Ölkəmizdəki
Heydər Əliyev muzeylərini ömrünün 25 ilini
xalça sənətinə həsr etmiş rəssam Afaq Kərimovanın
ulu öndərə həsr etdiyi müxtəlif
kompozisiyalı, rəngarəng əsərləri, portretləri
də bəzəyir. Həmin əsərlər özünəməxsus
dəst-xətti ilə biri-birindən seçilir.
Bu yaxınlarda
hazırladığı ikili süjetli portret batiklər də
diqqəti cəlb edir. Hər iki batikin yuxarı hissəsində
tağvari xalçaçılıq sənətinə "ləçək-türünc"
adlanan xüsusi üslubla toxunmuş nəfis xalça hissəsi
yerləşir. Tağ formasında toxunmuş əsərdə
gerbimizin, sülh quşlarının, üçrəngli
bayrağımızın ətrafında nəbati ornamentlərlə
atlas üzərində işlənmiş mürəkkəb
süjetli batik texniki cəhətdən də gözəl vəhdət
yaranır. Batikin ana xətti "Müstəqil Azərbaycan
dövləti Heydər Əliyevin şah əsəridir. İlham
Əliyev" sözləri ilə açılır. Ətrafda
İhsan Doğramacının, Mstislav Rastropoviçin,
Süleyman Dəmirəlin ulu öndər haqqında ürək
sözləri, nəvəsi Leyla Əliyevanın babasına həsr
etdiyi "Mənim babam" şeiri və İlham Əliyevin
sözləri yazılmışdır.
Rəssamın ilk dəfə
müraciət etdiyi bu üsul - həm xalça, həm də
batikin vəhdətindən yaranmışdır. Birinci əsərin
davamı kimi işlənmiş ikinci batikdə
respublikamızın təbiəti, mənzərəli, səxavətli
və məhsuldar torpağı çox gözəl əks
olunmuşdur. Al-əlvan kontraslı, ara-sıra üçrəngli
bayrağımızla əhatələnmiş qollu-budaqlı
qocaman bir ağacın Azərbaycan süjetli kökü sanki
bizə müxtəlif əsrlərin yadigarı olan qədim Dərbənd
qalaları, Qoşa qala qapısı, Əsgəran, Qız
qalası, Qazaxda Göyəzən, Tovuzda Koroğlu qalası,
Gəncə, Şuşa, Naxçıvan şəhər
qalaları, möhtəşəm Azərbaycan xəritəsi
diqqəti çəkir. Onun üzərində bu sözlər
vardır: "Azərbaycan torpağının hər bir
guşəsi hər birimiz üçün müqəddəs
yerdir. Heydər Əliyev".
Afaq xanımın ulu
öndərə həsr etdiyi digər əsəri bu
yaxınlarda istifadəyə verilmiş YAP-ın yeni
binasını bəzəyir. Rəssamın başqa bir yeni əsəri
də orijinallığı ilə diqqəti cəlb edir. Bu ipək
parça üzərində işlənmiş basma üsullu
zərif xəttatlıq nümunəsidir. Mövzusu da
qeyri-adidir. Neft buruqları, möhtəşəm tikililər,
körpülər, İpək yolu, pambıq tarlaları,
üzüm bağları... Süjetin ana xəttinin mərkəzində
ağ vərəq üzərində ulu öndərin
imzaladığı əlləri görünür: "Mən
Azərbaycanın xoşbəxt gələcəyini
görürəm. Heydər Əliyev".
Bəli, Heydər Əliyevi
haqlı olaraq yeni Azərbaycanın qurucusu, memarı kimi təqdim
edirlər. Bu, həqiqətən də belədir. Ulu öndər
bu adı layiqincə daşımış, Azərbaycanı
dünyada tanıtmışdır.
Şükufə TAĞIZADƏ
Azərbaycan.- 2009.- 21 iyun.- S. 2.
