Azərbaycan Prezidenti
İlham Əliyevin rəhbərliyi ilə həyata
keçirilən irimiqyaslı iqtisadi, siyasi, hüquqi
islahatlar, sosial yönümlü dövlət proqramları,
ölkənin sosial-iqtisadi, mədəni tərəqqisi və
xalqımızın maddi rifah halının
yaxşılaşdırılması, o cümlədən müasir
tələblərə cavab verən təhsil, mədəniyyət,
səhiyyə müəssisələrinin və digər sosial
obyektlərin yaradılması istiqamətində
görülmüş möhtəşəm işlər əldə
edilmiş nailiyyətlərin əsasını təşkil
etmişdir.
Azərbaycan
Respublikası Baş Prokurorluğunun mətbuat xidmətinin məlumatında
bildirilir ki, dövlətimizin başçısı tərəfindən
təsdiq edilmiş "Şəffaflığın
artırılması və korrupsiyaya qarşı mübarizə
üzrə Milli Strategiya"nın həyata keçirilməsi
ilə bağlı 2007-2011-ci illər üçün Fəaliyyət
Planı"nda təhsil müəssisələrində
imtahanların aparılması mexanizminin təkmilləşdirilməsi
və şəffaflığın artırılması,
ictimai nəzarətin gücləndirilməsi, təhsil sahəsində
şikayətlərə baxılmasının səmərəliliyinin
artırılması, müəllimlərin sosial təminatının
gücləndirilməsi və s. tədbirlər nəzərdə
tutulmuşdur, bu sahədə məqsədyönlü işlər
davam etdirilir.
Təhsil müəssisələrində
mövcud olan mənfi halların aradan qaldırılması
ölkə rəhbərliyi tərəfindən daim diqqət
mərkəzində saxlanılır. Korrupsiya ilə əlaqədar
hüquqpozmalarla bağlı məlumatlara baxılması
işinin təkmilləşdirilməsi istiqamətində həyata
keçirilmiş tədbirlərin nəticəsidir ki, son
günlər orta məktəb şagirdlərinin
buraxılış imtahanlarından müvəffəqiyyətlə
keçmələri üçün rüşvət
toplamaqla məşğul olan korrupsiya şəbəkəsi
ifşa edilmişdir.
Uşaqlarının
orta məktəbin buraxılış imtahanlarında müvəffəqiyyət
qazanması üçün onlardan rüşvət
alınması barədə bir qrup Goranboy rayon sakininin
şikayət ərizələri üzrə Azərbaycan
Respublikasının Baş prokuroru yanında Korrupsiyaya
qarşı Mübarizə İdarəsi tərəfindən
müvafiq yoxlama aparılaraq Azərbaycan Respublikası Cinayət
Məcəlləsinin 308.1-ci (vəzifə səlahiyyətindən
sui-istifadə etmə) və 311.1-ci (rüşvət alma) maddələri
ilə cinayət işi başlanmışdır.
Həyata
keçirilmiş istintaq-əməliyyat tədbirləri nəticəsində
Goranboy rayon təhsil şöbəsinin müdiri Elmar Əliyevin
korrupsiya şəbəkəsi yaradaraq şöbənin
metodisti Faiq Dosiyevi və rayonun müxtəlif
yaşayış məntəqələrindəki orta məktəblərin
direktorları ilə qabaqcadan əlbir olmaqla cinayət əlaqəsinə
girərək XI sinif şagirdlərinin mərkəzləşdirilmiş
qaydada keçirilməsi nəzərdə tutulan test
imtahanlarında yüksək bal toplaması və attestatlar
verilməsi üçün onlardan pul
yığılmasını təşkil etməklə
külli miqdarda rüşvət alması təkzibedilməz dəlillərlə
sübuta yetirilmişdir.
