"Təhsil haqqında" qanun qəbul olundu

İyunun 19-da Azərbaycan Milli Məclisinin növbədənkənar sessiyasının növbəti iclası keçirildi. Gündəliyin müzakirəsinə keçməzdən əvvəl deputatlar bir sıra məsələlərə dair fikirlərini bölüşdülər. İlk söz alan deputat Fazil Mustafa bildirdi ki, bu günlərdə bir qrup deputatla birgə N hərbi hissəsində olduqdan sonra "Azadlıq" qəzeti onu tənqid edərək orduda baş verənləri şişirtməməkdə ittiham edib. Bundan təəssufləndiyini bildirən Fazil Mustafa qəzetin mövqeyini bu məsələyə naqis yanaşma kimi qiymətləndirdi. "Ən acınacaqlısı isə odur ki, bunu yazan jurnalist heç hərbi xidmət keçməyib" - deyən deputat əlavə etdi ki, son illərdə Azərbaycan Ordusunun maddi-texniki təchizatı, əsgərlərin ərzaq təminatı daha da yaxşılaşıb. Orduda olan proseslərin yalnız qara rəngdə verilməsi təəssüf hissi doğurur. Fazil Mustafa deputat həmkarlarını müntəzəm olaraq hərbi hissələrə getməyə, əsgərlərin döyüş ruhunun daha da artırılmasına stimul verməyə çağırdı.

Deputat Fəzail İbrahimli də çıxışında bu mövzuya toxundu. Onun sözlərinə görə, cəbhədə atəşkəs olsa da, işğalçı Ermənistanla ideoloji müharibə davam edir. Buna görə ordu ilə bağlı informasiyaların cəmiyyətə çatdırılması xüsusi həssaslıq tələb edir. Bəzən ordudan anlayışı olmayanların silahlı qüvvələr barədə yazdıqları sanki şəhərdə yaşayıb kənddən şeir yazan şairlərin hərəkətinə bənzəyir. Bu yaxınlarda qeyri-hökumət təşkilatlarının, mətbuat nümayəndələrinin iştirakı ilə bir qrup deputatın N hərbi hissəsində olduğunu xatırladan Fəzail İbrahimlinin qənaətinə görə, ölkəmizdə həyata keçirilən ordu quruculuğu kifayət qədər bəhrəsini verir. Deputat bildirdi ki, hərbi hissədə olduqdan sonra bir daha əmin olub ki, bu istiqamətdə mühüm addımlar atılır. Əsgərlərin əhval-ruhiyyəsi yüksəkdir. Düşmənlə üzbəüz dayanmış oğullarımızın vətənpərvərlik hissləri belə söyləməyə əsas verir ki, ölkəmizin hərbi qüdrəti və güclü potensialı var. Əgər Dağlıq Qarabağ münaqişəsi beynəlxalq hüquq normaları çərçivəsində həllini tapmasa, məsələ silahlı qüvvələrimizin Ali Baş Komandanının bircə əmri ilə yoluna qoyula bilər.

İclasda ilk olaraq "Azərbaycan Respublikasının İnsan hüquqları üzrə müvəkkili (ombudsman) haqqında" Azərbaycan Respublikasının Konstitusiya Qanununda dəyişiklik edilməsi barədə" Azərbaycan Respublikası Konstitusiya Qanununun layihəsi (ikinci oxunuşda) müzakirəyə çıxarıldı. Spiker Oqtay Əsədov bildirdi ki, Konstitusiya qanununun layihəsi prosedur qaydalara uyğun olaraq gündəliyə salınmışdır.

Milli Məclisin Hüquq siyasəti və dövlət quruculuğu komitəsinin sədri Əli Hüseynov dedi ki, layihənin birinci səsverməsindən 6 aydan artıq vaxt ötür. Komitə sədri bir daha Konstitusiya qanununa təklif olunan dəyişikliyi diqqətə çatdırdı. Dəyişikliyə əsasən, Konstitusiya qanununun 16.1-ci maddəsində "şərti maliyyə vahidinin 1200 mislinə bərabər məbləğdə" sözlərinin "1320 manat məbləğində" sözləri ilə əvəzlənməsi təklif olunur. Konstitusiya qanununun layihəsi ikinci səsvermədə qəbul olundu.

