İyunun 16-da BMT-nin
Vyana bölməsində Avropada narkotiklərlə mübarizə
sahəsində fəaliyyət göstərən
hüquq-mühafizə orqanları rəhbərlərinin
(HONLEA) VIII müşavirəsi öz işinə
başlamışdır. İyunun 19-dək davam edəcək
müşavirə BMT-nin Narkotiklər və Cinayətkarlıqla
Mübarizə üzrə İdarəsinin (BMTNC) ev sahibliyi ilə
keçirilir.
Müşavirənin məqsədi
narkotiklərlə mübarizə sahəsində regional və
subregional əməkdaşlıqla bağlı mövcud vəziyyəti
müzakirə etmək və HONLEA-nın VII müşavirəsinin
yekun tövsiyələrinin həyata keçirilməsi məsələləri
ətrafında fikir mübadiləsi aparmaqdır. Müvafiq
işçi qruplarda Avropa regionundakı hüquq-mühafizə
orqanlarının üzləşdiyi operativ və digər
spesifik problemlərin müəyyənləşdirilməsi,
narkotiklərin daşınması ilə bağlı milli,
subregional və regional səviyyədə tətbiqi
mümkün tədbirlər müzakirə ediləcək,
müvafiq təklif və tövsiyələr plenuma təqdim
olunacaqdır.
Müşavirədə
Azərbaycanı Daxili İşlər Nazirliyi Narkotiklərlə
Mübarizə Baş İdarəsinin rəisi, polis
general-mayoru Həzi Aslanovun rəhbərliyi ilə Dövlət
Gömrük Komitəsi və Dövlət Sərhəd Xidmətinin
əməkdaşlarından ibarət nümayəndə heyəti
təmsil edir.
H.Aslanov müşavirədə
"Azərbaycan Respublikasında narkotik vasitələrin və
onların prekursorlarının qeyri-qanuni dövriyyəsinə
qarşı mübarizə üzrə fəaliyyətin təşkili"
mövzusunda məruzə ilə çıxış
etmişdir.
Məruzədə
bildirilmişdir ki, narkotik vasitələrin qanunsuz dövriyyəsi
beynəlxalq terrorizm və mütəşəkkil cinayətkarlığın
digər formalarının əsas maliyyə mənbəyi kimi
cəmiyyətin sağlam inkişafına mənfi təsir
göstərir, hər bir dövlətin sosial asayişinə
təhlükə yaradır. Bu səbəbdən də
problemin həllinə
kompleks yanaşma tələb olunur.
Azərbaycan
Respublikasının geostrateji vəziyyəti
qaçaqmalçılara onun ərazisindən narkotik vasitələrin
Avropaya daşınması üçün tranzit ölkə
kimi sui-istifadə etməsinə şərait yaradır. Xüsusilə
qeyd edilməlidir ki, Azərbaycanın 20 faiz ərazisinin Ermənistan
tərəfindən işğalı təkcə ölkəmizdə
deyil, eyni zamanda bütün regionda narkotik vasitələrlə
bağlı vəziyyətə öz mənfi təsirini
göstərməkdədir. Dağlıq Qarabağ və ona
bitişik yeddi rayonun Ermənistan tərəfindən
işğalı nəticəsində Azərbaycan İran
İslam Respublikası ilə 132 kilometrlik sərhəd xətti
üzərində nəzarəti itirmişdir. Göstərilən
ərazilərdə Azərbaycanın dövlət nəzarəti
olmadığından narkomafiyaya narkotik tərkibli bitkilərin
becərilməsi, narkotik vasitələrin istehsalı, o
cümlədən qaçaqmalçılıq yolu ilə
satış üçün başqa ölkələrə
aparılmasına münbit şərait yaranmışdır.
Qeyd edilmişdir ki, Azərbaycanda
ölkə rəhbərliyi narkotik vasitələrin qanunsuz
dövriyyəsinə qarşı mübarizə ilə
bağlı hüquqi bazanın gücləndirilməsi,
hüquq-mühafizə orqanlarının fəaliyyətinin səmərəsinin
artırılması və beynəlxalq əməkdaşlığın
dərinləşdirilməsinə xüsusi diqqət yetirir. 2005-ci
ildə Azərbaycanda "Narkotik vasitələrin, psixotrop
maddələrin və onların prekursorlarının
dövriyyəsi haqqında" Qanun qəbul edilmişdir. Azərbaycan
Prezidentinin Sərəncamı ilə yaradılmış
Narkomaniya və narkotik vasitələrin qanunsuz dövriyyəsinə
qarşı mübarizə üzrə Dövlət
Komissiyası xüsusi xidmət və hüquq-mühafizə
orqanları arasında bu sahədə məlumat mübadiləsi
aparılmasına, əməliyyat-axtarış və
profilaktiki tədbirlərin həyata keçirilməsinə,
beynəlxalq əməkdaşlığın genişləndirilməsinə
xidmət edir.
