Kompüter
informasiyasına qanunsuz daxil olub xarici vətəndaşların
müxtəlif bank hesablarındakı pul vəsaitlərinin
talanması ilə məşğul olan Azərbaycan
Respublikası və xarici ölkələrin vətəndaşlarından
ibarət transmilli mütəşəkkil dəstə Milli Təhlükəsizlik
Nazirliyi tərəfindən keçirilən növbəti əməliyyat-axtarış
tədbirləri nəticəsində ifşa olunaraq zərərsizləşdirilmişdir.
Milli Təhlükəsizlik
Nazirliyinin ictimai əlaqələr mərkəzinin məlumatında
bildirilir ki, Azərbaycan Respublikasının vətəndaşları
- Elqan Hikmət oğlu Vəliyev, Elçin Bəyverdi
oğlu Abbasov, Ruslan Abidin oğlu Həsənov, Abidin Nüsrət
oğlu Həsənzadə, həmçinin Suriya Ərəb
Respublikasının vətəndaşı İbrahim Məhəmməd
Əhməd oğlu və hazırda şəxsiyyətləri
istintaqla araşdırılan xaricdə yaşayan əcnəbilər
mütəşəkkil dəstənin tərkibində qanunla
qorunan kompüter informasiyasına qanunsuz daxil olaraq onların
surətlərini əldə etmişlər. Mütəşəkkil
dəstənin üzvləri həmin informasiyalar vasitəsilə
ayrı-ayrı fiziki şəxslərə məxsus elektron
bank hesablarından böyük məbləğdə pul
çıxarmış və onların mənafeyinə
külli miqdarda ziyan vurmaqla həmin pul vəsaitini gizli olaraq
talamışlar.
Məlum olmuşdur ki,
Elqan Vəliyev, Elçin Abbasov, Ruslan Həsənov, Abidin Həsənzadə
və Məhəmməd İbrahim istintaq sirri olduğuna
görə adları açıqlanmayan xarici ölkə vətəndaşları
ilə cinayət əlaqəsinə girərək Elçin
Abbasovun adına "Nur-AB" Məhdud Məsuliyyətli Cəmiyyəti
təsis etmiş və onu hüquqi şəxs kimi dövlət
qeydiyyatından keçirmişlər. Daha sonra mütəşəkkil
dəstənin əcnəbi üzvləri ABŞ, Kanada, Birləşmiş
Ərəb Əmirlikləri, Almaniya, İsveç və digər
xarici ölkələrin banklarının müştərilərinə
məxsus külli miqdarda plastik kartların nömrə və
kodlarını qeyri-qanuni əldə edərək dəstənin
Azərbaycandakı üzvlərinə göndərmişlər.
Qanunsuz əldə olunmuş həmin kompüter
informasiyaları əsasında mütəşəkkil dəstənin
buradakı üzvləri Elqan Vəliyevin
başçılığı və təşkilatçılığı
ilə kredit kartlar vasitəsilə nağdsız ödənişlərin
həyata keçirilməsi üçün istifadə edilən
"Nur-AB" Məhdud Məsuliyyətli Cəmiyyətinə
məxsus "POS-terminal" vasitəsilə təxminən
300 min AZN məbləğində pulun "Nur-AB" MMC-nin
hesabına köçürülməsinə nail olmuşlar.
Belə ki, mütəşəkkil
dəstə tərəfindən "POS-terminal" vasitəsilə
təkcə Almaniya banklarının müştərilərinin
plastik kartlarının kodlarından istifadə edilərək
130 min AZN məbləğində saxta nağdsız
hesablaşma əməliyyatları aparılmış, həmin
vəsaitin "Nur-AB" MMC-nin hesabına
köçürülməsi təşkil edilmiş və
2009-cu il may ayının əvvəlində 54 min manat məbləğində
pul vəsaiti "Nur-AB" MMC-nin bank hesabından
çıxarılmışdır. Dəstənin üzvləri
ümumi vəsaitin 73 min manatdan artıq qalan hissəsini isə
əvvəlki üsulla bir neçə dəfə hesablardan
çıxarmağa cəhd etsələr də, Bakıda fəaliyyət
göstərən kommersiya banklarından biri tərəfindən
"Nur-AB" MMC-nin hesabı bloklaşdırıldığından
onlar öz məqsədlərinə nail ola bilməmişlər.
Bundan başqa, Elqan Vəliyevin
başçılığı ilə dəstənin üzvləri
2009-cu ilin iyun ayının əvvəlində növbəti dəfə
"Nur-AB" MMC tərəfindən "POS-terminal"la
saxta plastik kartlar vasitəsilə 160 min 900 AZN məbləğində
nağdsız əməliyyatın aparılmasını təşkil
etmişlər. Elqan Vəliyevin göstərişi ilə
Elçin Abbasov və Abidin Həsənzadə 2009-cu il iyunun
8-də həmin vəsaitin çıxarılmasını
asanlaşdırmaq məqsədi ilə Bakıdakı bir
bankın hesabından digər bankın hesabına
köçürülməsinə cəhd edərkən Milli
Təhlükəsizlik Nazirliyinin əməkdaşları tərəfindən
xüsusi qabaqlayıcı əməliyyat planı əsasında
cinayət başında yaxalanmışlar.
Faktla bağlı Milli Təhlükəsizlik
Nazirliyi İstintaq Baş İdarəsi tərəfindən Azərbaycan
Respublikası Cinayət Məcəlləsinin 271.2.1-ci və
271.2.3-cü, (mütəşəkkil dəstə tərəfindən
kompüter informasiyasına qanunsuz daxil olma yolu ilə külli
miqdarda ziyan vurma), 177.3.1-ci və 177.3.2-ci (mütəşəkkil
dəstə tərəfindən özgənin əmlakını
külli miqdarda ziyan vurmaqla gizli olaraq talama) maddələri ilə
cinayət işi başlanılmış, Elqan Vəliyev,
Elçin Abbasov, Ruslan Həsənov, Abidin Həsənzadə
və Məhəmməd İbrahim təqsirləndirilən
şəxs qismində cəlb olunaraq məhkəmənin qərarı
ilə barələrində həbs qətimkan tədbiri
seçilmişdir.
Cinayət işi üzrə
bütün halların araşdırılması, bu
hüquqazidd əməllərin digər
iştirakçılarının müəyyən
olunması üçün zəruri istintaq hərəkətləri
və əməliyyat-axtarış tədbirləri davam
etdirilir.
AzərTAc
Azərbaycan.- 2009.- 24 iyun.- S. 3.