İyunun 17-də
İqtisadi İnkişaf Nazirliyində Avropa İttifaqı
(Aİ)-Azərbaycan ticarət, iqtisadi və əlaqədar
hüquqi məsələlər üzrə altkomitənin VIII
iclası keçirilmişdir.
Tədbirdə ticarət
əlaqələrinin inkişafı, Aİ ilə ölkəmiz
arasındakı mövcud əməkdaşlığın vəziyyəti
və inkişaf perspektivləri müzakirə edilmişdir.
İclasda Azərbaycanda
həyata keçirilən islahatlar və əldə
olunmuş uğurlar barədə məlumat verilmişdir. Qeyd
olunmuşdur ki, dünyadakı maliyyə böhranı şəraitində
valyuta ehtiyatlarından səmərəli istifadə,
sahibkarlığa dövlət dəstəyinin gücləndirilməsi,
maliyyə intizamının möhkəmləndirilməsi,
milli valyutanın sabitliyinin qorunması və ölkədə
investisiya mühitinin yaxşılaşdırılması sahəsində
həyata keçirilən tədbirlər böhranın Azərbaycan
iqtisadiyyatına təsirini
neytrallaşdırmışdır. Dünya Bankı və
Beynəlxalq Maliyyə Korporasiyası tərəfindən
hazırlanan və biznes mühitinin əlverişliliyi üzrə
qiymətləndirməni özündə əks etdirən
nüfuzlu "Doing Business" hesabatında Azərbaycanın
reytinqi 2008-ci ildə 96-cı yerdən 33-cü yerə
yüksəlmiş və respublikamız dünyada ən islahatçı
ölkə elan edilmişdir.
Altkomitə Azərbaycanda
həyata keçirilən sosial-iqtisadi islahatları yüksək
qiymətləndirmiş və bu istiqamətdə əldə
olunan uğurların davam etdirilməsi zərurətini
vurğulamışdır.
Tərəflər
Aİ-də baş verən inteqrasiya və genişləndirmə
təmayüllərində Azərbaycanın fəal
iştirakını dəstəkləmiş və bu proseslərdə
birgə qurumların potensialından tam istifadə
olunacağına dair bir daha razılığa gəlmişlər.
İclasda, həmçinin
Aİ-nin təşəbbüsü olan "Şərq tərəfdaşlığı"nın
əhəmiyyəti qeyd olunmuş və bildirilmişdir ki, bu
təşəbbüs Azərbaycan və Aİ arasında əlaqələrin
yeni səviyyəyə çatdırılmasında xüsusi
rol oynayacaqdır.
İclasda Aİ-də
baş verən inteqrasiya prosesləri və dünyadakı
maliyyə-iqtisadi böhranın Aİ-yə təsiri və
böhrandan çıxış üçün
görülən tədbirlər barədə Azərbaycan tərəfinə
məlumat verilmişdir. Azərbaycan tərəfi isə
2008-ci ildə ölkədə Aİ ilə Tərəfdaşlıq
və Əməkdaşlıq Sazişindən irəli gələn
öhdəliklərin icrası ilə bağlı Avropa
Komissiyasına ətraflı məlumat təqdim etmiş,
komissiyanı maraqlandıran sualları
cavablandırmışdır.
Danışıqlar
çərçivəsində ölkə qanunvericiliyinin
Aİ-nin tələblərinə
uyğunlaşdırılması ilə bağlı fikir
mübadiləsi aparılmışdır. Altkomitə bu sahədə
görülən ardıcıl fəaliyyəti dəstəklədiyini
və bu istiqamətdə səylərin gücləndirilməsi
üçün Azərbaycanla əməkdaşlığa
hazır olduğunu bəyan etmişdir.
Tədbirdə Azərbaycan
tərəfdən İqtisadi İnkişaf, Xarici İşlər,
Maliyyə, Ədliyyə, Vergilər, Sənaye və Energetika,
Kənd Təsərrüfatı, Səhiyyə nazirliklərinin,
Mərkəzi Bankın, Standartlaşdırma, Metrologiya və
Patent üzrə Dövlət Komitəsinin, Dövlət
Gömrük Komitəsinin, Əmlak Məsələləri
Dövlət Komitəsinin, Dövlət Statistika Komitəsinin,
Satınalmalar üzrə Dövlət Agentliyinin və Müəllif
Hüquqları Agentliyinin nümayəndələri iştirak
etmişlər. Aİ-ni iclasda qurumun Azərbaycandakı
nümayəndəliyinin başçısı Alan
Vaddamsın rəhbərlik etdiyi nümayəndə heyəti
təmsil etmişdir.
AzərTAc
Azərbaycan.- 2009.- 18 iyun.- S. 5.