Azərbaycanlı iki tibb bacısı "Florens Naytingeyl" medalına layıq görülmüşdür

Bu münasibətlə iyunun 12-də Beynəlxalq Qızıl Xaç Komitəsinin (BQXK) Azərbaycan nümayəndəliyinin ofisində medalların təqdimat mərasimi keçirilmişdir.

Beynəlxalq Qızıl Xaç Komitəsinin (BQXK) Azərbaycandakı nümayəndəliyinin və Azərbaycan Qızıl Aypara Cəmiyyətinin birgə təşkil etdiyi tədbirdə çıxış edən Prezident Administrasiyasının ictimai-siyasi məsələlər şöbəsinin müdir müavini Ərəstun Mehdiyev bildirmişdir ki, AzQAC-ın üzvlərinin nəcib fəaliyyəti beynəlxalq miqyasda yüksək qiymətləndirilir. Bu cəmiyyət çox gözəl, xoş bir məram, məqsəd naminə fəaliyyət göstərir və onun üzvləri də bu işin öhdəsindən ləyaqətlə gəlirlər.

Ərəstun Mehdiyev qeyd etmişdir ki, hər bir cəmiyyətdə, o cümlədən ölkəmizdə də qayğıya, diqqətə, köməyə ehtiyacı olan insanlar vardır. Həmin insanlara xidmət edən, bu sahədə çalışan insanların əməyi, fəaliyyəti xüsusi diqqətə və hörmətə layiqdir. Çox xoşdur ki, Azərbaycanı təmsil edən cəmiyyətin üzvlərinin belə bir nəcib fəaliyyəti yüksək mükafata layiq görülmüşdür. Bu münasibətlə Azərbaycan Qızıl Aypara Cəmiyyətini təbrik edirəm. Bu fəaliyyət gələcəkdə də ardıcıl olaraq davam edəcək, insanlarımızda xoş ovqat yaradacaqdır.

Beynəlxalq Qızıl Xaç Komitəsinin (BQXK) Azərbaycandakı nümayəndəliyinin rəhbəri Tun Vandenhuv, AzQAC-ın prezidenti, Milli Məclisin deputatı Novruzəli Aslanov çıxış edərək bildirmişlər ki, medal müstəsna cəsarət nümayiş etdirmiş, münaqişə, yaxud fəlakət qurbanlarının xilasına, ictimai səhiyyə və maarifləndirmə işinə yaradıcı və nümunəvi xidmət göstərmiş tibb bacısı və könüllü köməkçilər üçün ən yüksək beynəlxalq fərqləndirmə mükafatıdır.

Bildirilmişdir ki, milli cəmiyyətlər tərəfindən təqdim olunan namizədlərin əsaslı müzakirəsindən sonra medalın 42-ci dəfə təqdimatına 15 ölkədən 28 nəfər seçilmişdir. Onların arasında iki azərbaycanlı - ictimai səhiyyə maarifi sahəsində və münaqişə vəziyyətində fəallıq göstərmiş, AzQAC-nin sağlamlıq və qayğı şöbəsinin baş tibb bacısı işləmiş mərhum Gültəkin Qafarova və AzQAC-nin Binəqədi rayon komitəsində çalışan könüllü tibb bacısı, ictimai səhiyyə fəalı Umleyla Aslanova bu medala layiq görülmüşlər.

Sonda üzərində Florens Naytingeylin fotoqravürü olan medallar və diplomlar Umleyla Aslanovaya, dünyasını dəyişmiş Gültəkin Qafarovanın bacısına təqdim olunmuşdur.

AzərTAc

Azərbaycan.- 2009.- 13 iyun.- S. 2.