"Əfsanənin əks üzü" seriyasından sənədli film

Azərbaycan Dövlət Mədəniyyət və İncəsənət Universitetinin tədris teatrında Rusiya Federasiyasının "Studiya kinoprodukt" şirkətinin istehsal etdiyi "Əfsanənin əks üzü" seriyasında "26 Bakı komissarı" sənədli filminin təqdimatı keçirildi. Əvvəlcə universitetin prorektoru, professor Rafiq Sadıqov film haqqında qonaqlara məlumat verərək bildirdi ki, filmin aparıcısı Rusiyanın məşhur kino ulduzu Aleksandr Noisk, redaktoru Olqa Dmitrik, quruluşçu rejissoru Roman Otriba və quruluşçu operatoru İvan Rozovdur. Filmin çəkilişində iştirak edən yeganə azərbaycanlı filologiya elmləri namizədi Asif Rüstəmlidir ki, o, tarixi həqiqətlərin aşkarlanmasına böyük əmək sərf etmişdir.

Sonra filmə baxış keçirildi. Moskva şəhərində, Türkmənistanda, Bakıda - dənizkənarı bulvarda, İçərişəhərdə, Şirvanşahlar sarayında, Bibiheybətdə, Yanardağda və digər yerlərdə çəkilişi aparılan bu film bolşevik cildinə girmiş erməni qatillərinin, başda S.Şaumyan olmaqla, azərbaycanlıları qəddarlıqla qətlə yetirmələri ifşa olunur. Filmə ürəkağrısız baxmaq mümkün deyil. Azərbaycan tarixində xalqımızın başına gətirilmiş dəhşətlərdən hələ nə qədər belə faciələrin açılmasına ehtiyac olduğunu söyləyən qonaqlar filmin təsirindən çıxa bilmirdilər.

Təqdimat mərasiminin sonunda Asif Rüstəmli bildirdi ki, film tarixi həqiqətlərimizi açan, xalqımızın başına gətirilən əzablı oyunları çılpaqlığı ilə göstərən epopeyadır.

Məlumat üçün bildirək ki, sözügedən sənədli film Moskvanın "Zvezda" telekanalında dörd dəfə, onlarca regional kanalda, yüzlərcə kabel televiziyası ilə Rusiya Federasiyasında nümayiş etdirilib. Bu isə əslində azərbaycanlılara qarşı soyqırımı törədənlərin iç üzünün açılması deməkdir.

Zəkurə QULİYEVA

Azərbaycan.- 2009.- 13 iyun.- S. 6.