Bununla yanaşı,
Daxili İşlər Nazirliyində narkotik vasitələrin
qanunsuz dövriyyəsi və narkotik aludəçiləri ilə
bağlı ümumrespublika məlumat bazası
yaradılmışdır. Həmin məlumat bazası
prokurorluq, ədliyyə, milli təhlükəsizlik,
gömrük, sərhəd xidməti orqanlarının
informasiyalarını özündə ehtiva edir və bu da
ölkədəki narkotiklərlə bağlı vəziyyəti
real qiymətləndirmək, cinayətkarlığı
proqnozlaşdırmaq, bu sahə ilə mübarizədə
prioritetləri müəyyənləşdirmək imkanı
yaradır.
BMT-nin tövsiyələrinə
müvafiq olaraq, respublikamızda 2012-ci ilədək narkomaniya,
narkotiklərin və psixotrop maddələrin qanunsuz dövriyyəsinə
qarşı mübarizə üzrə Milli Proqram həyata
keçirilir. Narkotiklərlə mübarizə sahəsində
milli qanunvericilik aktları ilə yanaşı, Azərbaycan
BMT-nin üç mühüm konvensiyasına
qoşulmuşdur. Eyni zamanda, BMT-nin İnkişaf Proqramı və
Avropa İttifaqının maliyyələşdirdiyi "Cənubi
Qafqazda Narkotiklərə Nəzarət" (SKAD) regional
yardım Proqramı çərçivəsində Azərbaycana
texniki və metodiki yardım göstərilir, treninqlər təşkil
edilir və xüsusi texnika və nəqliyyat vasitələri
ayrılır.
Həmçinin vurğulanmışdır
ki, son illərdə ölkə rəhbərliyinin
yürütdüyü gənclər siyasəti, yüksək
səviyyəli forumların təşkili narkomaniyanın
qarşısının alınmasında əhəmiyyətli
profilaktiki rol oynayır. Hazırda dövlət səviyyəsində
ölkədə narkotiklərlə bağlı vəziyyətə,
narkotiklərin ölkəyə gətirilmə və
aparılması kanallarına nəzarətin gücləndirilməsi
üçün lazımi ölçülər
götürülür.
H.Aslanov məruzəsinin
yekununda bildirmişdir ki, narkotik vasitələrin qeyri-qanuni
dövriyyəsi ilə bağlı qlobal problemin öhdəsindən
təkbaşına və birtərəfli tədbirlər vasitəsilə
gəlmək mümkün deyildir. Beynəlxalq əməkdaşlıq,
xüsusilə keçid dövrü iqtisadiyyatına sahib
ölkələrə, eləcə də silahlı
münaqişələrə cəlb olunmuş dövlətlərə
yardım göstərilməsi beynəlxalq bəla ilə
mübarizədə həlledici əhəmiyyətə
malikdir.
Qeyd edək ki, BMTNC-nin
müraciətinə əsasən, bir sıra ölkələrlə
yanaşı, Azərbaycan nümayəndə heyəti də
narkotiklərin qanunsuz dövriyyəsi ilə bağlı
ölkədəki vəziyyətə dair arayışı
müşavirənin yekun hesabatında nəzərə
alınması üçün təqdim etmişdir.
Müşavirə
çərçivəsində Azərbaycan nümayəndə
heyəti Rusiyanın Narkotiklərlə Mübarizə üzrə
Federal Xidməti rəisinin birinci müavini Vladimir
Kalandanın başçılıq etdiyi nümayəndə
heyəti ilə görüş keçirmişdir. Görüşdə
qarşılıqlı əməkdaşlıq perspektivləri
müzakirə olunmuşdur.
Azərbaycanın
Avstriyadakı səfiri, Vyanadakı beynəlxalq təşkilatlar
yanında daimi nümayəndəsi Fuad İsmayılov da
müşavirədə iştirak etmişdir.
Elgün NİFTƏLİYEV,
AzərTAc-ın xüsusi müxbiri
Vyana
Azərbaycan.- 2009.- 18 iyun.- S. 7.