Azərbaycan Serbiya ilə əlaqələrin inkişafına böyük əhəmiyyət verir

İyunun 23-də Milli Məclisin Sədri Oqtay Əsədov ölkəmizdə səfərdə olan Serbiya Respublikasının xarici işlər naziri Vuk Yeremiçin başçılıq etdiyi nümayəndə heyəti ilə görüşmüşdür.

Milli Məclisin Sədri bu cür səfərlərin dövlətlərarası münasibətlərin inkişafında əhəmiyyətli rol oynadığını diqqətə çatdırmışdır. Bildirmişdir ki, ölkələrimiz arasında siyasi və iqtisadi sahədə əməkdaşlığın daha da dərinləşməsinə heç bir maneə yoxdur.

Oqtay Əsədov demişdir ki, Azərbaycan Cənub-Şərqi Avropa dövlətləri, o cümlədən Serbiya ilə əlaqələrin inkişafına böyük əhəmiyyət verir. Bu gün Milli Məclisdə Serbiya parlamenti ilə əlaqələr üzrə işçi qrupu fəaliyyət göstərir. Biz qanunvericilik orqanları arasında əlaqələrin inkişafını önəmli hesab edirik.

Azərbaycan regional münaqişələrin həllində Serbiyanın ölkələrin ərazi bütövlüyünün qorunması və beynəlxalq hüququn normalarına riayət olunması sahəsində tutduğu prinsipial mövqeni dəstəkləyir. Heç də təsadüfi deyildir ki, Kosovo birtərəfli qaydada öz müstəqilliyini elan etdikdən sonra Azərbaycan sülhməramlıları bölgədən çıxarılmışdır.

Milli Məclisin Sədri daha sonra qeyd etmişdir ki, biz Azərbaycanın ən ağrılı problemi olan Dağlıq Qarabağ münaqişəsinin həllində Serbiyanın ölkəmizin mövqeyini dəstəkləməsini yüksək qiymətləndiririk. İnanırıq ki, problem beynəlxalq hüquq normaları çərçivəsində tezliklə öz ədalətli həllini tapacaqdır.

Səmimi görüş üçün minnətdarlığını bildirən qonaq təmsil etdiyi ölkənin xarici işlər nazirinin ilk dəfə Azərbaycana səfər etdiyini diqqətə çatdırmışdır. O, bu missiyanı ilk dəfə həyata keçirən şəxs kimi böyük qürur hissi keçirdiyini dilə gətirmişdir.

Serbiyalı nazir Bakıda gördüklərindən və buradakı inkişafdan məmnun olduğunu xüsusi vurğulamışdır. Bildirmişdir ki, ölkələrimiz arasında istənilən məsələni müzakirə etmək üçün heç bir problem yoxdur və Serbiya Azərbaycan ilə əlaqələrin dərinləşməsində maraqlıdır.

Qonaq Dağlıq Qarabağ münaqişəsindən söz açaraq bu məsələdə ölkəsinin Azərbaycanın ərazi bütövlüyünü birmənalı şəkildə dəstəklədiyini və bu mövqedən heç vaxt geri çəkilməyəcəyini diqqətə çatdırmışdır.

Görüşdə tərəfləri maraqlandıran məsələlər ətrafında geniş fikir mübadiləsi aparılmışdır.

AzərTAc

Azərbaycan.- 2009.- 24 iyun.- S. 3.