Naxçıvan Dövlət
Universitetində Cəlil Məmməquluzadənin 140 illik
yubileyi münasibətilə keçirilən silsilə tədbirlər
davam edir.
AMEA-nın
Naxçıvan Bölməsi ilə birgə təşkil
olunmuş "Ölülər" tragikomediyası və sənətdə
ölməzlik" mövzusunda elmi konfrans Azərbaycan
teatrı və dramaturgiyası tarixində xüsusi yer tutan
"Ölülər" əsərinin
yazılmasının 100-cü ildönümünə həsr
olunmuşdu.
Konfransı giriş
sözü ilə açan rektor, akademik İsa Həbibbəyli
"Ölülər"in ideya-bədii məziyyətlərindən
danışmışdır.
Universitetin tədris
işləri üzrə prorektoru, əməkdar elm xadimi
Hüseyn Həşimli "Ölülər və ədəbi-ictimai
mühit", NDU-nun "Azərbaycan ədəbiyyatı"
kafedrasının müdiri, filologiya elmləri doktoru, professor Əsgər
Qədimov "C.Məmmədquluzadənin "Ölülər"
əsərində İsgəndər obrazının prototipləri",
AMEA-nın Naxçıvan Bölməsi İncəsənət,
Dil və Ədəbiyyat İnstitutunun direktoru, AMEA-nın
müxbir üzvü Əbülfəz Quliyev "Ölülər"
əsərinin dili və üslubu", NDU-nun "Azərbaycan
ədəbiyyatı" kafedrasının dosenti, filologiya elmləri
namizədi Əbülfəz Əzimli "C.Məmmədquluzadənin
"Ölülər" tragikomediyası ədəbi tənqiddə",
AMEA-nın Naxçıvan Bölməsi İncəsənət,
Dil və Ədəbiyyat İnstitutunun musiqi və teatr
şöbəsinin müdiri, sənətşünaslıq
namizədi Əli Qəhrəmanov "Ölülər"
Naxçıvan səhnəsində" mövzularında məruzələr
etmişlər.
Konfransda Cəlil Məmmədquluzadənin
həyatı və yaradıcılığına aid kitab sərgisi
də nümayiş etdirilmişdir.
Naxçıvan Dövlət
Universitetinin Tələbə teatr studiyasının
hazırladığı "Ölülər"
tamaşası Naxçıvan MR Gənclik Mərkəzində
göstərilmişdir. Tamaşada rolları universitetin
ayrı-ayrı fakültələrində təhsil alan tələbələr
ifa etmişlər.
Mehriban SULTAN
Azərbaycan.- 2009.- 23 iyun.- S. 7.