Davamlı tərəqqi və yüksəlişə aparan yol

Azərbaycan ötən əsrin 90-cı illərinin əvvəllərində dövlət müstəqilliyini qazandıqdan sonra ölkədə cərəyan edən mürəkkəb siyasi hadisələr göstərdi ki, liderin idarəçilik keyfiyyətləri dövlətin taleyi baxımından müstəsna əhəmiyyət kəsb edir. 1993-cü ilin iyununda xalqın təkidli tələbi ilə hakimiyyətə qayıdan ulu öndər Heydər Əliyev siyasi müdrikliyi, polad iradəsi, dövləti idarə etmək bacarığı sayəsində qarşıya çıxan bütün maneələri dəf etdi, ölkədə ictimai-siyasi sabitlik təmin olundu, hakimiyyət böhranı aradan qaldırıldı.

1993-cü ildən bəri cəmiyyətdə yeniləşmə, azadfikirlilik, iqtisadi sahədə yeni təsərrüfatçılıq forması, bazar iqtisadiyyatı təşəkkül tapdı. Bütün bunlar dövlətə uğurla rəhbərlik edən, onu siyasi oyunlardan, çəkişmələrdən, xarici düşmənlərdən böyük məharətlə, müdrikcəsinə qoruyan ümummilli lider Heydər Əliyevin sayəsində mümkün oldu.

Ulu öndər Heydər Əliyevin hakimiyyətə qayıdışı Azərbaycanda yeni tarixi mərhələnin əsasını qoydu, ölkədə ictimai-siyasi sabitliyin təmin edilməsi istiqamətində əhəmiyyətli addımlar atıldı. Bu dövrdə ictimai münasibətlər sistemi təkmil strategiya əsasında inkişaf etməyə başladı, iqtisadi tənəzzülə son qoyuldu. Bütün bunlar müstəqil Azərbaycan dövlətinin sosial və siyasi dayaqlarını möhkəmləndirdi, respublikanın ümumi inkişafını təmin etdi. Ulu öndər keçid dövründə dünyanın qabaqcıl dövlətlərinin təcrübəsində sınaqdan uğurla çıxmış, müsbət nəticələri sübut olunmuş inkişaf kursunun Azərbaycan gerçəkliyinə adekvat modelini yaratdı.

Sahibkarlığın, fermer təsərrüfatlarının inkişafı, yerli istehsalın stimullaşdırılması, daxili bazarın qorunması, xarici investisiyaların ölkəyə cəlb olunması istiqamətində mühüm addımlar atıldı.

Böyük strateq Heydər Əliyevin böyüklüyü həm də onun özündən sonra Azərbaycanı layiqincə idarə edəcək alternativsiz lider yetişdirməsidir. Ulu öndərin əsasını qoyduğu iqtisadi siyasəti inamla davam etdirən dövlət başçısı cənab İlham Əliyev son beş ildə Azərbaycanı sürətli sosial-iqtisadi inkişaf yoluna çıxardı, ictimai həyatın bütün sahələrində intibah və yüksəlişi təmin etdi. Təkcə bir faktı demək kifayətdir ki, hazırda dünya dövlətləri qlobal böhrandan ciddi zərər çəkdiyi halda, Azərbaycan iqtisadiyyatı dinamik inkişaf yolundadır. Şübhəsiz, bu dövlət başçısı İlham Əliyevin qeyri-neft sektorunun inkişafına göstərdiyi yüksək diqqət və qayğının bariz təcəssümüdür. İqtisadiyyatın yalnız neftdən asılı olmasını yolverilməz hesab edən Azərbaycan Prezidenti son beş ildə regionlarda yeni istehsal və emal müəssisələrinin fəaliyyətə başlamasına diqqət yönəltdi.

Bu günlərdə Bakıda təşkil olunmuş XVI Beynəlxalq Xəzər neft-qaz sərgi və konfransında çıxış edən dövlət başçısı İlham Əliyev neft sektorunun digər sahələr üçün təkanverici vasitə olduğunu bir daha vurğulamışdır: "Mən həmişə demişəm, bu gün də demək istəyirəm ki, bizim üçün neft amili bir məqsəd deyil, bir vasitədir. Biz bu vasitədən çox uğurla istifadə etdik. Bu gün Azərbaycan iqtisadiyyatı çoxşaxəli iqtisadiyyatdır. Bu gün iqtisadiyyatın qeyri-neft sektorunun inkişafı neft sektorundan daha da sürətlə irəli gedir. Bu ilin, bütün dünya üçün böhranlı ilin ilk rübündə iqtisadi inkişaf 4,3 faiz, qeyri-neft sektorunun artımı isə 13,7 faiz təşkil etmişdir. Biz buna məhz neft siyasətinin uğurlu icrası nəticəsində, neftdən əldə edilmiş gəlirlərin səmərəli şəkildə digər sektorlara investisiya kimi qoyuluşu nəticəsində nail ola bilmişik. Bu gün Azərbaycan iqtisadiyyatı dayanıqlı iqtisadiyyatdır və əminəm ki, bütün son illər ərzində əldə edilmiş iqtisadi uğurlar növbəti illərdə davam etdiriləcəkdir".

