Tərtər füsunkar diyara çevrilir

Tərtər şəhəri coğrafi cəhətdən çox əlverişli məkanda yerləşir. Suyu saf, havası təmizdir. Tərtər çayının yatağı dağların buz kimi havasını çəkib buraya çatdırır. Mənbəyini Tərtər çayından götürən çox saylı böyük arxlar şəhərin bir neçə yerindən keçməklə başqa bir gözəllik yaradır. Başdan-başa yaşıllığa bürünən Tərtər şəhərində bu arxların müstəsna rolu vardır. Ancaq çox təəssüf ki, indi bu arxlara su təsadüfdən-təsadüfə buraxılır. Səbəb Tərtərçay dəryaçasının erməni işğalı altında olmasıdır.

Anbarda suyun səviyyəsi normadan artıq qalxıb narahatlıq doğurmasa,Tərtər çayının yatağı həftələrlə, bəzən aylarla quru qalır. Belə olanda əkinlərə ciddi ziyan dəyir, zəmilər quruyub məhv olur.

Tərtərlilərdə vətənpərvərlik hissi də çox güclüdür. Qarabağ savaşında düşmənə bir qarış torpaq verməyən tərtərlilər doğma diyarlarını sonsuz məhəbbətlə sevir, onun hər qarışını cənnətə döndərmək üçün əllərindən gələni əsirgəmirlər. Odur ki, çəkilən zəhmətin nəticəsi ürəkaçır, gözoxşayır.

Nankor qonşularımız olan ermənilərlə üzbəüz mövqelərdə yaşayan tərtərlilər doğma şəhəri böyük ürəklə başdan-başa yenidən qururlar. Burada hansı səmtə üz tutsan adamların daş üstə daş qoyduğunu görərsən. Ən başlıcası odur ki, hər iş zövqlə görülür. Heydər Əliyev prospekti 2,5 kilometr uzadılaraq Tərtər çayı üzərindəki yeni körpüyə çatdırılmışdır. Yeni salınmış parkın ərazisinə 50 mindən çox qızıl gül, Eldar şamı, sərv, çinar, söyüd və müxtəlif meyvə ağacları əkilmişdir. Ulu öndərin adını daşıyan prospektin yeni qurulan hissəsində indi də qızğın iş gedir. Magistral yol genişləndirilmişdir. Prospekt boyunca müasir işıqlandırma sistemi quraşdırılmış, yeni səkilər salınmışdır.

Parkların, seyrəngahların, istirahət guşələrinin sayı da artır. Bəzən Tərtərə bulaqlar şəhəri də deyirlər. Milli memarlıq üslubunda tikilmiş "Ceyran bulağı", "Qoşa fontan bulağı", "Səhəng bulağı" yay günlərində şəhər sakinlərinə rahatlıq, könül xoşluğu gətirir.

Şəhərin gözəl görünməsində Heydər Əliyev adına parkın xüsusi yeri vardır. Demək olar mərkəzdə yerləşən bu park əhalinin sevimli istirahət yerinə çevrilmişdir. Qaya parçaları ilə tikilən şəlalə kompleksi parka xüsusi yaraşıq verir. Burada yay konsert zalı da inşa edilmişdir.

Aparılan abadlıq-quruculuq işləri ilə bağlı rayon icra hakimiyyəti başçısının birinci müavini Vidadi Bəylərov dedi ki, hər kəs çalışır ki, yaradılan gözəlliyə öz töhfəsini versin. İşlərin çoxunu daxili imkanlar hesabına, iməcilik yolu ilə görürük. Məqsədimiz Azərbaycanın bir parçası olan Tərtəri gözəlliklər diyarına çevirməkdi.

Lazım QULİYEV

Azərbaycan.- 2009.- 18 iyun.- S. 4.