Daxili İşlər
Nazirliyinin mətbuat xidmətindən bildirmişlər ki, son
günlər müxtəlif kütləvi informasiya vasitələrində
Göyçay rayonundan olan sahibkar Çingiz Mayılovun əsassız
həbs olunması ilə bağlı məlumatlar
yayılır.
Bu istiqamətdə
aparılan araşdırmalar göstərmişdir ki, son
vaxtlar Çingiz Mayılovun qanunsuz hərəkətləri
barədə rayon polis şöbəsinə və
prokurorluğuna dəfələrlə şikayətlər
daxil olmuşdur. Göyçay şəhər sakini Vüsalə
Həsənova ərizə ilə müraciət edərək
həyat yoldaşı Çingiz Mayılovun onu silahla hədələyib
döydüyünü, atasının verdiyi 10 sot torpaq sahəsinin
satılması haqqında sənədləri imzalamağa məcbur
etdiyini bildirmiş, təhlükəsizliyinin təmin
olunmasını xahiş etmişdir.
Bundan əlavə, vətəndaş
Vüsalə Həsənovanın anası Südabə Həsənova
kürəkəni Çingiz Mayılovun onu təhqir edərək
şəxsiyyətini alçaltması, qızlarını
döyməsi və avtomaşınla vurub öldürəcəyi
ilə hədələməsi barədə polis şöbəsinə
ərizə ilə müraciət etmişdir. 2009-cu il iyunun
7-də isə Südabə Həsənova Çingiz
Mayılovun ikinci arvadı olan qızı Vüsaləni
döyməsi, mehmanxana, mağazalar və torpaq sahələrini
birinci arvadından olan oğlunun adına keçirməsi, onu
və qızını təhqir etməsi, nümayişkaranə
şəkildə alçaltması, həmçinin onun
qanunsuz hərəkətlərinin qarşısının
alınması üçün dəfələrlə rayon
polis şöbəsinə və prokurorluğuna şikayət
ərizələri ilə müraciət etməsi barədə
Daxili İşlər Nazirliyinin "102" xidmətinə məlumat
vermişdir.
Göstərilən
şikayətlərlə əlaqədar Çingiz Mayılov
bu il iyunun 11-də rayon polis şöbəsinə dəvət
edilmiş, zəruri araşdırmaların nəticələrinə
görə onun inzibati məsuliyyətə cəlb edilməsi
barədə qərar qəbul edilmişdir. Müvafiq qərar
Çingiz Mayılova elan olunduqda o, polis əməkdaşlarını
təhqir etmiş, hədələmiş, onu sakitləşdirmək
istəyən polis kapitanı Ruhid Tağıyevə xəsarət
yetirmiş, növbətçi hissənin pəncərəsini
sındırmaqla polis şöbəsinin rəis müavini Xaləddin
Eyyubova bədən xəsarəti yetirmişdir.
Xuliqanlıq hərəkətlərini
davam etdirən Ç.Mayılov növbətçi hissədə
olan stul və stolları, xidməti telefonları
sındırıb yararsız hala salmış, onun qanunsuz hərəkətlərinin
qarşısını almaq istəyən məsul növbətçi
Vahid Cahangirova xəsarət yetirmişdir.
Qeyd edilən
xuliqanlıq hərəkətlərinə görə
Göyçay Rayon Polis Şöbəsinin istintaq bölməsində
Azərbaycan Respublikası Cinayət Məcəlləsinin
221.3-cü maddəsi ilə cinayət işi
başlanmış, Ç.Mayılov şübhəli şəxs
qismində tutulmuş və iyunun 12-də barəsində həbs
qətimkan tədbiri seçilmişdir.
Bununla belə, özlərini
hüquq müdafiəçiləri adlandıran
ayrı-ayrı şəxslər bu hadisədən
yararlanmağa cəhd göstərərək hər vəchlə
rəsmi dövlət orqanlarını, o cümlədən
polisi nüfuzdan salmaq məqsədi güdən aksiyalar təşkil
etməyə çalışır, təqsirləndirilən
şəxsin yaxınlarını müxtəlif qanunsuz
aksiyalar keçirməyə təhrik edirlər. İctimai
fikri yanlış istiqamətə yönəltmək məqsədilə
müxtəlif mətbu orqanlarında əsl həqiqətdən
uzaq olan məlumatlar yayılır, bilərəkdən özlərinin
adət etdikləri məntiqdənkənar üsul və vasitələrə
əl ataraq xidməti vəzifələrini yerinə yetirən
polis əməkdaşlarını ləkələməyə
səy göstərirlər.
Daxili İşlər
Nazirliyi belə qanunazidd hərəkətlərin yolverilməzliyini
xüsusi qeyd edərək diqqətə çatdırır
ki, hazırda bu fakt üzrə istintaq araşdırmaları
davam etdirilir.
Çingiz Mayılov
özünün seçdiyi vəkil ilə təmin
olunmuşdur. İş üzrə istintaqın tam, hərtərəfli
və obyektiv aparılması üçün ibtidai
araşdırma prosesi ciddi nəzarətdə saxlanılır.
AzərTAc
Azərbaycan.- 2009.- 20 iyun.- S. 7.