Azərbaycanın qlobal böhrandan ciddi ziyan çəkməməsi həm də özəl sektorun, sahibkarlığın dinamik inkişafına göstərilən yüksək diqqət və qayğının nəticəsidir. Bu gün respublikamızda ümumi daxili məhsul istehsalının 85 faizi məhz bu sahənin üzərinə düşür. Ötən beş ildə kiçik və orta sahibkarların güzəştli kreditlərlə təmin olunması, sahibkarların fəaliyyətinə yersiz müdaxilələrin qarşısının alınması, özəl sektorda inkişafa mane olan süni problemlərin həlli istiqamətində bir sıra mühüm addımlar atılmışdır. Sahibkarlarla görüşən dövlət başçısı onları narahat edən məsələləri daim diqqətlə dinləmiş, sahibkarları dəstəklədiyini, iş adamlarına gələcəkdə də lazımi köməyi göstərəcəyini bəyan etmişdir. Dövlət rəhbəri inhisarçılıq, sahibkarlara süni maneələrin yaradılması, hüquq-mühafizə və vergi orqanlarının iş adamlarının fəaliyyətinə qeyri-qanuni müdaxiləsi hallarını pisləmiş, bu münasibət konkret qərarlarla müşayiət olunmuşdur. Xüsusi vurğulamaq istərdim ki, dövlət başçısı İlham Əliyevin 14 aprel 2009-cu il tarixli fərmanı ilə təsdiq edilmiş "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı" regionların tarazlı və davamlı inkişafı, sahibkarlığa qayğı sayəsində ötən beş ildə əldə olunmuş nəticələrin uğurla davam etdirilməsi baxımından vacib əhəmiyyət kəsb edir.

Azərbaycan Prezidentinin sahibkarlara diqqət və qayğısı məsuliyyətimizi birə-beş artırır, bizi daha əzmlə çalışmağa, ölkə qarşısındakı strateji hədəflərin reallaşmasına yardımçı olmağa sövq edir. Rəhbəri olduğum "Mərkəzi Univermaq" Açıq Səhmdar Cəmiyyəti cənab İlham Əliyevin orta sahibkarlığın dəstəklənməsi sahəsindəki siyasətinə daim töhfə verməyə, yeni iş yerlərinin açılmasına, müvafiq vergilərin vaxtında ödənməsinə çalışır.

İndi çoxları razılaşar ki, tarixən paytaxt Bakı sakinlərinin əsas ticarət və satış mərkəzi olan "Mərkəzi Univermaq" öz sanbalını, müştəri kontingentini qoruyub saxlayır. Hazırda dünyanın bir çox nüfuzlu şirkətlərinin yüksək səviyyəli mallarını məhz burada əldə etmək mümkündür. Eyni zamanda səhmdar cəmiyyət beynəlxalq əməkdaşlığını genişləndirərək bir sıra "brend"ləri Bakıya gətirməyə nail olub. Yüksək səviyyəli ticarət və xidmətə görə dəfələrlə dünyanın bir çox şirkətlərinin qızıl medallarına layiq görülüb. Eyni zamanda bir müddət əvvəl İstanbulda keçirilən biznes toplantısında səhmdar cəmiyyətin fəaliyyəti yüksək qiymətləndirilib.

Təbii ki, hər bir iş adamı ölkədə əlverişli biznes və investisiya mühitinin mövcudluğunu ciddi şəkildə hiss edir, fəaliyyət dairəsini genişləndirir, eyni zamanda bütün bunların müqabilində üzərinə düşən sosial məsuliyyəti də unutmur. Dövlət başçısı İlham Əliyevin dəfələrlə qeyd etdiyi kimi, dövlətlə iş adamlarının qarşılıqlı faydalı əməkdaşlığı Azərbaycanın daha sürətli tərəqqisinə, davamlı inkişafına xidmət edir.

Sabir ABDULLAYEV,

"Mərkəzi Univermaq"

Açıq Səhmdar

Cəmiyyətinin sədri

Azərbaycan.- 2009.- 13 iyun.- S. 3.