Kombayn dənizdə
üzən gəmini xatırladır. İrəlilədikcə
taxıl zəmisində cığır açırdı. Biçilən
yerlə biçilməyən sahə arasında təzad
yaranırdı. Bir hissə torpaq görünən sahə,
digər tərəf isə qurşaqdan yuxarı olan taxıl
zəmisi.
Torpaq mülkiyyətçisi
Tağı Xankişiyev yavaş-yavaş kombaynın
arxasınca addımlayaraq biçinə nəzarət edirdi. Bizi
görcək sahənin kənarına gəldi.
Görüşüb hal-əhval tutduqdan sonra Allahın bol
ruzi yetirdiyindən razılıq etdi. Dedi ki, bu il
taxılçılıq üçün çox uğurlu
oldu. Payızda əkindən sonra, yazda - aprel ayının
birinci ongünlüyündə yağan yağışlar sahələrin
muradını verdi. Bol məhsul yetişib.
Söhbətimizin bu
yerində "Niva" kombaynı sahənin
qırağında dayanan lafetə yan aldı. Telman: "Məni
bağışlayın, taxılın boşaldılmasına
kömək edib gəlirəm" - deyib bizdən
uzaqlaşdı. Kombayn yükünü boşaldaraq yenidən
sahəyə girdi. Sonra qayıdaraq bildirdi ki, dolu dənlərdir.
Yəqin bir bunker 2 tondan aşağı gəlməyəcək.
Telmangil dədə-babadan
əkinçilik və heyvandarlıqla məşğuldur. Elə
buna görə də rayonda, yaşadıqları Bəydili kəndində
hamı onları halal ailə kimi tanıyır. Hazırda
Tağı, Nağı, Zakir qardaşları birlikdə fermer
təsərrüfatı yaradıblar. Bu ilin məhsulu
üçün keçən ilin payızında 60 hektar sahəyə
taxıl əkiblər. Bundan 60 hekratı arpa, 40 hektarı
buğdadır. Qardaşlar dövlət tərəfindən kənd
təsərrüfatı məhsulları
istehsalçılarına, habelə buğda əkib - becərənlərə
edilən güzəştlərdən bəhrələnərək
taxıl istehsalına diqqəti artırmışlar. Bu il hər
hektardan azı 40 sentner məhsul götürməyi
planlaşdırıblar.
Amma fermer məhsulun
aşağı qiymətə satıldığını,
keçənilki məhsuldan hələ 30 ton qapısında
qaldığını da dedi. Qayğılı halda bildirdi
ki, builki məhsulu necə edəcəklərini bilmirlər.
İndi arpanın 1 kiloqramını 7 - 8 qəpikdən
yuxarı qiymətə götürmürlər. Bu isə çəkilən xərci
ancaq ödəyir.
Biləsuvar rayonu üzrə
keçən ilin payızında 29 min 26 hektara taxıl əkilmişdir.
Ondan 18 min 177 hektarı buğda və 10 min 849 hektarı
arpadır. Fermer və torpaq mülkiyyətçiləri gərgin
zəhmət bahasına bol məhsul yetişdirmişlər. Rayonda
bir neçə gündür ki, arpa biçilir. Hamı
öz məhsulunu vaxtında və itkisiz yığmaq
üçün gün çıxandan batana kimi sahələrdə
çalışır. Yığımla əlaqədar
rayonda qərargah yaradılmışdır. 70 kombaynın hər
birinin səmərəli, fasiləsiz işləməsi,
biçinin optimal müddətdə başa
çatdırılması üçün bütün
qüvvələr səfərbərliyə
alınmışdır.
Seyran CAVADOV
Azərbaycan.- 2009.- 17
iyun.- S. 6.