Xarici İşlər
Nazirliyinin mətbuat xidmətindən bildirmişlər ki,
görüşdə ikitərəfli münasibətlər və
qarşılıqlı maraq doğuran qlobal məsələlər
müzakirə olunmuşdur.
Nazirlər Azərbaycan
Prezidenti İlham Əliyevin 2006-cı ildə Yaponiyaya səfəri
çərçivəsində imzalanmış "Azərbaycan
Respublikası və Yaponiya arasında dostluq və əməkdaşlığın
gələcək inkişafı haqqında birgə Bəyannamə"ni
xatırladaraq, bugünədək əldə olunmuş nailiyyətləri
yenidən nəzərdən keçirmiş və ikitərəfli
münasibətlərin inkişaf istiqamətinə dair fikir
mübadiləsi aparmışlar.
E.Məmmədyarov və
H.Nakasone son illər ölkələrimiz arasında
aparılan fəal və məhsuldar dialoqu, eyni zamanda Prezident
İlham Əliyevin Yaponiyaya səfərindən sonra həm
Bakıda, həm də Tokioda dörd dəfə
aparılmış siyasi məsləhətləşmələri
yüksək qiymətləndirmişlər. Xarici işlər
nazirlikləri arasında əlaqələri genişləndirmək
məqsədi ilə nazirlər bir çox məsələləri,
o cümlədən ikitərəfli münasibətləri və
qarşılıqlı maraq doğuran beynəlxalq məsələlərin
bütün aspektlərini müzakirə etmək
üçün mütəmadi görüşlər
keçirməyi qərara almışlar. Hər iki tərəf
əmin etmişdir ki, konstruktiv və sabit dialoq gələcək
ikitərəfli əlaqələrin inkişafına öz
töhfəsini verəcəkdir.
Nazir E.Məmmədyarov
"Əyalətlərin su təminatı və kanalizasiya
layihəsi" üzrə və azimkanlı fermerlərə
Yaponiyanın ayırdığı Rəsmi İnkişaf
Yardımına (ODA) və qranta görə minnətdarlığını
bildirmişdir.
Nazir H.Nakasone isə
geosiyasət və enerji siyasəti baxımından Yaponiya
üçün əhəmiyyətli olan Azərbaycanın
sabitliyinin Cənubi Qafqazda inkişaf və sülhə
töhfə verəcəyini bildirmişdir. O, demokratikləşmə
və bazar iqtisadiyyatı istiqamətində daha çox
nailiyyət əldə etmək üçün Azərbaycan
tərəfindən atılan addımlarla bağlı əməkdaşlığın
genişləndirilməsinin davam etdirilməsi niyyətini ifadə
etmişdir.
Ölkələrimiz
arasında ticarət əlaqələrinin və sərmayələrin
artımında Yaponiya-Azərbaycan İqtisadi
Komissiyasının oynadığı rolun əhəmiyyətini
nəzərə alaraq, nazirlər komissiyanın yaxın gələcəkdə
növbəti görüşünün keçirilməsinin
vacibliyini vurğulamışlar. Bununla bağlı, Azərbaycan
əlverişli sərmayə mühitini daha da
yaxşılaşdırmaq niyyətini elan edir. Hər iki tərəf
Azərbaycanın Dünya Ticarət Təşkilatına daha
tez qəbul olunması üçün dövlətlərimiz
arasında indiyədək aparılan danışıqları
yüksək qiymətləndirmişdir.
Nazirlər bundan sonra da
enerji sahəsində əməkdaşlığın
inkişaf etdirilməsi niyyətində olduqlarını ifadə
etmişlər. Onlar Yaponiyanın özəl şirkətlərinin
Azərbaycanda "Azəri-Çıraq-Günəşli"
və Bakı-Tbilisi-Ceyhan layihələrindəki
iştirakını yüksək qiymətləndirmişlər.
Hər iki tərəf
dövlətlərimiz arasında millətlərarası və
mədəni mübadilənin gücləndirilməsinin elm, təhsil,
mədəniyyət və səhiyyə sahələri üzrə
qarşılıqlı anlaşmanın və əməkdaşlığın
genişləndirilməsində əhəmiyyətli
olduğunu vurğulamışdır.
Azərbaycan tərəfi
Yaponiyanın GUAM-a verdiyi dəstəyə və Yaponiya ilə
GUAM arasında fəal əməkdaşlıq və dialoqun
aparılmasına görə dərin minnətdarlığını
ifadə etmişdir. Nazirlər "GUAM-Yaponiya" dialoqunun
cari ilin fevralında Tokioda Milli Əlaqələndiricilər Görüşü
ilə davam etdirilməsinin və "Ticarət və sərmayələrin
dəstəklənməsi" mövzusunda seminarın
keçirilməsinin turizm, ticarət və sərmayələr,
enerjiyə qənaət və ətraf mühitin mühafizəsi
kimi qarşılıqlı maraq doğuran sahələrdə
gələcək əməkdaşlıq üçün
möhkəm bünövrənin yaranmasına kömək edəcəyini
bildirmişlər.
Hər iki tərəf
Ermənistan-Azərbaycan, Dağlıq Qarabağ
münaqişəsinin Azərbaycanın ərazi
bütövlüyü və suverenliyi, beynəlxalq səviyyədə
tanınmış sərhədlərinin
toxunulmazlığı prinsipi əsasında müxtəlif
yollarla, o cümlədən ATƏT-in Minsk qrupu çərçivəsində
sülh yolu ilə nizamlanmasının əhəmiyyətini
vurğulamışlar. Nazir H.Nakasone Yaponiyanın regionda
sülhün və sabitliyin əldə olunmasına istiqamətlənmiş
cəhdləri dəstəklədiyini, Cənubi Qafqazın
sülh və tərəqqi regionuna çevrilməsi
üçün böyük potensialın olduğunu, beynəlxalq
tərəfdaşların konstruktiv müdaxiləsini gözlədiyini
demişdir.
Nazir E.Məmmədyarov
Azərbaycanda minaların və partlamamış hərbi
sursatın təmizlənməsinə Yaponiyanın göstərdiyi
yardıma görə minnətdarlığını
bildirmişdir.
Nazirlər BMT daxilində
yaxından əməkdaşlıq, təşkilatın Təhlükəsizlik
Şurasında (TŞ) islahatların keçirilməsində,
o cümlədən şuranın daimi və daimi olmayan
üzvlərinin sayının artırılması sahəsində
nəzərdə tutulan işlərdə yaxından və fəal
iştirak etməyə hazır olduqlarını
vurğulamışlar. Bildirilmişdir ki, Azərbaycan
Yaponiyanın BMT-nin TŞ-da daimi üzvlüyünə dəstək
verir.
Görüşdə
qarşılıqlı maraq doğuran beynəlxalq məsələlərə,
o cümlədən Koreya Xalq Demokratik Respublikasındakı
(KXDR) vəziyyətə dair fikir mübadiləsi
aparılmışdır. Hər iki nazir BMT TŞ-nin qəbul
etdiyi 1874 saylı Qətnaməni bir daha təsdiq etmiş və
vurğulamışlar ki, KXDR BMT TŞ-nin bu və digər
müvafiq qətnamələrinin tələblərini yerinə
yetirməlidir. Tərəflər KXDR ilə əlaqədar
vacib olan, o cümlədən zorla qaçırma (abduksiya) məsələlərinin
tam şəkildə həll olunmasının vacibliyini qeyd
etmişlər.
AzərTAc
Azərbaycan.- 2009.- 19 iyun.- S. 4.