Daxili İşlər
Nazirliyinin Baş Narkotiklərlə Mübarizə İdarəsi
və Dövlət Sərhəd Xidməti əməkdaşlarının
birgə həyata keçirdikləri tədbirlər nəticəsində
İrandan Azərbaycan ərazisinə
qaçaqmalçılıq yolu ilə külli miqdarda
narkotik vasitə keçirməyə cəhd göstərən
mütəşəkkil cinayətkar dəstə zərərsizləşdirilmişdir.
Daxili İşlər
Nazirliyi və Dövlət Sərhəd Xidmətinin mətbuat
xidmətlərinin birgə məlumatında bildirilir ki, iyunun
16-da saat 5 radələrində Lənkəran rayonunun
Göyşaban kəndi ərazisində dənizdən sahilə
yan alan, içərisində narkotik vasitə olan
qayığın saxlanılması məqsədilə
keçirilən xüsusi tədbir zamanı qayıqda olanlar
polisin təslim olmaq barədə tələbinə məhəl
qoymayaraq müqavimət göstərmişlər. Əməliyyatçıların
odlu silah işlətmək məcburiyyətində qalması
nəticəsində onlardan biri - Heydəri Zahid Rəşid
oğlu yaralanmışdır.
Cinayətkar dəstənin
bütün üzvləri - İran vətəndaşları
Vəhdət Nəzəri Bəhruz oğlu, Heydəri Zahid Rəşid
oğlu, Rahət Nihdani Məhinyəhya qızı və Zəhra
Cavad qızı tutulmuşlar. Onların istifadəsində
olan qayıqdan 50 kiloqramdan çox həşiş, 60 ədəd
avtomat patronu, 1 qaz balonu və istiqamət müəyyənləşdirən
2 ədəd GPS xüsusi qurğusu
götürülmüşdür.
Faktla əlaqədar
cinayət işi başlanmışdır, istintaq
aparılır.
AzərTAc
Azərbaycan.- 2009.- 18 iyun.- S. 7.