
vurğulamışdır ki, ABŞ regionda sülhün və
sabitliyin bərqərar olmasında maraqlıdır və Ermənistan-Azərbaycan,
Dağlıq Qarabağ münaqişəsinin nizamlanmasında
irəliləyişə nail olunmasına töhfə verməyə
hazırdır.
Amerikalı diplomat Azərbaycana
gəlməzdən əvvəl Ermənistan və
Gürcüstanda keçirdiyi görüşlər barədə
məlumat vermişdir.
Nazir E.Məmmədyarov
F.Qordonu yeni vəzifəyə təyin olunması münasibətilə
təbrik etmişdir. Azərbaycan ilə ABŞ arasında əməkdaşlığın
yüksələn xətlə inkişaf etdiyini vurğulayan
E.Məmmədyarov Vaşinqtona son səfəri çərçivəsində
aparılmış müzakirələrin faydalı
olduğunu demiş, Barak Obama administrasiyası dövründə
bu əlaqələrin daha da genişlənəcəyinə əminliyini
ifadə etmişdir.
Ermənistan-Azərbaycan,
Dağlıq Qarabağ münaqişəsinin beynəlxalq
hüququn norma və prinsipləri əsasında, yalnız Azərbaycanın
ərazi bütövlüyü çərçivəsində
nizamlanması ilə bağlı mövqeyin ölkəmizin
xarici siyasətinin əsas prioriteti olduğunu vurğulayan
nazir E.Məmmədyarov bu istiqamətdə rəsmi
Vaşinqtonun dəstəyinin əhəmiyyətini qeyd
etmişdir.
Münaqişənin
göstərilən prinsiplər əsasında həllinin
regionda sülhün və sabitliyin bərqərar olmasında
mühüm rol oynayacağını deyən E.Məmmədyarov,
buna tezliklə nail olunmasının vacibliyini diqqətə çatdırmışdır.
Görüşdə Azərbaycan
ilə ABŞ arasında enerji sahəsində əməkdaşlıq
barədə də fikir mübadiləsi aparılmış,
bu əlaqələrin səviyyəsindən məmnunluq ifadə
edilmişdir.
Tərəflər
arasında birgə maraq doğuran ikitərəfli, regional,
qlobal məsələlər ətrafında da fikir mübadiləsi
aparılmışdır.
AzərTAc
Azərbaycan.- 2009.- 13 iyun.- S. 2.