Şuranın sədri,
akademik Budaq Budaqov tədbiri açaraq, Milli Qurtuluş
gününün tarixi əhəmiyyətindən
danışmışdır.
Sonra qurumun icra
aparatının rəhbəri Famil Gözəlov məruzə
ilə çıxış etmişdir. O demişdir ki, Azərbaycanın
dövlət müstəqilliyi bərpa edildikdən sonra
ölkənin qarşısında çox ciddi və
mühüm vəzifələr dayanmışdı. Bir tərəfdən
müstəqil dövlət qurulmalı, digər tərəfdən
Ermənistanın Azərbaycana hərbi təcavüzünün
qarşısı alınmalı, sosial-iqtisadi sahələrdə
mühüm vəzifələr islahatlar yolu ilə həll
edilməli idi. Lakin çox təəssüf ki, həmin
dövrdə hakimiyyətdə olan dairələr bu vəzifələrin
öhdəsindən gələ bilmədilər. Əvəzində
vəziyyət daha da pisləşmiş, ölkədə vətəndaş
qarşıdurması yaranmışdı. Belə ağır
vəziyyətdən çıxış yolunu Heydər Əliyevi
Bakıya dəvət etməkdə görən Azərbaycan
xalqı məhz ümummilli liderin gərgin səyi nəticəsində
təhlükələrdən qurtulmuşdur. Həmin ərəfədə
Heydər Əliyev Bakıya qayıtmasaydı, Azərbaycanın
başı üzərini daha böyük bəlalar ala bilərdi.
Heydər Əliyevin bu
qayıdışı tarixi bir hadisə olmuş, dövlətçiliyimiz
və müstəqilliyimiz bütün bəlalardan
qurtulmuşdur.
Sonra AAŞ sədrinin
müavinləri Əli Həsənov, Fəttah Heydərov,
Bayram Yusifov və başqaları çıxış
etmişlər. Çıxışlarda
vurğulanmışdır ki, həmin dövrdə Heydər Əliyev
kimi qətiyyətli, dünya miqyasında tanınan və
xalqı öz arxasınca aparmağa qadir olan lider hakimiyyətə
gəlməsəydi, hadisələr olduqca təhlükəli
və gərgin bir məcrada davam edə bilərdi. Azərbaycan
parçalanar, erməni işğalı daha dərinlərə
gedərdi.
Ümummilli liderin
Bakıya qayıdışı və xalqın onun ətrafında
sıx birləşməsi Azərbaycanı həmin təhlükəli
məqamlardan uzaqlaşdırdı. Odur ki, indiki və gələcək
nəsil bu dövləti bizə bəxş etdiyinə görə
Heydər Əliyevə borcludur. Bu baxımdan da Milli Məclis
tərəfindən 15 İyunun tarixə Milli Qurtuluş
günü kimi daxil edilməsi çox düzgün qərar
idi.
Hər il bu bayramın təntənəli
surətdə qeyd olunması, Heydər Əliyevin əziz xatirəsinin
yad edilməsi qanunauyğun haldır.
Azərbaycan.- 2009.- 14 iyun.- S. 10.