Xarici İşlər
Nazirliyinin mətbuat xidmətindən bildirmişlər ki,
BMT-nin İnsan Hüquqları Şurasının Cenevrədə
keçirilmiş 11-ci sessiyası çərçivəsində
iyunun 11-də təşkilatın Baş Məclisinin
2006-cı il 15 mart tarixli qətnaməsinə müvafiq olaraq,
İnsan Hüquqları Şurasının Universal Dövri
İcmal mexanizmi üzrə Azərbaycan Respublikası
Hökumətinin məruzəsinə dair yekun sənəd qəbul
olunmuşdur.
Sessiyanın müvafiq
iclasında Azərbaycan xarici işlər nazirinin müavini Xələf
Xələfovun başçılığı ilə Azərbaycanın
BMT-nin Cenevredəki bölməsi və digər beynəlxalq təşkilatlar
yanındakı daimi nümayəndəliyinin rəhbəri
Elçin Əmirbəyov və Xarici İşlər
Nazirliyinin beynəlxalq hüquq və müqavilələr idarəsinin
rəisi Murad Nəcəfbəylidən ibarət nümayəndə
heyəti iştirak etmişdir.
Nazir müavini X.Xələfov
cari il fevralın 4-də BMT-nin İnsan Hüquqları
Şurasına təqdim olunmuş Azərbaycan Respublikası
Hökumətinin Universal Dövri İcmal mexanizmi üzrə
məruzəsinə dair tövsiyələrə cavab olaraq Azərbaycan
tərəfinin şərhlərini təqdim etmişdir.
X.Xələfov Azərbaycanda
insan hüquq və əsas azadlıqlarının təmin
olunması üçün yaradılmış hüquqi əsaslar,
onların təşviqinin möhkəmləndirilməsinə
yönəldilmiş səylər barədə ətraflı
məlumat vermişdir.
Nazir müavini bu il
martın 18-də keçirilmiş referendum nəticəsində
Azərbaycan Respublikasının Konstitusiyasına edilmiş
düzəlişlərin insan hüquqları və
azadlıqlarının daha da möhkəmləndirilməsi və
inkişafı baxımından əhəmiyyətini xüsusi
vurğulamışdır.
Həmçinin Azərbaycan
nümayəndə heyətinin rəhbəri qanunvericiliyin təkmilləşdirilməsi
və implementasiyası, məhkəmə-hüquq, o cümlədən
penitensiar sistemdə aparılan islahatlar, Azərbaycanda
qadın və uşaqların, əcnəbilərin və vətəndaşlığı
olmayan şəxslərin hüquqlarının, gender bərabərliyinin,
dözümlülüyün təşviq və təmin edilməsi,
ölkəmizdə insan alverinə qarşı mübarizədə
görülən tədbirlər barədə məlumat
vermiş, Heydər Əliyev Fondu tərəfindən müxtəlif
sahələrdə həyata keçirilən proqram və
layihələrdən danışmışdır.
X.Xələfov Azərbaycanın
sosial-iqtisadi inkişaf göstəricilərinə, eləcə
də ölkəmizdə iqtisadi və sosial hüquqların
qorunması məsələlərinə toxunmuşdur.
Nazir müavini Azərbaycan
Respublikası hökuməti tərəfindən
qaçqın və məcburi köçkünlərin
sosial vəziyyətinin yaxşılaşdırılması
istiqamətində həyata keçirilən tədbirləri
də xüsusi vurğulamışdır.
İclasda dövlətlərin
nümayəndələri Azərbaycan Respublikası Hökumətinin
universal dövri icmal məruzəsinə dair tövsiyələrə
cavab olaraq, Azərbaycanın təqdim etdiyi şərhləri
və ölkəmizdə insan hüquqları və əsas
azadlıqlarının təmin olunması istiqamətində əldə
olunmuş nailiyyətləri, xüsusilə gender bərabərliyi,
insan alverinə və zorakılığa qarşı
mübarizə, penitensiar və iqtisadi-sosial sahələrdə
aparılan uğurlu islahatları yüksək qiymətləndirmişlər.
Azərbaycanın insan
hüquqlarını müdafiəsi üzrə beynəlxalq əməkdaşlığa
yüksək diqqət ayırması iştirakçılar tərəfindən
xüsusilə alqışlanmışdır.
AzərTAc
Azərbaycan.- 2009.- 13 iyun.- S. 2.