Sonra "Təhsil haqqında" Azərbaycan Respublikası Qanununun layihəsi (üçüncü oxunuşda) müzakirəyə çıxarıldı. Milli Məclisin Sədri Oqtay Əsədov bütün aidiyyəti orqanların qanun layihəsinin üzərində səylə çalışdıqlarını bildirdi və artıq üçüncü oxunuş olduğu üçün deputatları müzakirələr aparılmadan bu məsələyə münasibət bildirməyə çağırdı.

Milli Məclisin Elm və təhsil komitəsinin sədri Şəmsəddin Hacıyev layihəyə ikinci oxunuşdan sonra edilən düzəlişlər barədə məlumat verdi. Şəmsəddin Hacıyev dedi ki, qanun layihəsinin yüksək səviyyədə hazırlanmasında ölkə başçısı cənab İlham Əliyevin təhsilə diqqət və qayğısı mühüm rol oynamışdır. Bu layihənin ikinci oxunuşda təsdiqindən ötən 6 ay ərzində deputatlar tərəfindən edilən təkliflər nəzərə alınaraq sənəd üzərində ciddi iş aparılıb. Bu müddətdə Təhsil, Səhiyyə, Ədliyyə, Vergilər, Xarici İşlər nazirliklərindən, Azərbaycan Milli Elmlər Akademiyasından, Tələbə Qəbulu üzrə Dövlət Komissiyasından, siyasi partiya və qeyri-hökumət təşkilatlarından daxil olan təkliflərin böyük əksəriyyəti layihədə öz əksini tapmışdır.

Milli Məclisin Elm və təhsi komitəsinin iyunun 16-da keçirilmiş iclasından sonra da layihədə bəzi düzəlişlər edilib, müəyyən dəyişikliklər aparılıb. Tələbə Qəbulu üzrə Dövlət Komissiyasının təklifi ilə layihəyə iki yeni bənd əlavə edilib. Ən çox düzəliş isə Maliyyə Nazirliyinin təklifləri əsasında aparılıb. Beləliklə, bütün təklif və rəylər nəzərə alınıb.

Parlamentin komitə sədri deputatların suallarını da cavablandırdıqdan sonra "Təhsil haqqında" Azərbaycan Respublikası Qanununun layihəsi üçüncü oxunuşda səsə qoyularaq qəbul edildi.

Milli Məclisin İqtisadi siyasət komitəsinin sədri Ziyad Səmədzadə "Büdcə sistemi haqqında" Azərbaycan Respublikasının Qanununa əlavələr və dəyişikliklər edilməsi barədə" qanun layihəsini müzakirəyə təqdim etdi. Bildirdi ki, qanun layihəsinə əlavə və dəyişikliklər büdcə sisteminin daha da təkmilləşdirilməsinə xidmət edir. Əlavə və dəyişikliklərin bir qismi isə redaktə xarakterlidir. Qanun layihəsi təsdiq olundu.

Parlamentin İqtisadi siyasət komitəsinin sədri "Azərbaycan Respublikasının Vergi Məcəlləsinə əlavələr və dəyişikliklər edilməsi haqqında" qanun layihəsi barədə də məlumat verdi. Komitə sədrinin sözlərinə görə, təklif olunan 46 əlavə və dəyişiklik vergi ödəyicilərinin hüquqlarının, vergi inzibatçılığının artırılmasını və vergi nəzarətinin gücləndirilməsini özündə ehtiva edir. Bir qisim əlavə və dəyişiklik isə redaktə xarakterlidir.

İclasda "Azərbaycan Respublikasının Milli Bankı haqqında" qanuna təklif olunan dəyişikliklər və əlavələr də təsdiq edildi.

