YAP Xətai rayon təşkilatında bələdiyyə seçkilərinə hazırlıq məsələləri müzakirə olunmuşdur

İyunun 20-də Yeni Azərbaycan Partiyasının (YAP) Xətai rayon təşkilatında bələdiyyə seçkilərinə hazırlıqla bağlı tədbir keçirilmişdir.

İki yüz əlli nəfər partiya üzvünün qatıldığı iclasda Xətai Rayon İcra Hakimiyyətinin başçısı Razim Məmmədov ötən il keçirilmiş prezident seçkilərinin və bu ilin mart ayında baş tutmuş ümumxalq səsverməsinin (referendum) yekunlarından və bələdiyyə sekilərinə hazırlıqla bağlı qarşıda duran vəzifələrdən danışmışdır. Bildirmişdir ki, seçkinin mütəşəkkil, demokratik qaydalara uyğun və şəffaf keçirilməsi məqsədi ilə dairə və məntəqə seçki komissiyalarının yerləşdikləri binalarda normal iş şəraiti yaradılır. Bütün məntəqələrdə veb-kameralar quraşdırılmışdır. Rayon ərazisində 123 seçki məntəqəsi tam təmir olunmuşdur.

Qarşıdakı seçkilərdə partiyanın üzərinə düşən vəzifələrdən danışan YAP Xətai rayon təşkilatının sədri Hüseynbala Mirələmov bildirmişdir ki, hazırda dairə seçki komissiyalarında seçici siyahılarının dəqiqləşdirilməsi istiqamətində işlər aparılır. İndiyədək 169 minə yaxın seçici siyahıya alınmışdır. Bu da rayon əhalisinin 67 faizini təşkil edir.

Tədbirdə çıxış edən YAP sədrinin müavini - icra katibi, Milli Məclisin deputatı Əli Əhmədov bildirmişdir ki, Prezident İlham Əliyevin həyata keçirdiyi dövlət əhəmiyyətli proqramlar ölkənin sosial durumunu gündən-günə yaxşılaşdırır. Hazırda partiyanın üzvlərinin sayının artması bunun bariz nümunəsidir.

Sonda rayonun partiya fəallarına diplomlar, bir qrup şəxsə isə üzvlük vəsiqəsi təqdim olunmuşdur.

AzərTAc

Azərbaycan.- 2009.- 21 iyun.- S. 3.