İstintaqla, həmçinin
müəyyən edilmişdir ki, Elmar Əliyevin Goranboy rayon təhsil
şöbəsinin müdiri vəzifəsində işləyərkən
2008/2009-cu tədris ilində rayonun orta məktəblərində
təhsil alan XI sinif şagirdlərinin buraxılış
imtahanlarında yüksək bal toplaması və onlara
attestatlar verilməsinə yardım edəcəyi müqabilində
şagirdlərin hər birindən 100 manat və daha yüksək
məbləğdə pul yığılması barədə
Faiq Dosiyevə verdiyi göstərişi əsasında sonuncu əvvəlcədən
cinayət əlaqəsinə girdiyi, rayonun Səfikürd kənd
orta məktəbinin direktoru Cəmaləddin Nəsibov vasitəsilə
həmin məktəbin 21 nəfər XI sinif şagirdindən
1700 manat, Ağamalıoğlu kənd orta məktəbinin
direktoru İlqar Əliyev vasitəsilə 8 nəfər XI
sinif şagirdindən 800 manat, Goranboy şəhər 1
nömrəli orta məktəbin direktoru Xasay Qasımov vasitəsilə
17 nəfər XI sinif şagirdindən 1700 manat, Dəliməmmədli
şəhər orta məktəbinin direktoru Rövşən
Abbasov vasitəsilə 23 nəfər XI sinif şagirdindən
3350 manat məbləğində pul alaraq Elmar Əliyevə
vermişlər. Ümumilikdə isə Goranboy rayonunun əksər
orta məktəblərinin direktorları əsasən sinif rəhbərləri
vasitəsilə, ayrı-ayrı hallarda isə bilavasitə
şagirdlərdən və ya onların valideynlərindən
külli miqdarda pul toplayaraq Faiq Dosiyevə vermiş, o isə
öz növbəsində həmin pulları Elmar Əliyevə
çatdırmışdır.
Elmar Əliyevin iş və
yaşayış yerlərində aparılmış
axtarış zamanı Goranboy rayon orta məktəblərinin
IX və XI sinif şagirdlərinin adları və
qarşılarında müxtəlif pul məbləğləri
göstərilən siyahılar, siyahıların arxasında
hər məktəb üzrə toplanmış məbləğ,
təhsil şöbəsi tərəfindən mərkəzləşmiş
qaydada təşkil edilmiş buraxılış imtahanında
iştirak edəcək şagirdlərin bəzilərinin
imtahan verdiyi məktəbin adı və şagirdin kodu
yazılmış vərəqələr, şagirdlərin
müxtəlif seriya və nömrəli 1996/2002-ci illərdə
tədris müəssisəsini bitirmələrinə dair 44 ədəd
yazılmış, 27 ədəd isə boş əsas təhsil
haqqında şəhadətnamə və orta təhsil
haqqında attestat, Elmar Əliyevin yaşadığı evindən
və xidməti otağındakı seyfindən külli
miqdarda pul aşkar edilərək götürülmüş
və müvafiq qaydada rəsmiləşdirilmişdir. Eyni
zamanda, Faiq Dosiyev və digər məktəb direktorları tərəfindən,
şagirdlərdən pulun yığılmasını təsdiq
edən siyahılar istintaqa təqdim olunmuşdur.
Törətdikləri
cinayət əməlləri üzrə Cəmaləddin Nəsibov,
İlqar Əliyev, Xasay Qasımov və Rövşən
Abbasov qabaqcadan əlbir olan bir qrup şəxs tərəfindən
təkrar rüşvət almağa görə, Elmar Əliyev
və Faiq Dosiyev isə qeyd olunanlarla yanaşı, külli
miqdarda rüşvət almağa görə Azərbaycan
Respublikası Cinayət Məcəlləsinin müvafiq maddələri
ilə təqsirləndirilən şəxs qismində cəlb
edilməklə Elmar Əliyev, Cəmaləddin Nəsibov və
İlqar Əliyevin barəsində məhkəmənin qərarı
ilə həbs, Xasay Qasımov, Rövşən Abbasov və
Faiq Dosiyevin barəsində isə həbslə bağlı
olmayan digər növ qətimkan tədbirləri
seçilmişdir.
Hazırda həmin
iş üzrə cinayətin baş vermə səbəblərinin
müəyyən edilməsi, işin hərtərəfli, tam
və obyektiv araşdırılması istiqamətində
istintaq-əməliyyat tədbirləri davam etdirilir.
AzərTAc
Azərbaycan.- 2009.- 18 iyun.- S. 7.