Cəbhə bölgəsi
olan Ağdamda sükut uzun müddət davam etmir. Ermənilərin
atdığı güllələr sakitliyi
vaxtaşırı pozur. "Qərvənd" kəndli
fermer təsərrüfatının əkin sahələri də
cəbhə xəttinə çox yaxındır. Məsafə
bəlkə də 400- 500 metr olar. Bu ərazidə yaşamaq
da, işləmək də hünərdir.
Düşmən tərəfdən
ünvansız atılan təsadüfi bir güllə vaxt olub
ki, ölümlə nəticələnib, bir ailənin faciəsinə
çevrilib. Reallıq belədir.
Emin Bəşirzadənin
rəhbərlik etdiyi fermer təsərrüfatı 2003-cü
ildən fəaliyyət göstərir.
Taxılçılıq
və heyvandarlıqla məşğul olan "Qərvənd"in
68 hektar torpaq sahəsi vardır. Bu il 45 hektar sahədə bol
buğda yetişdiriblər. 12 ailənin
çalışdığı bu fermer təsərrüfatında
uğurlu nəticələr qazanılır. Ali təhsilli
iqtisadçı olan Emin Bəşirzadə söhbət
zamanı özü bu barədə belə dedi:
- Biz dövlətimizin,
Prezident İlham Əliyevin qayğı və diqqətindən
çox razıyıq. Ölkəmizdə, eləcə də
rayonumuzda sahibkarlığın inkişafına yaradılan
şərait bizə qüvvət verir. Düşmənlə
üzbəüz ərazidə yaşayıb işləsək
də əhval-ruhiyyəmiz yüksəkdir.
Başladığımız hər işi inamla
görürük. Bizim fermer təsərrüfatı əsasən
toxumçuluqla məşğuldur.
Taxılçılığın inkişafı
üçün dövlətin yaratdığı imkanlardan
yetərincə bəhrələnirik. Keçən ilin
payızında 50 faiz güzəştli qiymətlərlə
6 ton yüksək reproduksiyalı "Əzəmətli"
və "Əkinçi-84" elit toxumları alıb səpdik.
Zəmilərin becərilməsini,
suvarılmasını aqrotexniki qaydalar əsasında həyata
keçirdik. Zəhmətimiz hədər getməyib. Zəmilər
bol məhsuldan xəbər verir. Biçinin ilk günləri
uğurludur. 150 tondan çox keyfiyyətli toxum istehsal edəcəyimiz
şübhəsizdir. Toxumu saxlamaq üçün müvafiq
yerimiz də vardır. Öz gücümüzlə tutumu 150
tondan çox olan təzə anbar tikmişik.
Məhsulu
özümüzün "Vim" markalı aqreqatla təmizlədikdən
sonra ora yığacağıq.
Xındırıstan kəndi
ərazisindəki Q.Zakir adına fermer təsərrüfatında
da taxıl biçini müvəffəqiyyətlə davam
edir. Böyük zəhmət bahasına yetişdirilmiş
bol məhsul fermer təsərrüfatının öz
kombaynı ilə biçilir. Fermer təsərrüfatına
təcrübəli təsərrüfatçı Nizami Quliyev
rəhbərlik edir. Bu il 200 hektar sahədə buğda
yetişdirilmişdir. Biçin aparılan ilk hektarların məhsuldarlığı
30 sentnerdən çoxdur.
Ümumiyyətlə, bu
il rayonda 17.513 hektar sahədə taxıl biçiləcək.
Bu, keçən ildəkindən 10 min hektar çoxdur.
İşlərin
gedişi, zəmilərin məhsuldarlığı göstərir
ki, bu il də Ağdam rayonunda çörək bol olacaq.
Lazım QULİYEV
Azərbaycan.- 2009.- 24 iyun.- S 6.