Sonra Milli Məclisin Regional məsələlər komitəsinin üzvü Tahir Rzayev "Azərbaycan Respublikasının Füzuli rayonunun inzibati ərazi bölgüsündə qismən dəyişikliklər edilməsi haqqında" qanun layihəsini müzakirəyə təqdim etdi. Layihədə Füzuli rayonunu Birinci Haramı qəsəbə inzibati ərazi dairəsi və İkinci Haramı qəsəbə inzibati ərazi dairəsi tərkibindəki qəsəbələrin ayrılması və hər bir qəsəbə mərkəz olmaqla yeni inzibati ərazi dairələrinin yaradılması təklif olunurdu. Birinci Haramı qəsəbə inzibati ərazi dairəsində 5, İkinci Haramı qəsəbə inzibati ərazi dairəsində 6 qəsəbə var. Qanun layihəsi təsdiq olundu.

Qısa fasilədən sonra Hacıqabul rayonunun Abdulyan kəndinin adının dəyişdirilməsi haqqında qanun layihəsi müzakirə edildi. Deputatlardan Fazil Mustafa, Fəzail İbrahimli bu məsələ ilə bağlı fikirlərini bildirdilər. Qanun layihəsi müzakirələrin sonunda səsə qoyularaq qəbul edildi.

Sonra Milli Məclisin Regional məsələlər komitəsinin sədri Arif Rəhimzadə "Naxçıvan Muxtar Respublikasında bələdiyyələrin birləşmə yolu ilə yaradılması haqında" qanun layihəsini müzakirəyə təqdim etdi. Arif Rəhimzadə bildirdi ki, qanun layihəsində Naxçıvan Muxtar Respublikasında 84 bələdiyyənin birləşməsi yolu ilə 40 böyük bələdiyyənin yaradılması nəzərdə tutulur. Qanun layihəsinə bəzi bələdiyyələrin Naxçıvan Muxtar Respublikasının Babək rayonuna yox, Naxçıvan şəhərinə aid edilməsi ilə bağlı texniki düzəlişlər əlavə edilib.

Müzakirələr zamanı deputat İsa Həbibbəyli bildirdi ki, bələdiyyələrdə islahatların aparılması zamanın tələbidir. Birləşmə yolu ilə yeni bələdiyyələrin yaradılması yerli özünüidarəetmənin təkmilləşdirilməsinə öz töhfəsini verəcəkdir. Qanun layihəsinin qəbul edilməsi yerli özünüidarəetmə orqanlarının cəmiyyətdə nüfuzunun artmasına müsbət təsir göstərəcək. Müzakirələrin sonunda qanun layihəsi səsə qoyularaq qəbul edildi.

Deputatlar "Bələdiyyələrin əraziləri və torpaqları haqında" Azərbaycan Respublikasının Qanununa əlavə edilmiş "Azərbaycan Respublikasında bələdiyyələrin siyahısı"nda dəyişikliklər edilməsi barədə" qanun layihəsinə də müsbət münasibət bildirdilər.

Daha sonra iclasda Milli Məclisin Sosial siyasət komitəsinin sədri Hadı Rəcəbli "Bədən tərbiyəsi və idman haqqında" Azərbaycan Respublikası Qanununun layihəsini (ikinci oxunuşda) parlamentin müzakirəsinə təqdim etdi. Sosial siyasət komitəsinin sədri bildirdi ki, Milli Məclisin yaz sessiyasının plenar iclasında "Bədən tərbiyəsi və idman haqqında" Azərbaycan Respublikası Qanununun layihəsi geniş müzakirə olunaraq birinci oxunuşda qəbul edilib. Deputatlar qanun layihəsinə konstruktiv təkliflər vermişdir ki, bu da sənədin daha işlək olmasına xidmət edirdi.

Ötən müddət ərzində bu sənəd işçi qrupunun və parlamentin Sosial siyasət komitəsinin iclaslarında geniş müzakirə olunmuşdur. Müzakirələr zamanı qanun layihəsinə redaktələr, dəyişikliklər edilmiş, bəzi müddəalar mövcud qanunvericiliyə uyğunlaşdırılmışdır.

Deputatlardan Nazim Məmmədov, Fazil Mustafa, Elmira Axundova, Adil Əliyev, Siyavuş Novruzov qanun layihəsi ilə bağlı təkliflərlə çıxış etdilər. Müzakirələrin sonunda qanun layihəsi səsə qoyularaq ikinci oxunuşda qəbul edildi.

