İmişli sənaye şəhərinə çevrilir

2009-2013-cü illəri əhatə edən regionların sosial-iqtisadi inkişafı 2-ci Dövlət Proqramında nəzərdə tutulan genişmiqyaslı tədbirlərin icrasına İmişli rayonunda mütəşəkkilliklə başlanmışdır. Dövlət Proqramının birinci mərhələsi uğurla yekunlaşmış İmişlinin siması ötən 5 ildə əsaslı şəkildə dəyişmişdir.

Bölgədə fəaliyyətə başlayan yeni zavodların, iri istehsal və emal müəssisələrinin hesabına rayonun sənaye potensialı müqayisəolunmaz dərəcədə artmış, əhalinin yüksək maaşlı iş yerləri ilə təminatı sahəsində böyük uğurlar əldə edilmişdir.

Aydan-aya dəyişən bu diyarda abadlıq, quruculuq işləri bu gün də davam etdirilir. Dövlət Sosial Müdafiə Fondu İmişli rayon şöbəsi üçün yeni inzibati binanın bu günlərdə açılış mərasimi keçirildi, Sarıxanlı kənd 2 saylı orta məktəbi üçün yüksək zövqlə müasir tələblərə cavab verən yeni bina inşa olundu, Əmək və Əhalinin Sosial Müdafiəsi Nazirliyinin yerli şöbəsi və Qaz İstismarı İdarəsi üçün yeni inzibati binaların tikintisi başa çatdırıldı. Rayon gənclərinin böyük maraqla gözlədikləri Olimpiya İdman Kompleksinin tikintisi isə sürətlə davam edir.

İmişlidə sahibkarlığın inkişafı üçün münbit və əlverişli şərait yaradılmışdır. Dövlət səviyyəsində göstərilən qayğı və diqqətin sayəsində özəl sektor inkişaf edir. Cari ilin birinci rübündə rayon iqtisadiyyatının əsas sahələri üzrə qeyri-dövlət sektorunun payının 96,3, həmin göstəricinin kənd təsərrüfatı, tikinti, ticarət və nəqliyyatda 99,9, sənayedə 94 faiz olması bunu təsdiqləyir.

İmişlidə aqrar bölmənin inkişafı da diqqət mərkəzindədir. Kənd təsərrüfatı məhsullarının istehsalçılarına güzəştlərin olunması kəndlini torpağa möhkəm bağlayıb. Kəndli torpaqdan daha çox qazanc götürmək və bu hesaba ailəsinin firavan həyatını təmin etmək üçün qüvvə və bacarığını əsirgəmədən çalışır. Torpaq isə çəkilən zəhməti, axıdılan alın tərini heç vaxt bəhrəsiz qoymur. Bu ilin məhsulu üçün 19.143 hektar sahədə taxıl əkilmişdir və artıq zəmilərdə taxıl biçininə başlanmışdır. İlk günlərin nəticələri deməyə əsas verir ki, bu il İmişlidə rekord miqdarda taxıl istehsal olunacaq. Yetişdirilmiş məhsulun tez və itkisiz yığılması üçün geniş imkanlar var. Kifayət qədər texnika cəmləşən rayon "Aqroservis" müəssisəsində kəndlərdən gələn sifarişlərə operativ əməl olunur.

Dövlətin qayğısı, rayonda həyata keçirilən məqsədyönlü tədbirlər nəticəsində rayon əhalisinin həyat tərzi, dolanışıq səviyyəsi yaxşılaşır. Prezidentin 20 iyun 2007-ci il tarixli sərəncamına əsasən Ekologiya və Təbii Sərvətlər Nazirliyi tərəfindən bu il Muradallı, Məzrəli, Yalavac, Qulubəyli, Qaradonlu, Qaraqaşlı, Xoşçobanlı, Xubyarlı, Göbəktala, Cavadxanlı kəndlərində modul tipli su təmizləyici qurğular quraşdırılaraq əhalinin istifadəsinə verilmişdir. Otuziki, Şahverdili, Telişli, Qaravəlli, Məmmədli və Cəfərli kəndlərində isə belə qurğuların quraşdırılması ilin sonunadək reallaşacaq.

Qulubəyli kəndinin ağsaqqal sakini Sadatxan Əzizov:

- Bu gün Azərbaycanın sosial-iqtisadi cəhətdən sürətlə inkişaf etdiyini gündəlik həyatımızda görürük. Doğma İmişli son bir neçə ildə elə sürətlə dəyişib ki, onu tanımaq olmur.

Dəyişən təkcə rayon mərkəzinin görkəmi deyil. Həyat tərzimiz də dəyişir. Elektrik enerjisinin böyük fasilələrlə verilməsi son zamanlaradək ən böyük problem idi. İndi bu sahədə korluğumuz yoxdur. Rayon mərkəzinə verilən təbii qaz artıq kəndlərə ayaq açıb. Bizi ən çox sevindirən isə təmiz su həsrətimizə son qoyulmasıdır. Bu ilin əvvəllərində kəndimizdə quraşdırılmış sutəmizləyici qurğunun açılış mərasimi əsl el şənliyinə çevrildi. Bəlkə də kənd camaatı heç vaxt belə sevinməmişdi. Ömrümün çox hissəsini yaşamışam. Amma bütün bu işlər ömrümə ömür calayır.

Lazım QULİYEV

Azərbaycan.- 2009.- 17 iyun.- S. 6.