Almaniyanın federal ədliyyə
naziri Brigitta Tsüpriesin dəvəti ilə nazir Fikrət Məmmədovun
rəhbərliyi ilə Azərbaycan Respublikasının Ədliyyə
Nazirliyinin nümayəndə heyəti Almaniyada rəsmi səfərdə
olmuşdur.
Azərbaycan nümayəndə
heyəti səfər çərçivəsində Berlində
gənclər və yeniyetmələr üçün nəzərdə
tutulmuş cəzaçəkmə müəssisəsinin
iş təcrübəsi ilə tanış olmuş, rəhbərliklə
fikir mübadiləsi aparmışdır.
Nümayəndə heyətinin
üzvləri Brandenburq əyalətinin paytaxtı Potsdam şəhərində
müasir avadanlıqla təchiz edilmiş Ədliyyə Mərkəzində
olmuş, mərkəzdə yerləşən əyalət
konstitusiya məhkəməsi, əyalət məhkəməsi,
əyalət prokurorluğunun və Potsdam şəhər məhkəməsinin
rəhbərləri ilə görüş keçirmişlər.
Görüşdə Brandenburq əyalətinin hüquq sistemi
və iş təcrübəsi barədə ətraflı məlumat
verilmiş, qarşılıqlı maraq doğuran məsələlər
ətrafında geniş fikir mübadiləsi
aparılmışdır. Sonra nümayəndə heyəti
Potsdam şəhəri ilə tanış olmuş, məşhur
Potsdam konfransının keçirildiyi binaya baş çəkmişdir.
Səfər çərçivəsində
Almaniyanın federal ədliyyə naziri B.Tsüpries ilə
keçirilmiş görüşdə hər iki nazirlik
arasında hüquq sahəsində qarşılıqlı
maraq doğuran məsələlər ətrafında geniş
fikir mübadiləsi aparılmış, əməkdaşlığın
perspektivləri müzakirə olunmuşdur.
Görüşdə Azərbaycanın
ədliyyə sahəsində kadrlarının Almaniyada hazırlanması,
ixtisasının artırılması, notariusların və məhkəmə
icraçılarının Almaniyada təcrübə
keçməsi məsələlərinə dair
qarşılıqlı razılaşmalar əldə
olunmuşdur. Bu ilin noyabrında bir qrup hakimin və notarius
işçisinin Almaniyaya səfəri
planlaşdırılır.
Sonda nazirlər
Almaniyanın Federal Ədliyyə Nazirliyi ilə Azərbaycan
Respublikasının Ədliyyə Nazirliyi arasında hüquq
sahəsində qarşılıqlı əməkdaşlığa
dair hüquqi sənədi - Birgə Bəyanatı
imzalamışlar.
Vüqar SEYİDOV,
AzərTAc-ın xüsusi müxbiri
Berlin
Azərbaycan.- 2009.- 17 iyun.- S. 3.