İclasda Milli Məclisin Hüquq siyasəti və dövlət quruculuğu komitəsinin sədri Əli Hüseynov "Fərdi məlumatlar haqqında" Azərbaycan Respublikası Qanununun layihəsini deputatların müzakirəsinə təqdim etdi. O bildirdi ki, ötən müddət ərzində Milli Məclis tərəfindən qəbul olunmuş qanunlarda fərdi məlumatlarla bağlı müəyyən maddələr olsa da, qanunvericilikdə bu sahənin tənzimlənməsi mexanizmi hələ də mövcud deyil. "Fərdi məlumatlar haqqında" qanun layihəsində Azərbaycanın qoşulduğu beynəlxalq konvensiyanın tələbləri yerinə yetirilmişdir. Sənəddə fərdi məlumatların toplanılması, işlənilməsi, mühafizəsinin qanunvericilik əsasları və elmi prinsipləri öz əksini tapmışdır. Milli Məclisin Hüquq siyasəti və dövlət quruculuğu komitəsinin sədri bildirdi ki, müzakirəyə çıxarılan qanun layihəsi Azərbaycan Respublikası Konstitusiyasında şəxsi toxunulmazlıq hüququnu nəzərdə tutan müvafiq maddənin icrası baxımından zəruridir. "Fərdi məlumatlar haqqında" qanun layihəsi bu sahəni tənzimləmək üçün yetərli hazırlanmışdır.

Deputatlardan Ərəstun Cavadov, Aydın Həsənov qanun layihəsinin fərdi məlumatların toplanılmasının, işlənilməsinin və mühafizəsi ilə bağlı münasibətləri tənzimləmək məqsədi daşıdığını deyərək ona müsbət münasibət bildirdilər. Qanun layihəsi səsə qoyularaq qəbul edildi.

Sonra Milli Məclisin Hüquq siyasəti və dövlət quruculuğu komitəsinin sədri Əli Hüseynov "Dini etiqad azadlığı haqqında" Azərbaycan Respublikasının Qanununa əlavələr və dəyişiklik edilməsi haqqında qanun layihəsini və Azərbaycan Respublikasının bəzi qanunvericilik aktlarına əlavələr və dəyişikliklər edilməsi haqqında qanun layihələrini Milli Məclisin müzakirəsinə təqdim etdi.

Əli Hüseynov bildirdi ki, "Dini etiqad azadlığı haqqında" qanuna nəzərdə tutulan əlavə və dəyişikliklər dini etiqad azadlığı məsələsini məhdudlaşdırmır. Məqsəd ibadət yerlərinə rəhbərlik edən şəxslərin təyinatında dövlət orqanı ilə dini icma arasında münasibətləri tənzimləməkdir.

Parlamentin Hüquq siyasəti və dövlət quruculuğu komitəsinin sədri bildirdi ki, "Kütləvi informasiya vasitələri haqqında" Azərbaycan Respublikasının Qanununa və "Qeyri-hökumət təşkilatları (ictimai birliklər və fondlar) haqqında qanuna nəzərdə tutulan əlavə və dəyişikliklər müasir dövün tələblərindən, bu sahələrdə yaranmış boşluqların aradan qaldırılması vacibliyindən irəli gəlir. Hər iki qanuna nəzərdə tutulan əlavə və dəyişikliklərin bir qismi oxşarlıq təşkil edir.

Qanun layihələri adların istifadə qaydalarının təkmilləşdiriməsini, tənzimlənməsini və digər məsələlərdən ibarətdir.

Qanun layihələrinin müzakirəsi zamanı deputatlardan Tahir Rzayev, Aydın Mirzəzadə, Qüdrət Həsənquliyev, Azay Quliyev bu məsələlərə müsbət münasibət bildirərək bir sıra təkliflərlə çıxış etdilər. Qanun layihələrinin müzakirəsi Milli Məclisin növbədənkənar sessiyasının növbəti iclasında davam etdiriləcəkdir.

Azərbaycan.- 2009.- 20 iyun.- S. 1, 2.